3 Ix schecancot juntzan̈ ebꞌ schecabꞌ vin̈ dꞌa lum Seir, dꞌa yol yic Edom, yic scot ebꞌ yal dꞌa vin̈ yucꞌtac vin̈, aton vin̈aj Esaú to vanxo scot vin̈ dꞌa yol bꞌe.

4 Ix yalan vin̈ dꞌa ebꞌ schecabꞌ chiꞌ icha tic: Alec dꞌa vin̈ vucꞌtac aj Esaú icha tic: A vin̈ ucꞌtac aj Jacob syacꞌoch sbꞌa vin̈ dꞌa yalan̈ a mandar. Tzeyalanpaxi to a yedꞌ vin̈aj Labán ix in ecꞌ jun tiempoal tic. 5 A ticnaic ay nocꞌ in vacax, nocꞌ in calnel, nocꞌ in chiva, nocꞌ in bꞌuru. Ay ebꞌ vin̈ in checabꞌ yedꞌ ebꞌ ix in checabꞌ. Svalbꞌat jun abꞌix tic dꞌayach mamin vucꞌtac, yujto tzin nibꞌej tzin och juncꞌolal edꞌoc, xchicot vin̈aj Jacob, xe chi dꞌa vin̈. 6 Axo yic ix jax ebꞌ vin̈ checabꞌ chiꞌ, ix yalan ebꞌ vin̈ dꞌa vin̈aj Jacob icha tic:

—Toxo ix on̈ xidꞌecꞌ dꞌa vin̈ ucꞌtac, tic van sja vin̈ ul ach schaꞌa. Chan̈eꞌ ciento val vinac yedꞌnac vin̈, xchi ebꞌ vin̈ schecabꞌ vin̈ chiꞌ.

7 Ayic ix yabꞌan juntzan̈ chiꞌ vin̈aj Jacob chiꞌ, ix xiv chaan̈ vin̈, ix te och vin̈ ilcꞌolal. Ix lajvi chiꞌ ix spojan bꞌat ebꞌ anima vin̈ yedꞌnac. Cha macan̈ ix yutej vin̈ yedꞌ nocꞌ vacax, nocꞌ calnel yedꞌ nocꞌ camello. 8 Yujto ix sna vin̈: Tato sjavi vin̈aj Esaú dꞌa junoc macan̈, yacbꞌan syacꞌ oval vin̈ yedꞌoc, axo junxo macan̈ syal yeli, xchi vin̈. 9 Ix lajvi chiꞌ ix lesalvi vin̈ icha tic: Ach Jehová in Diosal, sDiosal ach vin̈ in mam icham aj Abraham yedꞌ vin̈ in mam aj Isaac. A ach ix alaꞌ to tzin meltzajcot dꞌa in luum, dꞌa scal ebꞌ in cꞌabꞌ voc. Ix alani to ayachn̈ej och vedꞌoc yic vachꞌn̈ej tzin elcꞌochi. 10 Te man̈ in mojoc to tzin a xajanej, man̈ in mojoc pax to ayn̈ejoch a vachꞌcꞌolal vedꞌoc. Ayic vecꞌnacbꞌat dꞌa yol aꞌ Jordán, an̈ej jun in cꞌococh vedꞌnac, axo ticnaic, chabꞌxo campamentoal ix in elcꞌochi, te ayxo tastac dꞌayin. 11 Tzin tevi dꞌayach to tzin a col dꞌa yol scꞌabꞌ vin̈ vucꞌtac chiꞌ. Tzin te xivi, qꞌuinaloc sja vin̈ dꞌayin, smilancham ebꞌ ix ix yedꞌ ebꞌ unin tic vin̈. 12 A ach ix alaꞌ to vachꞌn̈ej ol in elcꞌoch uuj. Ix alanpaxi to man̈ jantacoc ol ajelcꞌoch sbꞌisul vin̈tilal, icha val yarenail aꞌ mar to max yal sbꞌischaji, xchi vin̈ dꞌa slesal chiꞌ.

13 A dꞌa jun acꞌval chiꞌ, ix vaycan vin̈ taꞌ. Ayic ix sacbꞌi, a dꞌa scal masanil tas yedꞌnac vin̈, ix siqꞌuel tastac vin̈ yic siej vin̈ dꞌa vin̈ yucꞌtac chiꞌ: 14 200 nocꞌ nun chiva yedꞌ 20 nocꞌ mam chiva. 200 nocꞌ nun calnel yedꞌ 20 nocꞌ chꞌac calnel. 15 30 nocꞌ nun camello yedꞌ nocꞌ yuneꞌ toto ix alji, 40 nocꞌ nun vacax yedꞌ lajun̈van̈ nocꞌ toro, 20 nocꞌ nun bꞌuru yedꞌ lajun̈van̈ nocꞌ mam bꞌuru. 16 Dꞌa elan̈chamel ix yacꞌ vin̈aj Jacob junjun macan̈ nocꞌ dꞌa ebꞌ vin̈ schecabꞌ, macquiltac ix yutej vin̈, ix yalan vin̈ dꞌa ebꞌ icha tic:

—Bꞌabꞌlajan̈ec yedꞌ junjun macan̈ nocꞌ, najtic tzeyutej scal junjun macan̈, xchi vin̈.

17 A dꞌa vin̈ edꞌjinac nocꞌ bꞌabꞌel, ix yal vin̈ icha tic:

—Ayic ol a chaan a bꞌa yedꞌ vin̈ vucꞌtac chiꞌ, tato scꞌanbꞌej vin̈: ¿Mach a patrón? ¿Bꞌajtil tzach bꞌati? ¿Mach yic nocꞌ nocꞌ edꞌnac tic? tato xchi vin̈ dꞌayach, 18 tzalan dꞌa vin̈ icha tic: Mamin Esaú, a juntzan̈ tic silabꞌ vin̈aj Jacob a checabꞌ dꞌayach. Tzacꞌanpax vin̈ vuuj, xa chi, xchi vin̈aj Jacob chiꞌ.

19 Icha chiꞌ ix aj yalan vin̈ dꞌa vin̈ edꞌjinac nocꞌ schabꞌil macan̈ yedꞌ dꞌa vin̈ edꞌjinac nocꞌ yoxil macan̈. Icha chiꞌ ix aj yalan vin̈ dꞌa masanil ebꞌ vin̈ edꞌjinac junjun macan̈ nocꞌ nocꞌ chiꞌ:

—Ayic ol e chalan e bꞌa yedꞌ vin̈aj Esaú chiꞌ, jun lajann̈ej ol eyutej eyalani. 20 Tzeyalani: Tzacꞌan vin̈aj Jacob a checabꞌ cuuj, xe chi, xchi vin̈ dꞌa ebꞌ vin̈ schecabꞌ chiꞌ.

Icha tic ix yutej snaan vin̈aj Jacob chiꞌ: Tecan ol emta yoval scꞌol vin̈aj Esaú yuj in silabꞌ ix vacꞌ bꞌabꞌlaj dꞌa vichan̈, ol vilan val och in bꞌa yedꞌ vin̈. Tato icha chiꞌ tecan ol in scha vin̈ dꞌa vachꞌil, xchi vin̈. 21 Yuj chiꞌ, ix schec bꞌabꞌlaj masanil silabꞌ vin̈aj Jacob chiꞌ. Axo vin̈ jun, ixto can junxo acꞌval vin̈ dꞌa scampamento chiꞌ.

22-23 A dꞌa jun acꞌval chiꞌ ix qꞌue van vin̈aj Jacob, ix yicꞌanbꞌat ebꞌ ix yetbꞌeyum vin̈ schavan̈il yedꞌ ebꞌ ix chavan̈ criada yedꞌ uxluchvan̈ yuninal vin̈, ix ecꞌta ebꞌ dꞌa sjayil jun aꞌ scuchan Jaboc yedꞌ masanil tastac yedꞌnac. 24 Axo yic ix can vin̈ schꞌocojil, ix yacꞌan oval vin̈ yedꞌ jun vinac masanto ix sacbꞌi. 25 Axo jun vinac chiꞌ, ix yilaꞌ to max acꞌji ganar vin̈aj Jacob chiꞌ yuuj, yuj chiꞌ ix macꞌjiel yacan̈il xubꞌ vin̈aj Jacob chiꞌ yuuj. Ix el chinnaj xubꞌ vin̈ chiꞌ ayic ix yacꞌan oval ebꞌ. 26 Ix yalan jun vinac chiꞌ dꞌa vin̈ icha tic:

—Actej in eli yujto vanxo sacbꞌi, xchi.

Ix yalan vin̈aj Jacob dꞌay icha tic:

—Man̈ ol ach vactejeli, tato man̈ ol alcan junoc vachꞌ lolonel dꞌa vibꞌan̈, xchi vin̈.

27 —¿Tas a bꞌi? xchi jun vinac chiꞌ dꞌa vin̈.

—Jacob in bꞌi, xchi vin̈.

28 Ix yalan dꞌa vin̈ icha tic:

—A ticnaic man̈xo Jacob-oc ol a bꞌiej, palta Israelxo,^* yujto ix yal acꞌan oval yedꞌ Dios yedꞌ pax anima, xchi.

29 —A ticnaic al dꞌayin tas a bꞌi ach tic, xchi vin̈aj Jacob chiꞌ.

Axo ix yalan jun vinac chiꞌ icha tic:

—¿Tas yuj tza cꞌanbꞌej in bꞌi? xchi.

Ataꞌ ix yalcan vachꞌ lolonel dꞌa yibꞌan̈ vin̈aj Jacob chiꞌ. 30 Yuj chiꞌ Peniel^* ix sbꞌiejcan jun lugar chiꞌ yuj vin̈aj Jacob chiꞌ, ix yalan vin̈ icha tic: Ix vil sat Dios, palta ina pitzan into, xchi vin̈.

31 Vanxo yecꞌbꞌat vin̈aj Jacob dꞌa Peniel chiꞌ, ix javi cꞌu. Yujto ix el chinnaj xubꞌ vin̈, yuj chiꞌ tzꞌem sbꞌey vin̈. 32 Yuj chiꞌ a ebꞌ yin̈tilal Israel, max schilaj schꞌan̈al scꞌojnubꞌ xubꞌ nocꞌ nocꞌ ebꞌ, yujto a dꞌa xubꞌ vin̈aj Jacob chiꞌ yabꞌnac syail.