4 Ix lajvi chiꞌ ix yacꞌanbꞌat stiꞌ vin̈ dꞌa ebꞌ ix yetbꞌeyum, aton ix Raquel yedꞌ ix Lea, yic vachꞌ scot ebꞌ ix, sja ebꞌ ix bꞌaj stan̈vi calnel vin̈. 5 Ayic ix ja ebꞌ ix, ix yalan vin̈ dꞌa ebꞌ ix:

—Ex vetbꞌeyum, a ticnaic toxo ix vilaꞌ to a vin̈ e mam, chucxolaj in yilan vin̈, man̈ ichoc dꞌa yalan̈taxo, palta a sDiosal vin̈ in mam, ayn̈ej val och vedꞌoc. 6 A ex tic eyojtac val to ix in munlaj dꞌa vin̈ e mam dꞌa svachꞌilal dꞌa smasanil in cꞌool. 7 Axo vin̈ icha val to tzin yixtej vin̈, lajun̈elxo ix sqꞌuex in tojol vin̈, palta a Dios jun, max in xcha ixtajoc. 8 Ayic ix yalan vin̈ e mam chiꞌ: Ol ach in tup dꞌa nocꞌ calnel, nocꞌ tzꞌibꞌiltac, xchi vin̈, axo yic ix alji yuneꞌ nocꞌ, nabꞌa tzꞌibꞌiltac yuneꞌ nocꞌ ix alji. Ayic ix yilan vin̈ to icha chiꞌ, ix yalanxi vin̈: A nocꞌ jasquiltac stzꞌibꞌul ol vacꞌ a tojoloc, xchi vin̈, axo ix alji yuneꞌ nocꞌ, nabꞌa jasquiltac stzꞌibꞌul nocꞌ yuneꞌ tzꞌalji. 9 Icha chiꞌ ix aj yicꞌjiecꞌ nocꞌ smolbꞌetzal nocꞌ vin̈ e mam chiꞌ yuj Dios, ix yacꞌan dꞌayin.

10 A junel ay jun in vayich, a ix vilani to van stajni nocꞌ. Ix vilani to a nocꞌ mam chiva ix tajni yedꞌ nocꞌ nunabꞌil chiꞌ, nabꞌa tzꞌibꞌiltac nocꞌ, ay pax nocꞌ jasquiltac stzꞌibꞌul. 11 Axo dꞌa jun in vayich chiꞌ, ix in yavtej Jun yángel Dios, ix in tacꞌvi dꞌay: Oy, ina vajecꞌ tic, xin chi dꞌay. 12 Ix yalan dꞌayin icha tic: Scham val ilani to a nocꞌ smam stajni yedꞌ nocꞌ snun, tzꞌibꞌiltac nocꞌ, jasquiltac pax stzꞌibꞌul nocꞌ, yujto ix vil masanil tas ix ach utaj yuj vin̈aj Labán. 13 A in Dios in tic, ix in chꞌox in bꞌa dꞌayach dꞌa Betel, bꞌaj ix a seccanqꞌue aceite dꞌa yibꞌan̈ qꞌuen qꞌueen ix acꞌcanqꞌue lin̈an, aton bꞌaj ix acꞌcan a tiꞌ dꞌayin. A ticnaic, actejcan jun lugar tic, tzach pax dꞌa a luum bꞌaj aljinac ach, xchi Dios dꞌayin, xchi vin̈aj Jacob chiꞌ dꞌa ebꞌ ix yetbꞌeyum chiꞌ.

14 Ix tacꞌvi ix Raquel yedꞌ ix Lea chiꞌ dꞌa vin̈ icha tic:

—A on̈ tic, man̈xo jabꞌoc tas ol quicꞌ dꞌa vin̈ co mam. 15 Yujto icha comon anima caj dꞌa vin̈. Ina ix on̈ schon̈el vin̈, ix slajanel co tojol chiꞌ vin̈, aton ix acꞌ dꞌa vin̈ yic ix quicꞌlan co bꞌa edꞌoc. 16 Dꞌa val yel masanil bꞌeyumal ix yiqꞌuecꞌ Dios dꞌa vin̈ co mam chiꞌ, quicxo yedꞌ ebꞌ cuneꞌ. Yuj chiꞌ jun, masanil tas toxo ix yal Dios dꞌayach, yicꞌocabꞌi, xchi ebꞌ ix.

17-18 Ix yacꞌan lista sbꞌa vin̈aj Jacob yic spaxta vin̈ dꞌa Canaán bꞌaj ayecꞌ cajan vin̈ smam vin̈, aton vin̈aj Isaac. Ix yacꞌanqꞌue ebꞌ yuninal vin̈ yedꞌ ebꞌ ix yetbꞌeyum vin̈ dꞌa yibꞌan̈ nocꞌ camello. Ix yicꞌancot masanil tastac vin̈, ix bꞌat vin̈ yedꞌ masanil nocꞌ nocꞌ ix yicꞌ dꞌa spatic smunlajel dꞌa Padán-aram chiꞌ. 19 Yacbꞌan aybꞌat vin̈aj Labán chiꞌ dꞌa junxo lugar joxoj calnel, axo ix Raquel ix elcꞌancot sdiosal vin̈ ayoch dꞌa yol spat. 20 An̈ejaꞌ dꞌa jun tiempoal chiꞌ ix el vin̈aj Jacob dꞌa elcꞌaltac, majxo yalcan quilcobꞌa vin̈ dꞌa vin̈aj Labán arameo chiꞌ. 21 Icha chiꞌ ix aj yicꞌancot masanil tastac vin̈. Dꞌa elan̈chamel ix ecꞌta vin̈ bꞌaj ay aꞌ nivan Éufrates, ix cotn̈ej vin̈ dꞌa yichan̈ masanto ix javi vin̈ dꞌa juntzan̈ tzalquixtac dꞌa yol yic Galaad.

22 Schabꞌjialxo scot vin̈aj Jacob chiꞌ, ix yabꞌan vin̈aj Labán to ix cot vin̈. 23 Axo vin̈aj Labán chiꞌ ix icꞌancot ebꞌ scꞌabꞌ yoc yedꞌoc, ix cot ebꞌ syam vin̈. Yicxo svacꞌjial chiꞌ ix javi ebꞌ dꞌa spatic vin̈ dꞌa juntzan̈ tzalquixtac dꞌa yol yic Galaad. 24 A dꞌa jun acꞌval chiꞌ, ix schꞌox sbꞌa Dios dꞌa vin̈aj Labán chiꞌ dꞌa svayich. Ix yalan Dios dꞌa vin̈ icha tic: Scham val a naani tas ol al dꞌa vin̈aj Jacob chiꞌ. Man̈ comonoc ol ach lolonoc, xchi dꞌa vin̈.

25 Axo dꞌa junxo cꞌu, ix yamchaj vin̈aj Jacob yuj vin̈aj Labán chiꞌ dꞌa tzalquixtac dꞌa yol yic Galaad, dꞌa scampamento vin̈. Ataꞌ ix sbꞌopax scampamento vin̈aj Labán chiꞌ yedꞌ ebꞌ vin̈ yedꞌnac chiꞌ. 26 Ix och ijan vin̈aj Labán chiꞌ yalanoch dꞌa sat vin̈aj Jacob chiꞌ icha tic:

—¿Tas ix a cꞌulej? ¿Tas yuj ix in acꞌcan musansatil? Elelalxon̈ej ix utej icꞌancot ebꞌ ix visil, ichato dꞌa scal oval ix yamchaj ebꞌ ix uuj. 27 Majxo alcan jabꞌoc dꞌayin. Man̈xo jabꞌoc ix vabꞌi, tato maay, ix am ex in taqꞌuejcot dꞌa tzalajcꞌolal, ix am och son yedꞌ yunetac tan̈bꞌil yedꞌ arpa ayic ex coti. 28 Maj in tzꞌubꞌcanelta stiꞌ ebꞌ ix visil yedꞌ ebꞌ vin̈ vi in chiquin. Ichato malaj jabꞌoc a pensar, yuj chiꞌ icha chiꞌ ix utej a bꞌa. 29 A in tic syal vacꞌan chucal dꞌayex, tato syal in cꞌool, palta a qꞌuiqꞌui dꞌacꞌval ix schꞌox sbꞌa sDiosal vin̈ a mam dꞌayin, ix yalani: Scham val a naani tas ol al dꞌa vin̈aj Jacob chiꞌ. Man̈ comonoc tzach loloni, xchi dꞌayin. 30 Tato tza te naejbꞌat bꞌaj ay vin̈ a mam, yuj chiꞌ icha chiꞌ ix a cꞌulej, palta ¿tas yuj ix elqꞌuejcot juntzan̈ in diosal? xchi vin̈aj Labán chiꞌ.

31 Ix tacꞌvi vin̈aj Jacob chiꞌ icha tic:

—Ix in el dꞌayach dꞌa elcꞌaltac yujto ix in xivi. A ix aj in naani, talaj tzacꞌ pural icꞌancanecꞌ ebꞌ ix isil tic dꞌayin. 32 Tato a junoc ebꞌ ayecꞌ dꞌa tic bꞌaj ayecꞌ a diosal chiꞌ, syaln̈ej schami. A ebꞌ ayecꞌ quedꞌoc tic syal yacꞌan testigoal ebꞌ. Say ilaꞌ, tato ay jabꞌoc a tastac ix vicꞌcoti, syal icꞌanpaxoc, xchi vin̈aj Jacob chiꞌ.

Palta man̈ yojtacoc vin̈aj Jacob chiꞌ tato a ix Raquel ix elcꞌancot sdiosal vin̈ smam chiꞌ.

33 Ix ochbꞌat vin̈aj Labán dꞌa yol smantiado vin̈aj Jacob chiꞌ, ix ochpax vin̈ dꞌa smantiado ix Lea yedꞌ dꞌa yic ebꞌ ix chavan̈ criada, palta malaj tas ix ilchaj yuj vin̈. Ix lajvi yelta vin̈ dꞌa yol smantiado ix Lea chiꞌ, ix ochxi vin̈ dꞌa yic ix Raquel. 34 Axo ix ix cꞌubꞌan el juntzan̈ yechel chiꞌ dꞌa yalan̈ stzꞌum nocꞌ camello, ix emcan cꞌojan ix dꞌa yibꞌan̈. Ix ecꞌchaj vin̈aj Labán say dꞌa masanil mantiado, palta maj ilchajlaj sdiosal vin̈ chiꞌ yuuj.

35 Ix yalan ix Raquel dꞌa vin̈ icha tic:

—Mamin, mocabꞌ cot oval dꞌayin, yujto max yal-laj in qꞌue van dꞌa ichan̈, yujto a ticnaic yaꞌay in yuj sbꞌisul uj, xchi ix, ton̈ej ix tzꞌac yal ix.

Axo vin̈aj Labán jun, ix ecꞌchaj vin̈ say sdiosal chiꞌ, palta maj ilchajlaj. 36 Yuj chiꞌ ix cot yoval vin̈aj Jacob, ix yalan vin̈:

—¿Tas val in mul ix och dꞌayach? ¿Bꞌajtil ay in mul chiꞌ yuj chiꞌ tzacꞌ val och dꞌa a cꞌool in a sayaneqꞌui? 37 Masanil in cꞌael tza say ilaꞌ, ¿tas junoc ic ix ilchaj uj ticnaic? Chꞌox dꞌa yichan̈ ebꞌ vin̈ edꞌnac tic yedꞌ dꞌa yichan̈ pax ebꞌ vin̈ vedꞌnac tic, yic vachꞌ a ebꞌ vin̈ syal yalani mach on̈ yel scalaꞌ. 38 A dꞌa 20 abꞌil ix in munlaj edꞌoc, malaj val junoc nocꞌ a calnel, malaj val junoc nocꞌ smam a chiva ix in chibꞌati, malaj val nocꞌ snun ton̈ej ix ecꞌ stiꞌ. 39 Malaj bꞌaj ix vicꞌcot jilipoc nocꞌ a calnel ix chiji yuj nocꞌ oques dꞌayach, yujto a nocꞌ satbꞌati tzin tupoch nocꞌ dꞌayach. Vachꞌchom cꞌualil ma dꞌacꞌvalil ix bꞌat nocꞌ yuj elcꞌum, ina to ix a cꞌan stojol nocꞌ dꞌayin. 40 A dꞌa cꞌualil, tzin te tzꞌa yuj cꞌacꞌ, axo dꞌacꞌvalil, tzin potzel yuj siic, max ochlaj in vayan̈ tzꞌecꞌ acꞌval. 41 20 abꞌil ix in ecꞌ edꞌoc, palta ix vacꞌn̈ej techajoc. 14 abꞌil ix in caj ebꞌ ix isil tic, axo vaquexo abꞌil jun, ix in munlaj yuj nocꞌ a molbꞌetz, aton nocꞌ ix acꞌ in tojoloc. Cotac scal ix in a qꞌuexan̈ tiej yuj in tojol. 42 Ta val man̈ ayoc och Dios vedꞌoc, aton sDiosal vin̈ in mam icham aj Abraham, aton Dios bꞌaj slesalvipax vin̈ in mam aj Isaac, val yel, malaj am jabꞌoc tas dꞌa yol in cꞌabꞌ tzin paxta. Palta a Dios ix ilan in yaelal yedꞌ tas ix aj yelcꞌoch in munlajel, yuj chiꞌ aton ix ach cachanoch vaan qꞌuiqꞌui dꞌacꞌval chiꞌ.

43 Ix yalan vin̈aj Labán dꞌa vin̈aj Jacob chiꞌ icha tic:

—Visil ebꞌ ix tic, vi in chiquin pax ebꞌ tic yedꞌ nocꞌ calnel tic, vic nocꞌ smasanil. Masanil tas ayecꞌ tic, vicoꞌ. Palta jun, ¿tasto val svutej ebꞌ ix visil yedꞌ yuneꞌ ebꞌ ix? 44 Yuj chiꞌ, cotan̈ co bꞌo junoc co trato ticnaic yic chꞌoxnabꞌil tzꞌajcan dꞌa co cal co chavan̈il, xchi vin̈aj Labán chiꞌ.

45 Ix yicꞌancot jun qꞌuen qꞌueen vin̈aj Jacob chiꞌ, ix yacꞌanqꞌue lin̈an qꞌuen vin̈ yic chꞌoxnabꞌil tzꞌaj qꞌueen. 46 Ix yalan vin̈ dꞌa masanil ebꞌ schecabꞌ icha tic:

—Molbꞌejec qꞌuen qꞌueen, xchi vin̈.

Masanil ebꞌ ix molbꞌan qꞌueen. Jun val juyan̈ ix yutej qꞌuen ebꞌ, ix va ebꞌ dꞌa stzꞌey qꞌueen. 47 Ix yacꞌanoch vin̈aj Labán chiꞌ sbꞌiej jun juyan̈ qꞌuen chiꞌ dꞌa stiꞌ ebꞌ syalaꞌ: Jegar Sahaduta^* Axo pax vin̈aj Jacob chiꞌ jun, Galaad ix yacꞌ vin̈ scuch jun qꞌuen chiꞌ dꞌa stiꞌ.

48 Ix lajvi chiꞌ ix yalan vin̈aj Labán chiꞌ icha tic:

—A ticnaic, a jun juyan̈ qꞌueen tic testigo tzꞌajcan cuj co chavan̈il, xchi vin̈. Yuj chiꞌ Galaad sbꞌi jun lugar chiꞌ. 49 Mizpa^* ix sbꞌiejpaxi yujto ix yal vin̈aj Labán chiꞌ icha tic:

—A Jehová tzon̈ ilan co chavan̈il yic man̈xo ol yal quil-lan co bꞌa junjun on̈. 50 Tato ol ixtej ebꞌ ix visil tic, mato ol a say juntzan̈ocxo ebꞌ ix ol och etbꞌeyumoc, vachꞌchom malaj mach tzꞌacꞌan testigoal, palta a Dios testigo, xchi vin̈.

51 Ix yalanpax vin̈ dꞌa vin̈aj Jacob chiꞌ:

—Ina qꞌuen bꞌul qꞌuen tic yedꞌ qꞌuen ix qꞌuecan lin̈an, aton val qꞌuen ix vacꞌcan dꞌa co cal co nan̈al co chavan̈il. 52 A val qꞌuen tic tzꞌacꞌan testigoal dꞌayon̈ to man̈xo ol yal co cꞌaxpitan jun mojon tic yic scacꞌan chucal dꞌayon̈ junjun on̈. 53 Aocabꞌ sDiosal vin̈aj Abraham a mam icham yedꞌ pax sdiosal vin̈aj Nacor in mam icham, aocabꞌ tzon̈ ilan co chavan̈il, xchi vin̈aj Labán chiꞌ.

Ix lajvi chiꞌ ix yacꞌan stiꞌ vin̈aj Jacob chiꞌ dꞌa sbꞌi Dios, aton Dios bꞌaj syaqꞌuem sbꞌa vin̈aj Isaac, vin̈ smam vin̈. 54 Ix yacꞌan juntzan̈ silabꞌ vin̈ dꞌa Dios dꞌa schon jun tzalan chiꞌ, ix yavtancot ebꞌ ajun yedꞌoc chiꞌ vael. Masanil ebꞌ ix vaꞌi, a dꞌa chon tzalan chiꞌ ix ecꞌ acꞌval yuj ebꞌ.

55 Axo yic ix sacbꞌi dꞌa junxo cꞌu, ix qꞌue vaan vin̈aj Labán chiꞌ, ix tzꞌubꞌancan stiꞌ ebꞌ yixchiquin vin̈ yedꞌ ebꞌ ix yisil vin̈, ix yalancan vachꞌ lolonel vin̈ dꞌa yibꞌan̈ ebꞌ, ix meltzaj vin̈ dꞌa spat yedꞌ ebꞌ ajun yedꞌoc.