—Acꞌ vuneꞌ. Tato maay, tic tzin chami, xchi ix.

2 Yuj chiꞌ ix cot yoval vin̈aj Jacob, ix yalan vin̈ dꞌa ix icha tic:

—¿Tocval Dios in? A Dios chiꞌ max acꞌanlaj uneꞌ chiꞌ, xchi vin̈. 3 Ix yalanxi ix dꞌa vin̈:

—Vayan̈ yedꞌ ix in criada Bilha, ayic ol aljoc yuneꞌ ix chiꞌ, icha val vuneꞌ ol ajoc, xchi ix.

4 Ix yacꞌan ix scriada ix chiꞌ dꞌa vin̈, ix yicꞌlan sbꞌa vin̈ yedꞌ ix. 5 Axo ix alji jun yuneꞌ ix Bilha chiꞌ, 6 ix yalan ix Raquel icha tic: Dan^* ol sbꞌiej vin̈ unin tic, yujto ix yabꞌ in lesal Dios, ix in schꞌolbꞌitani, yuj chiꞌ ix yacꞌ jun unin tic dꞌayin, xchi ix.

7 Ix lajvi chiꞌ, ix alji junxo yuneꞌ ix Bilha yedꞌ vin̈aj Jacob chiꞌ. 8 Ix yalanxi ix Raquel chiꞌ: A jun unin tic Neftalí^* ol sbꞌiej, yujto ix in telaj in bꞌa yedꞌ ix in nulej ix Lea, axo ticnaic ix can ix yalan̈ vuuj, xchi ix.

9 Axo yic ix yilan ix Lea to man̈xalaj yuneꞌ ix, ix yacꞌanpax ix scriada ix, aton ix Zilpa dꞌa vin̈aj Jacob chiꞌ. 10 Ix alji jun yuneꞌ ix yedꞌ vin̈. 11 —Vachꞌ vicoꞌ yuj chiꞌ Gad^* svacꞌ sbꞌiej vin̈ unin tic, xchi ix Lea chiꞌ.

12 Ix lajvi chiꞌ, ix alji junxo yuneꞌ ix Zilpa chiꞌ yedꞌ vin̈aj Jacob chiꞌ. 13 Ix yalanpax ix Lea chiꞌ icha tic: Te tzalajcꞌolal vicoꞌ, axo ebꞌ ix vetixal ol alanoc to ay in tzalajcꞌolal, yuj chiꞌ Aser^* ol sbꞌiej vin̈ unin tic, xchi ix.

14 Ay jun cꞌu ix bꞌat vin̈aj Rubén bꞌeyelecꞌ dꞌa caltac teꞌ, ayic van sjochchaj ixim trigo. Ataꞌ ix ilchaj juntzan̈ sat an̈cꞌultac yuj vin̈ to sloji, mandrágora^* sbꞌi. Ix yicꞌanbꞌat an̈ vin̈ dꞌa ix Lea, aton ix snun vin̈. Axo yic ix yilan an̈ ix Raquel chiꞌ, ix yalan ix dꞌa ix Lea icha tic:

—Tzin tevi dꞌayach to tzacꞌ junoc an̈ mandrágora ix yicꞌcot vin̈ uneꞌ chiꞌ dꞌayin, xchi ix.

15 Ix yalan ix Lea chiꞌ icha tic dꞌa ix:

—¿Tom man̈ cꞌocbꞌiloc ix iqꞌuecꞌ vin̈ vetbꞌeyum, axo ticnaic, snibꞌej a cꞌol tza cꞌanecꞌ an̈ mandrágora ix yicꞌcot vin̈ vuneꞌ tic? xchi ix.

—Acꞌ an̈ dꞌayin, tato icha chiꞌ syal svay vin̈aj Jacob edꞌoc dꞌa jun acꞌval tic, xchi ix Raquel chiꞌ.

16 Axo yic van sqꞌuicꞌbꞌi ix jax vin̈aj Jacob dꞌa smunlajel, ix bꞌat ix Lea schacot vin̈, ix yalan ix dꞌa vin̈ icha tic:

—A ticnaic ol ach vay vedꞌoc, dꞌa val yel ix vacꞌ an̈ mandrágora ix yicꞌcot vin̈ vuneꞌ dꞌa ix in nulej ix Raquel a tojoloc, xchi ix.

Yuj chiꞌ ix vay vin̈aj Jacob chiꞌ yedꞌ ix dꞌa jun acꞌval chiꞌ. 17 A Dios ix abꞌan slesal ix, yuj chiꞌ ix alji junxo yuneꞌ ix yedꞌ vin̈, yoil uninxo. 18 Ix yalan ix: Isacar^* ol sbꞌiej vin̈ unin tic, yujto ix spactzitej Dios dꞌayin, yujto ix vacꞌ ix in criada dꞌa vin̈ vetbꞌeyum, xchi ix.

19 Ix lajvi chiꞌ, ix alji junxo yuneꞌ ix yedꞌ vin̈aj Jacob chiꞌ, aton svaquil unin ebꞌ. 20 Ix yalan ix: Ix yacꞌ Dios jun silabꞌ man̈xo jantacoc svachꞌil dꞌayin, yuj chiꞌ ol in sxajanej vin̈ vetbꞌeyum tic. Svaquilxo jun unin tic svil yedꞌ vin̈, yuj chiꞌ Zabulón^* ol sbꞌiej, xchi ix. 21 Yicxo slajvubꞌal ix yilan sat jun ix unin ix, Dina ix yacꞌ ix sbꞌiej.

22 Axo ix Raquel chiꞌ, ix nachajcot ix yuj Dios, ix abꞌji slesal ix yuuj, ix javi yuneꞌ ix. 23 Ayic ix alji jun sbꞌabꞌel unin ix, ix yalan ix: A in qꞌuixvelal, toxo ix yiqꞌuel Jehová, yujto toxo ix yacꞌ jun vuneꞌ tic. 24 Tzoc val el dꞌa scꞌool syacꞌpax junocxo vuneꞌ, xchi ix. Yuj chiꞌ José^* ix sbꞌiej jun unin chiꞌ yuj ix.

25 Ayic toxo ix alji vin̈aj José, ix yalan vin̈aj Jacob dꞌa vin̈aj Labán icha tic:

—A ticnaic, cha in pax dꞌa in chon̈abꞌ. 26 Acꞌ ebꞌ vuninal yedꞌ ebꞌ ix vetbꞌeyum, cꞌocbꞌilocxobꞌ in cajan ebꞌ ix dꞌayach, smojxo val tzin paxi. Ojtac val tas ix aj in munlaj dꞌayach, xchi vin̈.

27 Axo ix yalan vin̈aj Labán chiꞌ dꞌa vin̈ icha tic:

—Maay, tzin tevi dꞌayach to vachꞌn̈ej ajecꞌ vedꞌoc, yujto ix in naeli to uujn̈ej ay svachꞌcꞌolal Jehová dꞌa vibꞌan̈. 28 Al dꞌayin jantac val tzach in tupuꞌ, xchi vin̈aj Labán chiꞌ.

29 Ix yalanxi vin̈aj Jacob chiꞌ:

—Ojtac val tas ix aj in munlaj edꞌoc yedꞌ tas ix aj vilan nocꞌ a molbꞌetzal nocꞌ tic. 30 Ojtac to jayvan̈n̈ej nocꞌ a molbꞌetzal nocꞌ tic ayic in janac, axo ticnaic toxo ix qꞌuibꞌ sbꞌisul nocꞌ. Atax val yic in janac chiꞌ syamannacoch Jehová yacꞌan svachꞌcꞌolal dꞌa ibꞌan̈. Axo ticnaic, ¿bꞌaqꞌuin̈ ol in chael yich vilan vic yedꞌ ebꞌ ix vetbꞌeyum tic yedꞌ ebꞌ vuninal? xchi vin̈.

31 —¿Jantac a tojol tza cꞌanaꞌ? xchi vin̈aj Labán chiꞌ.

—Malajocabꞌ in tojol tzacꞌaꞌ, an̈ejto svil jabꞌocxo nocꞌ a calnel tic, tato ol scha a cꞌol tas ol valaꞌ. 32 Cha in och dꞌa scal nocꞌ a calnel yedꞌ nocꞌ a chiva ticnaic, yic tzin sicꞌanel masanil nocꞌ tzꞌibꞌiltac, nocꞌ jasquiltac stzꞌibꞌul, nocꞌ yunetac qꞌuiqꞌuicꞌ. A nocꞌ chiꞌ ol och in tojoloc. 33 Yuj chiꞌ jun, ayic tzach cꞌoch il nocꞌ a nocꞌ chiꞌ, nocꞌ svicꞌ in tojoloc chiꞌ, icha chiꞌ ol aj ilancot in tojolal. Tato a dꞌa scal nocꞌ vic chiꞌ ay nocꞌ chiva, ma nocꞌ calnel chiꞌ man̈ tzꞌibꞌiltacoc, mato man̈ qꞌuiqꞌuicꞌoc, van ach velcꞌan syal chiꞌ, xchi vin̈.

34 —Vachꞌocabꞌi. Scha in cꞌol tas tzal chiꞌ, xchi vin̈aj Labán chiꞌ.

35 An̈ejtonaꞌ dꞌa jun cꞌual chiꞌ ix sicꞌanel masanil nocꞌ mam chiva tzꞌibꞌiltac vin̈aj Labán chiꞌ yedꞌ nocꞌ jasquiltac stzꞌibꞌul, nocꞌ nun chiva soman jabꞌoc saquil yedꞌ masanil nocꞌ calnel qꞌuiqꞌuicꞌ yilji, ix yacꞌan nocꞌ vin̈ dꞌa ebꞌ yuninal. 36 Ix yicꞌanbꞌat nocꞌ ebꞌ yuninal vin̈ chiꞌ dꞌa najat, oxeꞌ cꞌual stecꞌnabꞌil bꞌaj ix can vin̈aj Jacob chiꞌ. Ix cann̈ej vin̈ stan̈vej juntzan̈xo nocꞌ scalnel vin̈aj Labán chiꞌ.

37 Elan̈chamel ix sna vin̈aj Jacob chiꞌ, ix stzepel scꞌabꞌtac te teꞌ scuch álamo vin̈, teꞌ almendro yedꞌ teꞌ castaño. Tzꞌibꞌiltac ix yutej teꞌ vin̈ sjosan stzꞌumal. Ay sac yedꞌ qꞌuiqꞌuicꞌ ix aj yilji teꞌ yuj vin̈. 38-39 Ix yacꞌanoch juntzan̈ teꞌ cꞌabꞌtac teꞌ chiꞌ vin̈ dꞌa yichan̈ nocꞌ calnel chiꞌ, bꞌaj syucꞌaꞌ nocꞌ, aton taꞌ stajni nocꞌ. Dꞌa yichan̈ nocꞌ aypaxoch te teꞌ tzꞌibꞌiltac yilji chiꞌ, yuj chiꞌ ayic tzꞌaj yuneꞌ nocꞌ, tzꞌibꞌiltac yilji yuneꞌ nocꞌ chiꞌ. 40 A masanil nocꞌ tzꞌibꞌiltac tzꞌaj chiꞌ, ix sicꞌcanel nocꞌ vin̈ dꞌa scal nocꞌ yic vin̈aj Labán chiꞌ. Icha chiꞌ ix yutej vin̈ sicꞌanel nocꞌ scalnel chiꞌ dꞌa scal nocꞌ yic vin̈aj Labán chiꞌ. 41 Masanil nocꞌ te vachꞌ, ayic stajni nocꞌ, syacꞌanoch te teꞌ vin̈aj Jacob chiꞌ dꞌa yichan̈ nocꞌ bꞌaj xidꞌecꞌ nocꞌ yucꞌaꞌ, yic vachꞌ syil te teꞌ chiꞌ nocꞌ ayic stajni nocꞌ chiꞌ. 42 Axo yic sjavi nocꞌ yatac val ay, max yaqꞌuem te teꞌ chiꞌ vin̈ dꞌa yichan̈ nocꞌ. Yuj chiꞌ, a nocꞌ tzꞌontac yic vin̈aj Labán chiꞌ, axo nocꞌ vachꞌ yic vin̈aj Jacob chiꞌ. 43 Icha chiꞌ ix aj yoch vin̈aj Jacob chiꞌ bꞌeyumal. Man̈ jantacoc nocꞌ svacax vin̈, nocꞌ scalnel vin̈ yedꞌ nocꞌ schiva vin̈. Man̈ jantacoc nocꞌ scamello vin̈ yedꞌ nocꞌ sbꞌuru vin̈ yedꞌ pax ebꞌ vin̈ schecabꞌ vin̈ yedꞌ ebꞌ ix schecabꞌ vin̈.