2 Ayic ix cꞌoch vin̈ taꞌ, ix yilanbꞌat jun aꞌ ucꞌbꞌilaꞌ vin̈. A dꞌa slacꞌanil aꞌ chiꞌ, ayecꞌ ox uman̈ nocꞌ calnel, yujto a aꞌ syucꞌ nocꞌ, ay jun nivan qꞌuen ayoch smaculoc stiꞌ aꞌ. 3 Ayic smolbꞌan sbꞌa masanil nocꞌ calnel chiꞌ taꞌ, axo ebꞌ vin̈ stan̈van nocꞌ tzꞌicꞌanel qꞌuen smacul stiꞌ aꞌ chiꞌ, syacꞌan aꞌ ebꞌ vin̈ yucꞌ nocꞌ, slajvi chiꞌ smacanxican stiꞌ aꞌ ebꞌ. 4 Ix scꞌanbꞌan vin̈ dꞌa ebꞌ tan̈vum calnel chiꞌ icha tic:

—¿Bꞌajtil ayex ex vetanimail? xchi vin̈.

—A dꞌa Harán ayon̈, xchi ebꞌ vin̈.

5 —¿Eyojtac am vin̈aj Labán yixchiquin vin̈aj Nacor? xchi vin̈.

—Cojtacton vin̈, xchi ebꞌ.

6 —¿Vachꞌ am scꞌol vin̈ eyilaꞌ? xchi vin̈.

—Vachꞌ scꞌol vin̈. Ina a ix Raquel yisil vin̈ van scot yedꞌ nocꞌ scalnel chiꞌ, xchi ebꞌ vin̈.

7 Ix yalan vin̈aj Jacob chiꞌ dꞌa ebꞌ vin̈:

—Ayto cꞌu, ¿tas yuj man̈ ton̈ejoc tzeyacꞌ yucꞌaꞌ nocꞌ e calnel tic, tze tan̈van va jabꞌocxo nocꞌ? xchi vin̈ dꞌa ebꞌ vin̈.

8 Ix yalan ebꞌ vin̈:

—Max yal-laj, yovalil sco tan̈vej smolbꞌan sbꞌa nocꞌ smasanil, ichato chiꞌ ol quicꞌanel qꞌuen nivan smacul stiꞌ aꞌ tic, yic syal yucꞌan aꞌ nocꞌ smasanil, xchi ebꞌ.

9 Vanto slolon vin̈aj Jacob chiꞌ yedꞌ ebꞌ vin̈, ix ja ix Raquel yedꞌ nocꞌ yic vin̈ smam, yujto a ix stan̈van nocꞌ. 10 Ayic ix yilan vin̈ sja ix yedꞌ nocꞌ yic vin̈ smam chiꞌ, aton vin̈ snulej ix snun vin̈, elan̈chamel ix bꞌat lemnaj vin̈, ix yicꞌanel qꞌuen smacul stiꞌ a aꞌ chiꞌ vin̈, ix yacꞌan yucꞌ aꞌ nocꞌ calnel chiꞌ vin̈. 11 Dꞌa elan̈chamel ix yacꞌan stzatzil scꞌol ix Raquel chiꞌ vin̈, ix tzꞌubꞌelta stiꞌ ix vin̈, ix ocꞌqꞌue vin̈. 12 Ix och ijan vin̈ yalan icha tic: Yuneꞌ in ix Rebeca, ix yanabꞌ vin̈ a mam, xchi vin̈. Axo ix yabꞌan ix Raquel icha chiꞌ, ix bꞌat lemnaj ix yal dꞌa vin̈ smam chiꞌ.

13 Axo ix yabꞌan vin̈aj Labán sbꞌinaj vin̈aj Jacob yuneꞌ yanabꞌ, ix bꞌat lemnaj vin̈ schacot vin̈. Ix och lacꞌnaj vin̈ dꞌa vin̈, ix tzꞌubꞌanelta stiꞌ vin̈, ix yicꞌanbꞌat vin̈ vin̈ dꞌa spat chiꞌ. Ix och ijan vin̈aj Jacob chiꞌ yalani tas ix aj scoti. 14 Ix yalan vin̈aj Labán chiꞌ dꞌa vin̈ icha tic: Val yel te a on̈to och edꞌoc, xchi vin̈.

Jun ujal ix can vin̈ yedꞌ vin̈aj Labán chiꞌ. 15 Ayic ix ecꞌ jun uj chiꞌ, ix yalan vin̈aj Labán chiꞌ dꞌa vin̈ icha tic:

—A ticnaic vachꞌchom ayto cuj co bꞌa, palta max yal-laj nabꞌan̈ej ol ach munlaj dꞌayin. Al dꞌayin jantac ol ach in tupuꞌ, xchi vin̈. 16 Ay chavan̈ yisil vin̈aj Labán chiꞌ: A ix bꞌabꞌel, Lea sbꞌi ix, axo ix schabꞌil Raquel. 17 A ix Lea chiꞌ, icha yilji taxon ebꞌ ix ix yilji ix, an̈ej yol sat ix vachꞌ yilji. Axo pax ix Raquel jun, te vachꞌ yilji sat ix yedꞌ snivanil smasanil. 18 Axo vin̈aj Jacob chiꞌ, ix can sgana vin̈ dꞌa ix Raquel chiꞌ, yuj chiꞌ ix yal vin̈ icha tic:

—Tzin can uqueoc abꞌil in caj ix Raquel, ix chabꞌil isil tic, xchi vin̈.

19 Ix yalan vin̈aj Labán chiꞌ:

—Canan̈, vachꞌ ol vacꞌ ix dꞌayach, ¿tas gana chꞌoc bꞌaj svacꞌ ix? xchi vin̈.

20 Icha chiꞌ ix aj scajan uqueꞌ abꞌil ix vin̈. Maj yabꞌ vin̈ yecꞌ jun tiempoal chiꞌ, yujto te ay sgana vin̈ dꞌa ix. 21 Axo yic ix ecꞌ uqueꞌ abꞌil chiꞌ, ix yalan vin̈ dꞌa vin̈aj Labán chiꞌ icha tic:

—A ticnaic, ix lajvi co trato yic tzin caj ix. Acꞌ ix vetbꞌeyumoc yic svicꞌan in bꞌa yedꞌ ix, xchi vin̈.

22 Axo vin̈aj Labán chiꞌ ix avtancot masanil ebꞌ cajan dꞌa slacꞌanil chiꞌ, ix yacꞌanoch sqꞌuin̈al snupnajel ix yisil vin̈ chiꞌ. 23 Ayic toxo ix qꞌue acꞌval ix yicꞌancot ix Lea vin̈aj Labán dꞌa vin̈aj Jacob chiꞌ, ix vay vin̈ yedꞌ ix. 24 Ix acꞌji jun scriada ix yuj vin̈aj Labán chiꞌ, a ix chiꞌ Zilpa sbꞌi ix. 25 Ayic ix sacbꞌi, ix yilanelta vin̈aj Jacob chiꞌ to a ix Lea ix vay yedꞌ vin̈, ix bꞌat yalan vin̈ dꞌa vin̈aj Labán chiꞌ icha tic:

—¿Tas yuj icha tic ix in utej? A ix Raquel ix in caj dꞌayach, ¿tas yuj tzin ixtej? xchi vin̈.

26 Ix yalan vin̈aj Labán chiꞌ dꞌa vin̈ icha tic:

—A co bꞌeybꞌal dꞌa co cal tic, max yal-laj to a ix tzacꞌanto sbꞌabꞌlaj och vin̈ yetbꞌeyum dꞌa ix bꞌabꞌel. 27 Cꞌanabꞌajejcan jun semana sqꞌuin̈ nupnajel yic ix Lea tic, ol icꞌanpax ix Raquel chiꞌ tato tzacꞌ a tiꞌ a cajan uqueocxo abꞌil ix dꞌayin, xchi vin̈aj Labán chiꞌ.

28 Ix schaan scꞌol vin̈aj Jacob jun lolonel chiꞌ. Ix scꞌanabꞌajan jun semana qꞌuin̈ nupnajel vin̈ yedꞌ ix Lea chiꞌ. Ix lajvi chiꞌ, ix yacꞌanpax ix Raquel vin̈aj Labán chiꞌ yic tzꞌoch ix yetbꞌeyumoc vin̈. 29 Ix yacꞌanpax jun ix scriada ix Raquel chiꞌ vin̈ aton ix Bilha. 30 Ix yicꞌlan sbꞌa vin̈aj Jacob yedꞌ ix Raquel chiꞌ, yelxo val xajanabꞌil ix aj ix yuj vin̈ dꞌa yichan̈ ix Lea chiꞌ. Yuj chiꞌ uqueto abꞌil ix scaj ix vin̈.

31 Ayic ix yilan Jehová to chabꞌcꞌolabꞌil ix Lea chiꞌ, ix yacꞌan svachꞌcꞌolal dꞌa yibꞌan̈ ix yic tzꞌaj yuneꞌ ix. Axo pax ix Raquel, malaj yuneꞌ ix. 32 Axo ix Lea chiꞌ, ix och ix yabꞌixal, ix alji jun yuneꞌ ix, Rubén^* ix yacꞌ ix sbꞌiej, ix yalan ix: A Jehová ix yilaꞌ to paticabꞌil in el yuj vin̈ vetbꞌeyum, axo ticnaic xajan ol in yil vin̈, xchi ix.

33 Ix lajvi chiꞌ ix alji junxo yuneꞌ ix, Simeón^* ix yacꞌ ix sbꞌiej, ix yalan ix icha tic: Ix yabꞌ Jehová to chabꞌcꞌolabꞌil vaji, yuj chiꞌ ix yacꞌ junxo vuneꞌ tic, xchi ix.

34 Ix aljipax junxo yuneꞌ ix, Leví^* ix yacꞌ ix sbꞌiej, ix yalan ix: A ticnaic junxon̈ej ol aj vin̈ vetbꞌeyum tic vedꞌoc, yujto oxvan̈xo vuneꞌ yedꞌ vin̈, xchi ix.

35 Ix alji junxo yuneꞌ ix, Judá^* ix yacꞌ ix sbꞌiej, ix yalanpax ix: A ticnaic, svicꞌchaan̈ sbꞌi Jehová, xchi ix. Axon̈ej chiꞌ, ix och vaan yilan sat unin ix.