28
Yuj chiꞌ ix avtajcot vin̈aj Jacob yuj vin̈aj Isaac chiꞌ, ix och ijan vin̈ yalancan vachꞌ lolonel dꞌa yibꞌan̈ vin̈, ix yalancan jun checnabꞌil vin̈ dꞌa vin̈ icha tic: Malaj bꞌaqꞌuin̈ ol icꞌ junoc ix etbꞌeyum dꞌa scal ebꞌ ix aj Canaán tic. 2 A dꞌa yol yic Padán-aram dꞌa spat vin̈ a mam icham aj Betuel tzach bꞌati, tzicꞌ a bꞌa yedꞌ junoc ebꞌ ix yisil vin̈aj Labán, snulej ix a nun. 3 Axo Dios Syal Yuj Masanil, ol yacꞌ svachꞌcꞌolal dꞌa ibꞌan̈, man̈ jantacoc ol aj sbꞌisul in̈tilal. A dꞌa scal ebꞌ in̈tilal chiꞌ tzijtum nación ol pitzvoc. 4 Ol yacꞌ svachꞌcꞌolal Dios dꞌayach yedꞌ masanil ebꞌ in̈tilal icha ix aj yacꞌancan stiꞌ yacꞌan dꞌa vin̈aj Abraham vin̈ co mam, yic vachꞌ ol och jun luum bꞌaj ayon̈ ecꞌ tic icoc. A val Dios chiꞌ aljinaccan dꞌa vin̈ co mam chiꞌ, xchi vin̈aj Isaac dꞌa vin̈aj Jacob chiꞌ.5 Ix lajvi chiꞌ, ix checchajcanbꞌat vin̈aj Jacob yuj vin̈aj Isaac dꞌa Padán-aram. Ix bꞌatcan vin̈ dꞌa spat vin̈aj Labán, yuninal vin̈aj Betuel arameo, snulej ix Rebeca, ix snun vin̈ yedꞌ vin̈aj Esaú.
Ix och junxo yetbꞌeyum vin̈aj Esaú
6 Axo ix yabꞌan vin̈aj Esaú to ix yal vachꞌ lolonel vin̈aj Isaac dꞌa yibꞌan̈ vin̈aj Jacob, ix schecanpaxbꞌat vin̈ dꞌa Padán-aram yic tzꞌoch ix yetbꞌeyum vin̈ taꞌ. Ix yabꞌan vin̈ to ayic ix yalan vachꞌ lolonel vin̈aj Isaac chiꞌ dꞌa vin̈, ix yalan vin̈ to max yal yicꞌlan sbꞌa vin̈ yedꞌ ebꞌ ix aj Canaán chiꞌ. 7 Ix scꞌanabꞌajej vin̈aj Jacob sbꞌatcan dꞌa Padán-aram icha ix aj yalan vin̈ smam yedꞌ ix snun. 8 Icha chiꞌ ix aj snachajel yuj vin̈aj Esaú to a vin̈ smam vin̈ chiꞌ max scha scꞌol ebꞌ ix aj Canaán vin̈. 9 Yuj chiꞌ, ix bꞌat vin̈ yil vin̈aj Ismael aton vin̈ yucꞌtac vin̈ smam vin̈ chiꞌ. Ix yicꞌan jun ix yisil vin̈aj Ismael chiꞌ vin̈, Mahalat sbꞌi ix, ix och ix yetbꞌeyumoc vin̈ yedꞌ ebꞌ ix aytaxoneqꞌui. A ix Mahalat chiꞌ ay jun vin̈ snulej ix scuchan Nebaiot.
Ix schꞌox sbꞌa Dios dꞌa vin̈aj Jacob
10 Ayic ix el vin̈aj Jacob dꞌa Beerseba, ix bꞌat vin̈ dꞌa sbꞌeal Harán. 11 Ix cꞌoch vin̈ dꞌa jun lugar, yujto toxo ix em cꞌu, yuj chiꞌ ataꞌ ix vaycan vin̈ dꞌa jun acꞌval chiꞌ. Ayic toxo svay vin̈, ix yicꞌancot jun qꞌueen vin̈ scꞌan̈ jolomoc, ix ecꞌ jichan vin̈. 12 A dꞌa jun acꞌval chiꞌ, ix och jun svayich vin̈, ix yilan vin̈ to ay jun bꞌe icha cꞌooch. Schaqꞌue dꞌa sat lum tic, masanto sqꞌuecꞌoch dꞌa satchaan̈. Ix yilan vin̈ to a ebꞌ yángel Dios sqꞌuei, tzꞌemta ebꞌ dꞌa jun bꞌe chiꞌ. 13 Ix yilanpax vin̈ to a Jehová lin̈anecꞌ bꞌaj sqꞌuecꞌoch jun bꞌe chiꞌ, ix yalan icha tic: A in ton Jehová sDiosal in vin̈ a mam icham aj Abraham yedꞌ vin̈aj Isaac a mam. Ol vacꞌ jun lum bꞌaj jichan ach ecꞌ tic dꞌayach yedꞌ dꞌa masanil ebꞌ in̈tilal. 14 A in̈tilal chiꞌ man̈ jantacoc ol aj sbꞌisul icha spococal lum luum. Ol pucaxcanbꞌat ebꞌ dꞌa stojolal bꞌaj sjavi cꞌu yedꞌ bꞌaj tzꞌem cꞌu, dꞌa stojolal norte yedꞌ dꞌa sur. Masanil nación dꞌa yolyibꞌan̈qꞌuinal tic, ol scha svachꞌilal ebꞌ uuj yedꞌ pax yuj in̈tilal. 15 Ayinn̈ej och edꞌoc, ol ach in tan̈vejn̈ej bꞌaj ol ach bꞌatoc, ol ach vicꞌan meltzaj dꞌa jun lum tic junelxo. Man̈ ol ach vactejcanlaj, palta ol vaqꞌuelcꞌoch bꞌaj ix vacꞌ in tiꞌ dꞌayach, xchi.
16 Ayic ix el svayan̈ vin̈, ix snaan vin̈ icha tic: Dꞌa val yel ayecꞌ Jehová dꞌa jun lugar tic, man̈ vojtacoclaj, xchi vin̈. 17 Ix xiv chaan̈ vin̈, ix snaan vin̈: Te ay smay jun lugar tic, spat Dios yaji, spuertail pax satchan̈ yaji, xchi vin̈.
18 Ayic ix sacbꞌi dꞌa junxo cꞌu, ix pet qꞌue vaan vin̈, ix yicꞌancot qꞌuen qꞌueen ix yacꞌoch vin̈ scꞌan̈ jolomoc chi, ix yacꞌancanqꞌue lin̈an qꞌuen vin̈, ix can qꞌuen yecheloc, ix secanqꞌue aceite vin̈ dꞌa yibꞌan̈ qꞌueen. 19 A dꞌa jun lugar chiꞌ, ataꞌ ay jun chon̈abꞌ yictax pecaꞌ, Luz sbꞌi, axo vin̈aj Jacob ix qꞌuexan sbꞌi, ix yacꞌan vin̈ scuch Betel.*
20 Ataꞌ ix yacꞌcan stiꞌ vin̈aj Jacob, ix yalan vin̈ icha tic: Tato a Dios ol in tan̈vanoc, ol ochn̈ej vedꞌoc bꞌaj van in bꞌat tic, ol yacꞌn̈ej in vael yedꞌ in pichul, 21 vachꞌ in cꞌool ayic ol in meltzajpaxcot dꞌa spat in mam, tato icha chiꞌ a Jehová tic ol och in Diosaloc. 22 A bꞌaj ix vavejcan qꞌuen qꞌueen tic, icha spat Dios tzꞌajcani, ol viqꞌuel sdiezmoal masanil tas ol yacꞌ dꞌayin, ol vacꞌan dꞌay, xchi vin̈aj Jacob chiꞌ.