—Ach vuninal, xchi vin̈.

—¿Tas xchi mamin? xchi vin̈aj Esaú chiꞌ.

2 —Tic val tzilaꞌ te icham vinac inxo. Man̈ vojtacoc, qꞌuinaloc sja lemnaj in chamel qꞌuicꞌan chabꞌej. 3 Yuj chiꞌ tzin nibꞌej tzach bꞌat a say junoc nocꞌ dꞌa caltac teꞌ yic tzicꞌcot in chiꞌa. Icꞌbꞌat a jul-labꞌ yic tza jul junoc vicoꞌ. 4 Tza bꞌoan junoc in vael te vachꞌ, icha val in gana. Ayic toxo ix bꞌoi, tzicꞌancot dꞌayin. Yacbꞌan tzin vaꞌi, ol valancan vachꞌ lolonel dꞌa ibꞌan̈ yacbꞌan manto in chamoc, xchi vin̈.

5 Axo ix Rebeca, ix yabꞌ ix tas ix yal vin̈ dꞌa vin̈aj Esaú chiꞌ, yuj chiꞌ ayic toxo ix bꞌat vin̈aj Esaú chiꞌ dꞌa caltac teꞌ say schibꞌej smam chiꞌ, 6 ix yalan ix dꞌa vin̈aj Jacob, vin̈ schabꞌil yuneꞌ ix:

—A ticnaic ach vuneꞌ, ix vabꞌ val yalan vin̈ a mam dꞌa vin̈ ucꞌtac aj Esaú icha tic: 7 Ixic say junoc cꞌultaquil nocꞌ in chiꞌa, tza bꞌoan junoc in vael, te vachꞌ tzutej. Yacbꞌan tzin vaꞌi ol vacꞌancan yaxilal dꞌayach, ol valancan vachꞌ lolonel dꞌa ibꞌan̈ dꞌa yichan̈ Jehová yacbꞌan manto in chamoc, xchi vin̈ a mam chiꞌ dꞌa vin̈. 8 Yuj chiꞌ ach vuneꞌ, cꞌanabꞌajej val tas ol val tic. 9 Ixic bꞌaj ay nocꞌ calnel, tzicꞌancot chavan̈oc nocꞌ yunetac chiva te vachꞌ, ol in bꞌoan junoc svael vin̈ a mam chiꞌ, te vachꞌ ol vutej icha val tas snibꞌej vin̈. 10 A achxo ol icꞌbꞌat dꞌa vin̈. Ayic van sva vin̈, ol yalancan vachꞌ lolonel vin̈ dꞌa ibꞌan̈ yacbꞌan manto cham vin̈, xchi ix.

11 Ix yalan vin̈aj Jacob dꞌa ix snun chiꞌ:

—A vin̈ vucꞌtac chiꞌ, ay xil snivanil vin̈, palta a in tic malaj in xiil. 12 Qꞌuinaloc ol in smaslej vin̈ in mam chiꞌ, ol nachajel yuj vin̈, ol snaan vin̈ to ton̈ej svixtej vin̈, axo catabꞌ ol cotcan dꞌa vibꞌan̈, man̈xooc yaxilal ol vicꞌcani, xchi vin̈.

13 Ix tacꞌvi ix snun vin̈ chiꞌ icha tic:

—Maay ach vuneꞌ, tato ay catabꞌ syalcan vin̈, aocabꞌ dꞌa vibꞌan̈ scotcani. A ticnaic, an̈ej to tza cꞌanabꞌajej tas svalaꞌ. Ixic, icꞌcot chavan̈oc nocꞌ yunetac chiva chiꞌ, xchi ix.

14 Ix bꞌat vin̈aj Jacob chiꞌ yicꞌcot nocꞌ yunetac chiva chiꞌ, ix yacꞌan nocꞌ vin̈ dꞌa ix snun chiꞌ. Vachꞌ ix aj jun vael chiꞌ yuj ix, icha val snibꞌej vin̈aj Isaac chiꞌ. 15 Ix lajvi chiꞌ, ix yicꞌanelta spichul vin̈aj Esaú chiꞌ ix, vin̈ sbꞌabꞌel yuneꞌ ix, juntzan̈ pichul te vachꞌ, sicꞌbꞌilbꞌat bꞌaj ay smantiado, ix yacꞌanoch ix dꞌa vin̈aj Jacob vin̈ schabꞌil unin chiꞌ. 16 Axo dꞌa stzꞌumal nocꞌ chiva chiꞌ ix spich scꞌabꞌ vin̈ ix yedꞌ sjaj vin̈ bꞌaj malaj xiil. 17 Ix yacꞌan ixim pan ix yedꞌ vael ix sbꞌo chiꞌ, ix yicꞌanbꞌat vin̈.

18 Axo ix ochbꞌat vin̈ bꞌaj ayecꞌ vin̈ smam chiꞌ, ix yalan vin̈ icha tic:

—Mamin, xchi vin̈.

—Oy, ¿mach ach ach vuninal? xchi vin̈aj Isaac chiꞌ.

19 —A in Esaú in, a bꞌabꞌel unin in. Toxo ix in bꞌo a vael icha ix al dꞌayin. Qꞌuean̈ cꞌojan, vaꞌan̈. Abꞌlej val jabꞌoc nocꞌ cꞌultaquil nocꞌ ix bꞌat in jul tic, tzalancan vachꞌ lolonel dꞌa vibꞌan̈, xchi vin̈.

20 Ix scꞌanbꞌan vin̈aj Isaac chiꞌ dꞌa vin̈ icha tic:

—¿Tas val ix utej yamchaj nocꞌ dꞌa elan̈chamel, ach vuninal? xchi vin̈.

—A Jehová co Diosal ix och vedꞌoc, yuj chiꞌ dꞌa elan̈chamel ix ilchaj nocꞌ vuuj, xchi vin̈.

21 Ix yalanpax vin̈aj Isaac chiꞌ dꞌa vin̈ icha tic:

—Nitzcot a bꞌa dꞌa in tzꞌey, ol ach in maslej, ta yel a ach ach vuninal Esaú, xchi vin̈.

22 Ix snitzanoch sbꞌa vin̈ dꞌa stzꞌey vin̈ smam chiꞌ, ix och ijan vin̈ smaslan vin̈ tato ay xiil vin̈. Ix lajvi chiꞌ, ix yalan vin̈ smam vin̈ chiꞌ icha tic: Icha val yoch sjaj vin̈aj Jacob svabꞌi, an̈ej jun to ay xil a cꞌabꞌ svabꞌi icha val yic vin̈aj Esaú, xchi vin̈. 23 Maj nachajel-laj yuj vin̈ smam vin̈ chiꞌ, yujto ay xiil scꞌabꞌ vin̈ icha val yic vin̈aj Esaú chiꞌ, yuj chiꞌ ix yalancan vachꞌ lolonel vin̈ dꞌa yibꞌan̈ vin̈. 24 Ix scꞌanbꞌanxi vin̈aj Isaac chiꞌ icha tic:

—¿Yel am val a ach, ach vuninal Esaú? xchi vin̈.

—Iꞌ, a in ton Esaú in, xchi vin̈aj Jacob chiꞌ.

25 —Ach vuninal, icꞌcot in vael chiꞌ an, yacbꞌan tzin chi nocꞌ cꞌultaquil nocꞌ xidꞌ icꞌcot chiꞌ, ol valancan vachꞌ lolonel dꞌa ibꞌan̈, xchi vin̈.

Ix yacꞌan vin̈aj Jacob svael vin̈ smam chiꞌ, ix yicꞌanpaxcot vino vin̈, ix yucꞌan vin̈ smam vin̈ chiꞌ. 26 Ix yalan vin̈aj Isaac chiꞌ icha tic:

—Nitzcot a bꞌa dꞌa in tzꞌey ach vuninal, tza tzꞌubꞌanelta in tiꞌ, xchi vin̈. 27 Ix snitzanbꞌat sbꞌa vin̈aj Jacob chiꞌ, ix tzꞌubꞌanelta stiꞌ vin̈ smam vin̈ chiꞌ. Ix sucꞌlan spichul vin̈ vin̈aj Isaac chiꞌ, ix yalan vachꞌ lolonel chiꞌ vin̈ dꞌa yibꞌan̈ vin̈ icha tic:

30 Axo yic ix lajvi yalancan masanil vachꞌ lolonel chiꞌ vin̈ dꞌa yibꞌan̈ vin̈aj Jacob chiꞌ, ato val yelta vin̈ chiꞌ bꞌaj ayecꞌ vin̈ smam chiꞌ, ix jax vin̈aj Esaú chiꞌ juloj nocꞌ chiꞌ. 31 Ix sbꞌoan jun vael vin̈ te vachꞌ. Ix lajvi chiꞌ ix yicꞌanpaxbꞌat vin̈ dꞌa vin̈ smam chiꞌ, ix yalan vin̈ icha tic:

—Qꞌuean̈ vaan mamin, tic in javi. Chiꞌ nocꞌ cꞌultaquil nocꞌ ix bꞌat vicꞌcot tic, tzalancan vachꞌ lolonel chiꞌ dꞌa vibꞌan̈, xchi vin̈ dꞌa vin̈ smam chiꞌ.

32 Axo ix scꞌanbꞌan vin̈aj Isaac chiꞌ icha tic:

—¿Mach ach? xchi vin̈.

—A in ton Esaú in, a bꞌabꞌel unin in, xchi vin̈.

33 Ix te sat scꞌol vin̈aj Isaac chiꞌ, ix och ijan vin̈ slucloni, ix yalan vin̈ icha tic:

—¿Mach pax jun vin̈ ix bꞌat icꞌancot nocꞌ dꞌa sbꞌabꞌelal jun, ix yicꞌancot jun vael chiꞌ dꞌayin? Toxo ix in vaꞌi, ayic manto ach ja ach tic, yuj chiꞌ toxo ix valcan in vachꞌ lolonel dꞌa yibꞌan̈ vin̈ chiꞌ. Toxonton a vin̈ ol chaan in vachꞌcꞌolal chiꞌ, xchi vin̈.

34 Ayic ix yabꞌan vin̈aj Esaú tas ix yal vin̈ smam chiꞌ, ix el veqꞌuecꞌoc yav vin̈ yoqꞌui, ix yalan vin̈ icha tic:

—Alpax vachꞌ lolonel dꞌa vibꞌan̈ mamin, xchi vin̈.

35 Ix yalan vin̈aj Isaac chiꞌ icha tic:

—A vin̈ ucꞌtac ix ul in ixtanoc, toxo ix yicꞌbꞌat masanil vachꞌ lolonel vin̈ ictaxon yaji, xchi vin̈.

Axo ix tacꞌvi vin̈aj Esaú chiꞌ:

36 Te vachꞌ val ochnaccan Jacob dꞌa vin̈. Schaelalxo in yixtan vin̈ tic. Dꞌa sbꞌabꞌelal ix yiqꞌuecꞌ in derecho vin̈ dꞌa yic in bꞌabꞌel uninal, axo pax ticnaic syicꞌanpaxecꞌ yaxilal vin̈ to victaxon yaj uuj. Mamin, ¿man̈xom val junocxo yaxil ix a cꞌubꞌejcan dꞌayin? xchi vin̈.

37 Ix yalan vin̈aj Isaac chiꞌ dꞌa vin̈:

—Ina ix vacꞌ yopisio vin̈aj Jacob dꞌa ibꞌan̈, masanil ebꞌ in̈tilal ol ochcan schecabꞌoc vin̈. An̈ejaꞌ toxo ix valcani to te vachꞌ ol yacꞌ ixim strigo vin̈ yedꞌ svino. Man̈xalaj tas vachꞌ ach vutan ach vuninal, xchi vin̈.

38 Ix tevin̈ejoch vin̈aj Esaú chiꞌ icha tic:

—Mamin, ¿man̈xom val junoc vachꞌ lolonel syal alancan dꞌa vibꞌan̈ jun? Alcan junocxo a vachꞌ lolonel dꞌayin, xchi vin̈.

Ix elxi veqꞌuecꞌoc yav vin̈ yoqꞌui.

39 Yuj chiꞌ ix yalan vin̈aj Isaac chiꞌ dꞌa vin̈ icha tic:

41 Atax taꞌ ix chichoncanoch scꞌool vin̈aj Esaú dꞌa vin̈aj Jacob chiꞌ yuj tas ix alchajcan dꞌa yibꞌan̈ vin̈ yuj smam chiꞌ. Yuj chiꞌ ix snaan vin̈aj Esaú chiꞌ icha tic: Toxo ol cham vin̈ in mam tic, ol lajvoc chiꞌ ol in milancham jun vucꞌtac chiꞌ, xchi vin̈.

42 Axo yic ix yabꞌan ix Rebeca tas van yalan vin̈aj Esaú chiꞌ, ix yavtancot vin̈aj Jacob chiꞌ ix, ix yalan ix dꞌa vin̈ icha tic:

—Ach vuneꞌ, a vin̈aj Esaú vin̈ ucꞌtac, sgana vin̈ ol ach smilchamoc yic syaqꞌuecꞌ spac vin̈ dꞌayach. 43 Yuj val chiꞌ, abꞌ val tas svalaꞌ: Elan̈ dꞌa tic, tzach bꞌatcan dꞌa Harán, tzach aj yedꞌ vin̈aj Labán vin̈ in nulej. 44 Tzach cann̈ej yedꞌ vin̈ junoc tiempoal masanto tzꞌecꞌ yoval scꞌool vin̈ ucꞌtac tic. 45 Axo yic ol sat dꞌa scꞌol vin̈, ol valanbꞌat abꞌi, ichato chiꞌ ol ach paxta. Max yal in cꞌool to junn̈ej cꞌual tzex cham e chavan̈il, xchi ix.

46 Ix lajvi chiꞌ, ix yalan ix Rebeca dꞌa vin̈aj Isaac icha tic:

—Tzin te cus yuj ebꞌ ix hitita, ebꞌ ix yetbꞌeyum vin̈aj Esaú tic. Yuj chiꞌ tato syicꞌlaj sbꞌa vin̈aj Jacob tic yedꞌ junoc ebꞌ ix hitita cajan dꞌa Canaán tic, vachꞌ ama tato tzin chami, xchi ix.