Ix bꞌatcan vin̈aj Isaac dꞌa yol yic Gerar
26
A dꞌa junel ix ja jun nivan vejel dꞌa jun lugar chiꞌ, icha jun yacꞌnac dꞌa yol stiempoal vin̈aj Abraham. Yuj chiꞌ ix bꞌatcan vin̈aj Isaac dꞌa yol yic Gerar, bꞌaj ayecꞌ vin̈aj Abimelec sreyal ebꞌ filisteo. 2 Ataꞌ ix schꞌox sbꞌa Jehová dꞌa vin̈, ix yalani: Man̈ ach bꞌat dꞌa Egipto, canan̈ bꞌaj sval dꞌayach. 3 A ticnaic, vachꞌ ajecꞌ dꞌa jun lugar tic, ayinn̈ej ecꞌ edꞌoc, ol in chꞌoxn̈ej in vachꞌcꞌolal dꞌayach, yujto a jun lum tic ol vacꞌ dꞌayach smasanil yedꞌ dꞌa masanil in̈tilal, yic vachꞌ tzꞌelcꞌoch masanil tas valnaccan dꞌa vin̈ a mam aj Abraham. 4 Man̈ jantacoc ol vutej ebꞌ in̈tilal, icha sbꞌisul qꞌuen cꞌanal dꞌa satchaan̈ icha chiꞌ ol aj ebꞌ. Ol vacꞌan jun luum tic smasanil dꞌa ebꞌ. Yujn̈ej in̈tilal chiꞌ ol scha in vachꞌcꞌolal masanil nación, 5 yujto a vin̈ a mam aj Abraham chiꞌ, scꞌanabꞌajejnac vin̈ tas valnac. Masanil in checnabꞌil, in ley yedꞌ in cꞌaybꞌubꞌal vacꞌnac dꞌa vin̈, scꞌanabꞌajejnac vin̈, xchi Jehová dꞌa vin̈.6 Yuj chiꞌ ix cann̈ej vin̈aj Isaac chiꞌ dꞌa Gerar chiꞌ. 7 Axo yic ix scꞌanbꞌan ebꞌ vin̈ aj lugar chiꞌ yuj ix yetbꞌeyum vin̈, ix yal vin̈ to yanabꞌ ix vin̈. Ix xiv vin̈ yalani tato yetbꞌeyum ix vin̈, yujto ix snaꞌ vin̈ ta icha chiꞌ smiljicham vin̈ yuj ebꞌ, syicꞌanecꞌ ix ebꞌ, yujto a ix Rebeca chiꞌ te vachꞌ yilji ix.
8 Ataꞌ ix ecꞌ tiempo yuj ebꞌ. Ay jun cꞌual ix yilelta vin̈ rey chiꞌ dꞌa yol jun ventena to chelcheloch vin̈aj Isaac chiꞌ dꞌa ix Rebeca ix yetbꞌeyum chiꞌ. 9 Ix bꞌat checjicot vin̈ yuj vin̈ rey chiꞌ, ix yalan vin̈ dꞌa vin̈:
—Toxo ix vilaꞌ to etbꞌeyum ix ix tic, ¿icham chiꞌ, ma to maay? ¿Tas yuj ix alaꞌ to anabꞌ ix? xchi vin̈.
Ix yalan vin̈aj Isaac chiꞌ:
—Ix in naꞌ qꞌuinaloc tzin smilcham ebꞌ aj chon̈abꞌ tic yuj ix, xchi vin̈.
10 Ix yalan vin̈ rey chiꞌ:
—¿Tas yuj icha chiꞌ ix a cꞌulej? Jabꞌxon̈ej maj on̈ acꞌbꞌat dꞌa yol scꞌabꞌ chucal. Qꞌuinaloc ay junoc vin̈ ix vay yedꞌ ix, uujn̈ej am val tzꞌoch co mul, xchi vin̈.
11 Yuj chiꞌ, ix yalan vin̈ rey chiꞌ dꞌa masanil chon̈abꞌ:
—Tato ay junoc mach stzuntzan jun vin̈ vinac tic, ma ix yetbꞌeyum vin̈, ol miljocchamoc, xchi vin̈.
12 Dꞌa jun abꞌil chiꞌ ix avvi trigo vin̈aj Isaac dꞌa jun lugar chiꞌ. Lajun̈eꞌ quintal trigo ix yicꞌ vin̈ dꞌa junjun almul in̈at, yujto ix yacꞌ val svachꞌcꞌolal Jehová dꞌa yibꞌan̈ vin̈. 13 Yuj chiꞌ man̈ jantacoc ix aj sbꞌeyumal vin̈. Man̈ jantacoc tas ix yicꞌ vin̈. 14 Ix te aj nocꞌ scalnel vin̈, nocꞌ svacax vin̈ yedꞌ schecabꞌ vin̈. Yuj val chiꞌ ix te chichon scꞌol ebꞌ vin̈ filisteo chiꞌ dꞌa vin̈. 15 Ayic pitzanto vin̈aj Abraham smam vin̈aj Isaac chiꞌ, ix sjoyancan juntzan̈ ucꞌbꞌilaꞌ ebꞌ schecabꞌ vin̈ bꞌaj syucꞌaꞌ nocꞌ smolbꞌetzal nocꞌ chiꞌ. Axo ebꞌ vin̈ filisteo chiꞌ ix bꞌudꞌanxi juntzan̈ ucꞌbꞌilaꞌ chiꞌ. 16 Ix yalan vin̈ rey chiꞌ dꞌa vin̈aj Isaac chiꞌ:
—Elan̈ dꞌa tic, yujto ix a te iqꞌuej ipoc dꞌa quibꞌan̈, xchi vin̈.
17 Ix lajvi chiꞌ, ix bꞌat vin̈aj Isaac chiꞌ, ix cꞌoch cajan vin̈ dꞌa schꞌolanil yic Gerar. Ataꞌ ix cajnaj vin̈. 18 Ix sjoyanxi juntzan̈ aꞌ ucꞌbꞌilaꞌ chiꞌ vin̈, aꞌ bꞌobꞌilcan yuj vin̈ smam vin̈ chiꞌ, aton juntzan̈ aꞌ ix smuc ebꞌ vin̈ filisteo ayic toxo ix cham vin̈ smam vin̈ chiꞌ. A sbꞌi aꞌ aycanoch yuj vin̈ smam vin̈ chiꞌ, an̈ejaꞌ ix yacꞌcanoch vin̈ sbꞌioc aꞌ. 19 Ay jun cꞌual, a ebꞌ vin̈ schecabꞌ vin̈aj Isaac chiꞌ, ipan sjoyan jun aꞌ ucꞌbꞌilaꞌ ebꞌ vin̈ dꞌa acꞌlic chiꞌ, axo ix aji, ix ilchaj jun sjaj aꞌ yuj ebꞌ vin̈. 20 Axo juntzan̈xo ebꞌ vin̈ tan̈vum calnel aj Gerar chiꞌ, ix yal ebꞌ vin̈ to yic jun aꞌ chiꞌ ebꞌ vin̈, yuj chiꞌ ix yacꞌ oval ebꞌ vin̈ yedꞌ ebꞌ vin̈ stan̈vumal scalnel vin̈aj Isaac chiꞌ. Yuj chiꞌ ix yacꞌ sbꞌiej jun aꞌ chiꞌ vin̈aj Isaac Chaclajbꞌail, yujto ix schaclaj sbꞌa ebꞌ vin̈ yuj aꞌ. 21 Ix lajvi chiꞌ, ix sjoyan junxo aꞌ ebꞌ vin̈ schecabꞌ vin̈aj Isaac chiꞌ. An̈ejaꞌ ix schaclajxi sbꞌa ebꞌ vin̈ yuj aꞌ. Yuj chiꞌ Ajcꞌolal ix sbꞌiejcan aꞌ yuj vin̈aj Isaac chiꞌ.
22 Ichato chiꞌ ix bꞌat cajnaj vin̈aj Isaac chiꞌ dꞌa najat. Ataꞌ ix sjoyxi junxo aꞌ ucꞌbꞌilaꞌ vin̈, palta man̈xalaj oval yuj aꞌ, yuj chiꞌ Bꞌecan ix sbꞌiejcan aꞌ yuj vin̈. Bꞌecan on̈ yuj Jehová yic tzon̈ qꞌuibꞌchaan̈ dꞌa lum tic, xchi vin̈.
23 Ix lajvi yel vin̈aj Isaac chiꞌ taꞌ, ix cꞌoch vin̈ dꞌa Beerseba. 24 A dꞌa jun acꞌval chiꞌ, ix schꞌox sbꞌa Jehová dꞌa vin̈, ix yalani:
A in sDiosal in vin̈ a mam aj Abraham. Man ach xivoc, ayin och edꞌoc. Yujn̈ej to in checabꞌ vin̈aj Abraham chiꞌ, yuj chiꞌ ol vacꞌ in vachꞌcꞌolal dꞌa ibꞌan̈, man̈ jantacoc ol aj vicꞌanchaan̈ sbꞌisul in̈tilal, xchi dꞌa vin̈.
25 Ataꞌ ix sbꞌo jun altar vin̈aj Isaac chiꞌ, yic syal sbꞌa vin̈ dꞌa Jehová, axo scajnajcan vin̈ chiꞌ taꞌ. Axo ebꞌ schecabꞌ vin̈ ix joyan junxo aꞌ ucꞌbꞌilaꞌ chiꞌ.
Strato vin̈aj Isaac yedꞌ vin̈aj rey Abimelec
26 Ay jun cꞌual ix cot vin̈aj rey Abimelec dꞌa Gerar, ajun jun vin̈ yamigo vin̈ scuch Ahuzat yedꞌnac. Ajun pax vin̈aj Ficol yajal ebꞌ soldado vin̈ yedꞌnac. Ix ulecꞌ vin̈ lolonel yedꞌ vin̈aj Isaac chiꞌ. 27 Ix yalan vin̈aj Isaac chiꞌ dꞌa ebꞌ vin̈:
—A ex tic, malaj tzin och eyuuj, ix in e pechel dꞌa sat e luum chiꞌ, ¿tasto yuj tzul in eyilaꞌ? xchi vin̈ dꞌa ebꞌ vin̈.
28 Ix tacꞌvi ebꞌ vin̈ dꞌa vin̈:
—Toxo ix quilaꞌ to ayoch Jehová edꞌoc, yuj chiꞌ ix co naꞌ to smoj sco bꞌo junoc co trato edꞌoc. A jun trato ol co bꞌo chiꞌ, aton jun tic: 29 Malajocabꞌ bꞌaqꞌuin̈ tzon̈ ixtej, yujto a on̈ tic, maj cacꞌ chucal dꞌayach, a tas ix aji, to xajan ach cuuj, dꞌa juncꞌolalil ix ach co chequeli. Squilaꞌ to ayn̈ej svachꞌcꞌolal Jehová dꞌa ibꞌan̈, xchi ebꞌ.
30 Ayic ix lajvi slolon ebꞌ, ix sbꞌoan jun nivan vael vin̈aj Isaac chiꞌ, ix va ebꞌ dꞌa tzalajcꞌolal. 31 A dꞌa junxo cꞌu, ix qꞌue van ebꞌ dꞌa qꞌuin̈ibꞌalil, ix yacꞌlancan stiꞌ ebꞌ dꞌay junjun. Ix lajvi chiꞌ ix stacꞌlancan sbꞌa ebꞌ dꞌa juncꞌolal, ix paxbꞌat ebꞌ dꞌa slugar.
32 Axo dꞌa jun cꞌu chiꞌ, ix ja ebꞌ schecabꞌ vin̈aj Isaac chiꞌ, ix ul yalan ebꞌ dꞌa vin̈ to a dꞌa jun jul joybꞌilcan yuj ebꞌ vin̈, ayxo a aꞌ dꞌa yool. 33 Yuj chiꞌ Seba ix sbꞌiejcan jun aꞌ ucꞌbꞌilaꞌ chiꞌ yuj vin̈aj Isaac chiꞌ, yuj chiꞌ a jun chon̈abꞌ ay chiꞌ taꞌ an̈ejaꞌ scuch Beerseba.