Ebꞌ yuninal vin̈aj Abraham yedꞌ ix Cetura
25
Ixto yicꞌ junxo ix yetbꞌeyum vin̈aj Abraham chiꞌ scuchan Cetura. 2 A ebꞌ yuninal vin̈ ix alji yedꞌ ix, aton vin̈aj Zimram, vin̈aj Jocsán, vin̈aj Medán, vin̈aj Madián, vin̈aj Isbac yedꞌ vin̈aj Súa. 3 A vin̈aj Jocsán smam vin̈aj Seba yedꞌ vin̈aj Dedán. A pax ebꞌ yin̈tilal vin̈aj Dedán jun, aton ebꞌ asureo, ebꞌ letuseo yedꞌ ebꞌ leumeo. 4 Axo pax ebꞌ yuninal vin̈aj Madián chiꞌ, aton vin̈aj Efa, vin̈aj Efer, vin̈aj Hanoc, vin̈aj Abida yedꞌ vin̈aj Elda. Masanil juntzan̈ ebꞌ tic yin̈tilal vin̈aj Abraham chiꞌ yedꞌ ix Cetura. 5 Ix yacꞌ vin̈ masanil tas ay dꞌay smacbꞌenoc vin̈aj Isaac. 6 Axo pax yuneꞌ juntzan̈xo ebꞌ ix chiꞌ jun, axon̈ej silabꞌ ix acꞌchaj dꞌa ebꞌ yuj vin̈. Ayic pitzanto vin̈, ix och ijan vin̈ schecancanel ebꞌ vin̈ chiꞌ vin̈ dꞌa stzꞌey vin̈aj Isaac chiꞌ. Ix checjibꞌat ebꞌ vin̈ dꞌa stojolal bꞌaj sjavi cꞌu.A schamel vin̈aj Abraham
7 A vin̈aj Abraham chiꞌ, 175 abꞌil sqꞌuinal vin̈ ayic ix cham vin̈. 8 Ichamilxo ix icꞌan scham vin̈. 9 A ebꞌ yuninal vin̈, aton vin̈aj Isaac yedꞌ vin̈aj Ismael xidꞌ mucan vin̈ dꞌa qꞌuen olan qꞌueen dꞌa Macpela, dꞌa slacꞌanil lum sluum vin̈aj Mamre dꞌa lum yiquejnac junel vin̈aj Efrón yuninal vin̈aj Zohar, vin̈ hitita. 10 Aton lum chiꞌ manbꞌilcan yuj vin̈aj Abraham dꞌa ebꞌ hitita. A bꞌaj mucbꞌil ix Sara, ataꞌ ix mucchaj vin̈aj Abraham chiꞌ. 11 Axo yic toxo ix cham vin̈, ix yacꞌancot svachꞌcꞌolal Dios dꞌa yibꞌan̈ vin̈aj Isaac. Ix can cajan vin̈ dꞌa slacꞌanil aꞌ ucꞌbꞌilaꞌ scuchan A Dios Pitzan Tzin Ilani.
Ebꞌ yin̈tilal vin̈aj Ismael
12 Aton yabꞌixal ebꞌ yin̈tilal vin̈aj Ismael yuninal vin̈aj Abraham yedꞌ ix Agar, ix aj Egipto, aton ix ecꞌnac criadail dꞌa ix Sara. 13 Aton stzolal tic, tas ix aj yalji ebꞌ: Vin̈aj Nebaiot, aton vin̈ bꞌabꞌel unin chiꞌ, slajvi chiꞌ vin̈aj Cedar, vin̈aj Adbeel, vin̈aj Mibsam, 14 vin̈aj Misma, vin̈aj Duma, vin̈aj Masa, 15 vin̈aj Hadar, vin̈aj Tema, vin̈aj Jetur, vin̈aj Nafis yedꞌ vin̈aj Cedma. 16 Aton sbꞌi ebꞌ lajchavan̈ yuninal vin̈aj Ismael tic. A sbꞌi ebꞌ vin̈ chiꞌ ix och sbꞌioc sluum bꞌaj ix cajnaji. Junjun ebꞌ, yajal ix ajcan ebꞌ dꞌa junjun chon̈abꞌ. 17 A vin̈aj Ismael chiꞌ, 137 abꞌil sqꞌuinal vin̈, ayic ix cham vin̈. 18 A masanil ebꞌ yin̈tilal vin̈ chiꞌ, ix cꞌochcan cajan ebꞌ dꞌa scal Havila yedꞌ Shur, dꞌa yichan̈cot lum Egipto bꞌaj sbꞌat bꞌeal Asiria. Ataꞌ ix cajnaj ebꞌ, vachꞌchom malaj sgana ebꞌ scꞌabꞌ yoc ebꞌ.
Yaljubꞌal vin̈aj Jacob yedꞌ vin̈aj Esaú
19 Aton yabꞌixal vin̈aj Isaac yuninal vin̈aj Abraham: 20 40 abꞌil sqꞌuinal vin̈aj Isaac chiꞌ ayic ix yicꞌlan sbꞌa vin̈ yedꞌ ix Rebeca yisil vin̈aj Betuel, yanabꞌ vin̈aj Labán arameo, aton vin̈ cajan dꞌa Padán-aram. 21 A ix Rebeca chiꞌ malaj yuneꞌ ix. Axo vin̈aj Isaac ix lesalvi dꞌa Jehová yic tzꞌacꞌji yuneꞌ ebꞌ yuuj. Icha chiꞌ jun, ix abꞌji slesal ebꞌ yuj Jehová, ix och ix Rebeca yabꞌixal. 22 A ebꞌ unin chiꞌ, tiox ebꞌ. Ix yacꞌ oval ebꞌ dꞌa yol scꞌool snun chiꞌ. Yuj chiꞌ ix snaꞌ ix: ¿Tas yuj sja jun tic dꞌa vibꞌan̈? xchi ix. Ix lajvi chiꞌ ix bꞌat yalan sbꞌa ix dꞌa Jehová. 23 Ix tacꞌvi Jehová chiꞌ dꞌa ix:
Chabꞌ chon̈abꞌil ol aj yin̈tilal ebꞌ chavan̈ edꞌnac chiꞌ. Yictax manto aljoc ebꞌ, ol och ebꞌ ajcꞌolal dꞌay junjun. Jun te ay yip, te tecꞌan dꞌa yichan̈ junxo. A vin̈ bꞌabꞌel, ol can vin̈ dꞌa yalan̈ smandar vin̈ tzacꞌan, xchi dꞌa ix.
24 Ix cꞌoch scꞌual yalji ebꞌ yuneꞌ ix Rebeca chiꞌ, tiox ebꞌ unin ix alji chiꞌ. 25 A vin̈ bꞌabꞌel ix alji, te chac tzeminac yilji vin̈, te ay xil snivanil vin̈, Esaú* ix yacꞌ ebꞌ sbꞌiej vin̈. 26 Tzacꞌan ix alji junxo yucꞌtac chiꞌ, yubꞌyubꞌ och dꞌa sjaj yoc vin̈aj Esaú chiꞌ, yuj chiꞌ Jacob* ix yacꞌ ebꞌ sbꞌiej. 60 abꞌil sqꞌuinal vin̈aj Isaac chiꞌ ayic ix alji ebꞌ yuneꞌ ix Rebeca chiꞌ.
Ix schon̈bꞌat sderecho vin̈aj Esaú dꞌa vin̈ yucꞌtac
27 Ix qꞌuibꞌn̈ej chavan̈ unin chiꞌ. A vin̈aj Esaú pechoj nocꞌ ix scꞌulej vin̈. An̈ej caltac teꞌ snibꞌej vin̈ tzꞌeqꞌui. Axo pax vin̈aj Jacob chiꞌ, malaj bꞌaj tzꞌecꞌ vin̈ dꞌa najat, ayn̈ejecꞌ vin̈ dꞌa scampamento. 28 Te xajan vin̈aj Esaú yuj vin̈aj Isaac chiꞌ yujto snibꞌej vin̈ schi nocꞌ cꞌultaquil nocꞌ sja yuj vin̈. Axo pax vin̈aj Jacob jun, te xajan vin̈ yuj ix Rebeca.
29 Ay jun cꞌual, van stzꞌan̈an jun vael vin̈aj Jacob chiꞌ ayic ix jax vin̈aj Esaú chiꞌ bꞌeyelecꞌ dꞌa caltac teꞌ, te ay svejel vin̈. 30 Ix yalan vin̈ dꞌa vin̈aj Jacob chiꞌ: Acꞌ val jabꞌoc jun a vael chac yilji tic dꞌayin, yujto tzin cham yuj vejel, xchi vin̈.
(Yuj chiꞌ Edom* ix acꞌji sbꞌiej vin̈.)
31 —Dꞌa sbꞌabꞌelal, acꞌcan a derecho yic bꞌabꞌel vinaquil dꞌayin, ichato chiꞌ ol vacꞌani, xchi vin̈aj Jacob chiꞌ.
32 Ix yalanxi vin̈aj Esaú chiꞌ:
—Ina van in cham yuj vejel, yilxo jun in derecho yic bꞌabꞌel vinaquil chiꞌ, ¿tas val ol och vuuj? xchi vin̈.
33 —Acꞌcan a tiꞌ dꞌayin dꞌa jun rato tic, xchi vin̈aj Jacob chiꞌ.
—Inye, xchi vin̈aj Esaú chiꞌ. Ix yacꞌan stiꞌ vin̈ yic schꞌoxaneli to syacꞌcan sderecho vin̈ yic sbꞌabꞌel vinaquil dꞌa vin̈aj Jacob chiꞌ.
34 Ix lajvi chiꞌ ix yacꞌan ixim pan yedꞌ jun plato vael vin̈aj Jacob chiꞌ dꞌa vin̈. Axo yic ix lajvi sva vin̈, ix qꞌue vaan vin̈, ix bꞌat vin̈. Malaj yelcꞌoch jun derecho yic bꞌabꞌel uninal chiꞌ dꞌa vin̈.