—Acꞌoch a cꞌabꞌ dꞌa yalan̈ in xubꞌ tic, 3 tzacꞌan a tiꞌ dꞌa yichan̈ Jehová Dios yajal satchaan̈ yedꞌ yolyibꞌan̈qꞌuinal tic, to man̈ ol a saylaj ix yetbꞌeyum vin̈ vuninal dꞌa scal ebꞌ aj Canaán, bꞌaj cajan on̈ tic, 4 palta dꞌa in chon̈abꞌ tzach bꞌati, bꞌat a say junoc ix yetbꞌeyum vin̈ dꞌa scal ebꞌ in cꞌabꞌ voc, xchi vin̈ dꞌa vin̈.

5 Ix tacꞌvi vin̈ schecabꞌ vin̈ chiꞌ:

—Qꞌuinaloc max stacꞌcot sbꞌa ix vedꞌoc, ¿tas svutej? ¿Yovalil am svicꞌbꞌat vin̈ bꞌaj cotnac ach chiꞌ? xchi vin̈ schecabꞌ chiꞌ.

6 Ix tacꞌvi vin̈aj Abraham chiꞌ:

—Maay, man̈ icꞌbꞌat vin̈. 7 A Jehová sDiosal satchan̈ ix in icꞌanelta bꞌaj ay spat in mam yedꞌ dꞌa in chon̈abꞌ bꞌaj ecꞌnac in. Ix yacꞌan stiꞌ dꞌayin yacꞌan jun lum tic dꞌa vin̈tilal. An̈ejaꞌ, aꞌ ol checanbꞌat yángel edꞌoc, yic vachꞌ tzicꞌcot ix yetbꞌeyum vin̈ vuninal tic taꞌ. 8 Palta tato max yal scꞌol ix scot edꞌoc jun, colan tzach ajcan dꞌa jun co trato scacꞌ tic. Palta juneln̈ej max yal-laj icꞌanbꞌat vin̈ vunin tic taꞌ, xchi vin̈ dꞌa vin̈.

9 Ix lajvi chiꞌ, ix yacꞌanoch scꞌabꞌ jun vin̈ checabꞌ chiꞌ dꞌa yalan̈ xubꞌ vin̈aj Abraham chiꞌ, ix yacꞌan stiꞌ vin̈ to ol scꞌanabꞌajej vin̈ masanil tas ix yal vin̈ spatrón chiꞌ. 10 Ix lajvi chiꞌ, ix sicꞌanelta juntzan̈ silabꞌ vin̈ dꞌa scal masanil tastac ay dꞌa vin̈ spatrón chiꞌ, juntzan̈ te vachꞌ. Ix yicꞌanbꞌat lajun̈van̈ nocꞌ camello vin̈ scuchumaloc, ix bꞌat vin̈ dꞌa chon̈abꞌ bꞌaj ecꞌnac vin̈aj Nacor chamnac, dꞌa yol yic Mesopotamia.

11 Ayic ix cꞌoch vin̈ checabꞌ dꞌa stiel chon̈abꞌ chiꞌ, yic vanxo sqꞌuicꞌbꞌi, ix yicꞌ yip vin̈ yedꞌ nocꞌ camello dꞌa stiꞌ jun aꞌ ucꞌbꞌilaꞌ. A dꞌa jun hora chiꞌ tzꞌecꞌ ebꞌ ix cobꞌestac yicꞌ yaal. 12 Dꞌa jun rato chiꞌ, ix och ijan vin̈ slesalvi dꞌa Dios dꞌa spixan icha tic: Mamin Jehová, ach co Diosal yedꞌ vin̈aj Abraham in patrón, tzin cꞌan dꞌayach to vachꞌocabꞌ tzꞌelcꞌoch jun in checnabꞌil tic, tza chꞌoxan a vachꞌcꞌolal dꞌa vin̈ in patrón chiꞌ. 13 Tic tzin can dꞌa stiꞌ jun aꞌ ucꞌbꞌilaꞌ tic, yacbꞌan sja ebꞌ ix cobꞌestac aj chon̈abꞌ tic ul yicꞌ yaal. 14 Elocabꞌ dꞌa a cꞌol to a junoc ix cobꞌes ol ja yicꞌ yaal, ol val dꞌa ix icha tic: Tzin tevi dꞌayach, iqꞌuemta a chꞌubꞌ chiꞌ, tzacꞌan jabꞌoc aꞌal chiꞌ vucꞌuꞌ, xin cham dꞌa ix. Axo ol yalan ix: Ucꞌ aꞌ, ol vacꞌanpax aꞌ yucꞌ nocꞌ a camello tic, xcham ix, aocabꞌ ix chiꞌ tza siqꞌueli yic tzꞌoch yetbꞌeyumoc vin̈aj Isaac a checabꞌ. Icha chiꞌ ol aj snachajel vuuj to ay a vachꞌcꞌolal dꞌa vin̈ in patrón, xchi vin̈ checabꞌ chiꞌ dꞌa slesal.

15 Manto lajvilaj slesalvi vin̈, ix yilan vin̈ scot jun ix cobꞌes, ayqꞌue schꞌubꞌ ix dꞌa sjolom sjen̈jabꞌ, aton ix Rebeca yisil vin̈aj Betuel. A vin̈aj Betuel chiꞌ yunecan vin̈ ix Milca yedꞌ vin̈aj Nacor, vin̈ yucꞌtac vin̈aj Abraham. 16 A ix Rebeca chiꞌ te vachꞌ yilji ix, cobꞌes ton val ix, mantalaj junoc vinac scꞌuman ix. Ix em ix bꞌaj ay aꞌ ucꞌbꞌilaꞌ chiꞌ yic syicꞌqꞌueta aꞌ yaal ix, ix yacꞌan bꞌudꞌjoc schꞌubꞌ ix chiꞌ. Ayic van spax ix, 17 ix bꞌat lemnaj vin̈ checabꞌ chiꞌ stzacꞌvej ix, ix yalan vin̈ dꞌa ix icha tic:

—Tzin tevi dꞌayach, acꞌ vucꞌ jabꞌoc aꞌal dꞌa yol a chꞌubꞌ chiꞌ, xchi vin̈ dꞌa ix.

18 —Uqꞌuej aꞌ mamin, xchi ix.

Elan̈chamel ix yaqꞌuem schꞌubꞌ ix chiꞌ, ix yacꞌan aꞌ ix yuqꞌuej vin̈. 19 Ix lajvi yucꞌan aꞌ vin̈, ix yalan ix icha tic:

—Syalpax vicꞌanqꞌueta aꞌ yucꞌ nocꞌ a camello tic, ato syalaꞌ jantac syucꞌ nocꞌ, xchi ix.

20 Elan̈chamel ix sequem aꞌ ix dꞌa yol jucubꞌ bꞌaj syucꞌtaxon aꞌ nocꞌ nocꞌ. Tzijtum el ix yacꞌ ix yicꞌanqꞌueta aꞌ masanto ix yucꞌ aꞌ nocꞌ smasanil. 21 Axo vin̈ checabꞌ chiꞌ jun, ton̈ej ix och qꞌuelan vin̈ dꞌa ix. Malaj tas ix yal vin̈, an̈ej to sna vin̈ yic syojtaquejeli tas van scꞌulan Jehová yic vachꞌ tzꞌelcꞌoch jun schecnabꞌil chiꞌ. 22 Axo ix lajvi yucꞌan aꞌ nocꞌ camello chiꞌ, ix yicꞌanqꞌueta jun qꞌuen oro vin̈ icha uchiquin, nan̈al siclo yalil, ix yacꞌanoch vin̈ dꞌa sn̈iꞌ ix, ix yacꞌanpax chabꞌ qꞌuen brazalete vin̈ dꞌa ix, nabꞌa oro qꞌueen, ecꞌbꞌal 10 siclo yalil qꞌueen. 23 Ix yalan vin̈:

—Tzin tevi dꞌayach to tzal dꞌayin mach ayach yicoꞌ, talaj colan tzon̈ vaycan dꞌa spat vin̈ a mam chiꞌ dꞌa jun acꞌval tic, xchi vin̈ dꞌa ix.

24 Ix yalan ix:

—Yisil in vin̈aj Betuel, yuninal vin̈aj Nacor yedꞌ ix Milca. 25 A dꞌa co pat colan tzex vayi. Ay pax tas ol sva nocꞌ a camello tic, xchi ix.

26 Ix yabꞌan vin̈ checabꞌ chiꞌ, ix em cumnaj vin̈, ix yalan vachꞌ lolonel vin̈ dꞌa Jehová, ix yacꞌan yuj diosal vin̈ dꞌay. 27 Ix yalan vin̈: Alchajocabꞌ vachꞌ lolonel dꞌa Jehová co Diosal yedꞌ vin̈aj Abraham in patrón. Yelton val ayn̈ejoch Jehová yedꞌ vin̈, ayn̈ej svachꞌcꞌolal dꞌa vin̈, yuj chiꞌ ix in scuchbꞌej dꞌa yoltac bꞌe tic masanto dꞌa scal ebꞌ scꞌabꞌyoc vin̈ in patrón chiꞌ, xchi vin̈.

28 Axo ix Rebeca ix bꞌat lemnaj ix dꞌa spat snun, yic syalan masanil tas ix yal vin̈ checabꞌ chiꞌ dꞌay. 29 Ay jun vin̈ snulej ix scuch Labán, elan̈chamel ix bꞌat lemnaj vin̈ bꞌaj ay aꞌ ucꞌbꞌilaꞌ chiꞌ yic syicꞌcot vin̈ checabꞌ chiꞌ. 30 Yujto ix yiloch qꞌuen oro vin̈, qꞌuen ayoch dꞌa sn̈iꞌ ix yedꞌ qꞌuen brazalete ayoch dꞌa scꞌabꞌ ix yanabꞌ chiꞌ, yuj chiꞌ ix bꞌat vin̈ bꞌaj ayecꞌ vin̈ schecabꞌ vin̈aj Abraham chiꞌ yedꞌ nocꞌ camello. 31 Ix yalan vin̈ dꞌa vin̈ checabꞌ chiꞌ:

—Mamin, con̈ vedꞌoc bꞌaj ay in pat, yujto ay svachꞌcꞌolal Jehová dꞌayach. Max yal tzach can dꞌa tic. Toxo ix in bꞌo bꞌaj ol ach vayoc, ay pax bꞌaj vachꞌ ol can nocꞌ a camello tic, xchi vin̈.

32 Ix lajvi chiꞌ, ix bꞌat vin̈ checabꞌ chiꞌ dꞌa spat vin̈. Ix colvaj vin̈aj Labán chiꞌ yicꞌanel yicatz nocꞌ camello chiꞌ. Ix yacꞌan va nocꞌ vin̈. Elan̈chamel ix yicꞌcot a aꞌ vin̈ yic sbꞌicchaj yoc vin̈ checabꞌ chiꞌ yedꞌ ebꞌ ajun yedꞌoc.

33 Ayic ix acꞌji va ebꞌ, ix yalan vin̈ checabꞌ chiꞌ:

—Manto ol in valaj, yovalil ol valcan tas in checnabꞌil vedꞌnac, xchi vin̈.

—Lolonan̈ an mamin, xchi vin̈aj Labán chiꞌ.

34 Ix yalan vin̈ checabꞌ chiꞌ:

—A in tic schecabꞌ in vin̈aj Abraham. 35 Ix yacꞌ svachꞌcꞌolal Jehová dꞌa yibꞌan̈ vin̈. Bꞌeyum val vin̈ sicꞌlabꞌil. Ay nocꞌ scalnel vin̈, ay nocꞌ svacax vin̈, ay nocꞌ scamello vin̈, ay nocꞌ sbꞌuru vin̈, ay pax qꞌuen oro yedꞌ qꞌuen plata dꞌa vin̈. Ay pax ebꞌ vin̈ schecabꞌ vin̈ yedꞌ ebꞌ ix schecabꞌ vin̈. 36 An̈ejtonaꞌ ix Sara yetbꞌeyum vin̈, yicxo val schichimal, ix alji jun yuneꞌ ix. Axo masanil tas ay dꞌa vin̈ in patrón chiꞌ, yicn̈ejton vin̈ yuninal vin̈ chiꞌ. 37 A vin̈ in patrón chiꞌ ix yal vin̈ to svacꞌ in tiꞌ yic tzin cꞌanabꞌajej schecnabꞌil. Ix yal vin̈ icha tic: Man̈ ol yal-laj yicꞌlan sbꞌa vin̈ vuninal tic yedꞌ junoc ebꞌ ix aj Canaán bꞌaj ay on̈ ecꞌ tic. 38 Yuj chiꞌ, tzach bꞌat a say ix yetbꞌeyum vin̈ vuninal tic dꞌa scal ebꞌ in cꞌabꞌ voc. Ataꞌ tzach bꞌati, xchi vin̈ dꞌayin. 39 Ix valan dꞌa vin̈ in patrón chiꞌ: A junoc ix ix sbꞌat vicꞌcot chiꞌ, tato max stacꞌcot sbꞌa ix vedꞌoc, ¿tas vachꞌ svutej? xin chi. 40 Ix tacꞌvi vin̈ dꞌayin: A in tic, emnaquiln̈ej svutej in bꞌa dꞌa Jehová. Aꞌ ol schecbꞌat yángel edꞌoc yic vachꞌn̈ej ol aj yelcꞌoch jun a checnabꞌil chiꞌ, yic tzicꞌancot junoc ix yetbꞌeyum vin̈ vuninal tic dꞌa scal ebꞌ in cꞌabꞌ voc. 41 Axon̈ej tato a ebꞌ chiꞌ max acꞌan ix cobꞌes chiꞌ dꞌayach, colan ach bꞌaj ix acꞌ a tiꞌ dꞌayin, xchi vin̈ in patrón chiꞌ dꞌayin.

42 Icha chiꞌ jun, ix in ja dꞌa stiꞌ aꞌ ucꞌbꞌilaꞌ chiꞌ ticnaic, ix in lesalvi dꞌa Dios icha tic: Ach Jehová co Diosal yedꞌ vin̈aj Abraham in patrón, tato yel ayach och vedꞌoc, tato vachꞌ ol elcꞌoch jun in checnabꞌil tic, 43 tzin tevi dꞌayach, yacbꞌan ayinecꞌ dꞌa stiꞌ aꞌ ucꞌbꞌilaꞌ tic, axo ol ajoc, to a ix cobꞌes ol ja icꞌoj aꞌ, ol valan dꞌa ix: Tzin tevi dꞌayach to tzacꞌ vucꞌ jabꞌoc aꞌal dꞌa yol a chꞌubꞌ chiꞌ, xin cham dꞌa ix. 44 Axom ol yalan ix chiꞌ: Ucꞌaꞌ, svicꞌpaxqꞌueta aꞌ yucꞌ nocꞌ a camello tic, xchampax ix. Aton val ix chiꞌ ix a siqꞌueli yic tzꞌoch yetbꞌeyumoc vin̈ yuninal vin̈ in patrón, xin chi dꞌa in lesal chiꞌ. 45 Ayto val slajvi in lesal chiꞌ dꞌa esalil, ix vilani, ix cꞌoch ix Rebeca tic, ix em ix bꞌaj ay aꞌ ucꞌbꞌilaꞌ, ayqꞌue schꞌubꞌ ix dꞌa sjolom sjen̈jabꞌ. Ix valan dꞌa ix: Tzin tevi dꞌayach, acꞌ vucꞌ jabꞌoc aꞌal chiꞌ, xin chi dꞌa ix. 46 Dꞌa elan̈chamel ix yiqꞌuemta schꞌubꞌ ix, ix yalan ix: Uqꞌuej aꞌ mamin, yedꞌ pax nocꞌ a camello, ol vacꞌpax yucꞌaꞌ nocꞌ, xchi ix. Icha chiꞌ jun, ix yacꞌan aꞌ ix vuqꞌuej, ix yacꞌanpax aꞌ ix yucꞌ nocꞌ in camello chiꞌ. 47 Ix in cꞌanbꞌan dꞌa ix: ¿Mach ayach yisil? xin chi dꞌa ix. Ix yalan ix dꞌayin: Yisil in vin̈aj Betuel, yuninal vin̈aj Nacor yedꞌ ix Milca, xchi ix. Ix vacꞌanoch jun qꞌuen icha uchiquin dꞌa sn̈iꞌ ix, ix vacꞌanpaxoch junjun qꞌuen brazalete dꞌa junjun scꞌabꞌ ix. 48 Ix lajvi chiꞌ ix in em cumnajoc, ix valan in bꞌa dꞌa Jehová in Diosal yedꞌ vin̈ in patrón dꞌa lesal, ix vacꞌan yuj diosal dꞌay yujto ayn̈ejoch vedꞌoc yic in cot dꞌa yol bꞌe. Vachꞌn̈ej ix aj in coti, yic tzul vicꞌan ix yetbꞌeyum vin̈ yuninal vin̈ in patrón dꞌa e cal a ex scꞌabꞌ yoc ex vin̈ tic. 49 A ticnaic jun, lolonan̈ec. ¿Vachꞌn̈ej am ol eyutej e pensar dꞌa vin̈ in patrón chiꞌ? Tato maay jun, alecpax dꞌayin, yic vachꞌ snachajel vuuj tas tzin cꞌulej, xchi vin̈ checabꞌ chiꞌ.

50 Ix lajvi chiꞌ ix yalan vin̈aj Labán yedꞌ vin̈aj Betuel:

—Masanil juntzan̈ tic ix cot dꞌa Jehová, a on̈ tic man̈xalaj tas vachꞌ calan dꞌayach. 51 Ina ix tic, icꞌbꞌat ix, bꞌatocabꞌ ix yetbꞌeyumoc vin̈ yuninal vin̈ a patrón chiꞌ, icha val ix aj snaan Jehová, xchi ebꞌ.

52 Axo yic ix yabꞌan vin̈ checabꞌ chiꞌ jun, ix em cumnaj vin̈ dꞌa yichan̈ Jehová, ix yacꞌan yuj diosal vin̈ dꞌay. 53 Elan̈chamel ix yicꞌqꞌueta jantac silabꞌ vin̈, aton qꞌuen oro, qꞌuen plata yedꞌ pichul, ix yacꞌan vin̈ dꞌa ix Rebeca yedꞌ dꞌa vin̈ snulej ix yedꞌ pax dꞌa ix snun ix. 54 Ix lajvi chiꞌ, ix va vin̈ yedꞌ ebꞌ ajun yedꞌoc, ataꞌ ix vaycan ebꞌ dꞌa jun acꞌval chiꞌ. Axo yic ix qꞌue vaan ebꞌ dꞌa qꞌuin̈ibꞌalil dꞌa junxo cꞌu, ix yalan vin̈ checabꞌ chiꞌ:

—A ticnaic jun, chequecbꞌat ix vedꞌoc dꞌa vin̈ in patrón, xchi vin̈.

55 Ix tacꞌvi vin̈ snulej ix yedꞌ ix snun ix chiꞌ, ix yalan ebꞌ:

—Canocabꞌ jayeocxo cꞌual ix quedꞌoc, ichato chiꞌ ol bꞌat ix edꞌoc, xchi ebꞌ dꞌa vin̈.

56 Axo ix tacꞌvi vin̈ checabꞌ chiꞌ:

—Man̈xo in eyamoch vaan. A Jehová ayn̈ejoch vedꞌoc, yuj chiꞌ vachꞌ ix aj yelcꞌoch jun in checnabꞌil tic. Chaec in pax dꞌa vin̈ in patrón, xchi vin̈.

57 Ix yalan ebꞌ:

—Avtejeccot ix cobꞌes chiꞌ, ol cabꞌi tas xchi ix, xchi ebꞌ.

58 Ix avtajcot ix Rebeca chiꞌ, ix scꞌanbꞌan ebꞌ dꞌa ix:

—¿Tzam yal a cꞌol tzach bꞌat yedꞌ jun vin̈ vinac tic? xchi ebꞌ.

—Iꞌ syalaꞌ, ol in bꞌatoc, xchi ix.

59 Ix lajvi chiꞌ, ix yacꞌanbꞌat ix Rebeca chiꞌ ebꞌ vin̈ yedꞌ jun ix ix, ix ilan qꞌuibꞌ ix yedꞌ vin̈ checabꞌ chiꞌ yedꞌ ebꞌ yetbꞌeyum vin̈ yedꞌnac. 60 Ix yalan vachꞌ lolonel ebꞌ dꞌa ix Rebeca icha tic:

61 Ix lajvi chiꞌ, ix qꞌue ix Rebeca yedꞌ ebꞌ ix schecabꞌ dꞌa yibꞌan̈ nocꞌ camello, ix och tzacꞌan ebꞌ dꞌa spatic vin̈ schecabꞌ vin̈aj Abraham chiꞌ. Ichaton chiꞌ ix aj yicꞌanbꞌat ix Rebeca vin̈ checabꞌ chiꞌ, ix bꞌat ebꞌ bꞌian.

62 Ayic van slacꞌanvi ja ebꞌ dꞌa Beerseba, a vin̈aj Isaac, toxo ix meltzaj vin̈ dꞌa jun aꞌ ucꞌbꞌilaꞌ scuch A Dios Pitzan Tzin Ilani. A dꞌa yol yic Neguev cajan vin̈. 63 Axo yic vanxo yem cꞌu, van sbꞌeyecꞌ vin̈, van snaubꞌtan̈an vin̈, axo ix yilan vin̈ to ay juntzan̈ nocꞌ camello scoti. 64-65 An̈ejtonaꞌ ix Rebeca, ix bꞌat qꞌuelan ix, ix yilanbꞌat vin̈aj Isaac chiꞌ ix. Ix scꞌanbꞌan ix dꞌa vin̈ checabꞌ chiꞌ:

—¿Mach jun vin̈ vinac scot dꞌa quichan̈ tic? xchi ix.

Ix yalan vin̈ checabꞌ chiꞌ:

—Aton vin̈ in patrón chiꞌ, xchi vin̈. Yuj chiꞌ, ix yicꞌanemta smusil sat ix, elan̈chamel ix emta ix dꞌa yibꞌan̈ nocꞌ camello chiꞌ.

66 Ix yalan vin̈ checabꞌ chiꞌ dꞌa vin̈aj Isaac tas ix aj yelcꞌoch schecnabꞌil. 67 Ix icꞌjibꞌat ix Rebeca yuj vin̈aj Isaac dꞌa smantiado ix Sara, ix snun vin̈ chamnac, ix yicꞌlan sbꞌa vin̈ yedꞌ ix. Te xajan ix Rebeca chiꞌ yuj vin̈. Icha chiꞌ ix aj yecꞌ scuscꞌolal vin̈ yuj schamel ix snun.