A schamel ix Sara
23
A ix Sara 127 abꞌil sqꞌuinal ix, 2 ayic ix cham ix dꞌa chon̈abꞌ Quiriat-arba, aton Hebrón dꞌa yol yic Canaán. Ix te ocꞌ vin̈aj Abraham yuj schamel ix Sara chiꞌ, ix ochcan vin̈ dꞌa cuscꞌolal yuj ix. 3 Ix can snivanil ix yetbꞌeyum vin̈ chiꞌ, ix bꞌat vin̈ dꞌa ebꞌ hitita cajan dꞌa jun lugar chiꞌ, ix yalan vin̈ dꞌa ebꞌ icha tic:4 —Vachꞌchom chꞌoc chon̈abꞌil vajecꞌ dꞌa e cal, palta elocabꞌ dꞌa e cꞌol tze chon̈ jabꞌoc in luum bꞌaj tzin muc snivanil ix vetbꞌeyum chiꞌ, xchi vin̈ dꞌa ebꞌ.
5 Ix tacꞌvi ebꞌ dꞌa vin̈:
6 —Mamin, abꞌ tas ol cal dꞌayach, a ach tic te nivan elcꞌoch dꞌa co cal tic, yuj chiꞌ syal a mucan a chamnac chiꞌ bꞌaj te vachꞌ dꞌa co campusante. Malaj junoc on̈ max co cha a muc snivanil ix etbꞌeyum chiꞌ dꞌa qꞌuen qꞌueen joybꞌilel yool, xchi ebꞌ dꞌa vin̈.
7 Axo vin̈aj Abraham chiꞌ, ix qꞌue lin̈an vin̈, ix em n̈ojnaj vin̈ yic schꞌoxan vin̈ to ay yelcꞌoch ebꞌ vin̈ dꞌa sat vin̈. 8 Ix yalan vin̈:
—Tato yel tzꞌel dꞌa e cꞌol tzin muc snivanil ix vetbꞌeyum chiꞌ dꞌa tic, alec dꞌa vin̈aj Efrón, yuninal vin̈aj Zohar 9 to schon̈ qꞌuen n̈aqꞌueen vin̈ dꞌayin dꞌa Macpela dꞌa stitac sluum vin̈. Ol in tup dꞌa vin̈ icha stojol yic sviquejcan jun lugar chiꞌ bꞌaj tzin muc in chamnac dꞌa e cal, xchi vin̈aj Abraham chiꞌ.
10 Ayecꞌ vin̈aj Efrón hitita chiꞌ dꞌa scal ebꞌ. Ix tacꞌvi vin̈. Te chaan̈ ix yal vin̈ yic vachꞌ syabꞌ masanil ebꞌ yetchon̈abꞌ molanecꞌ chiꞌ yedꞌ ebꞌ tzꞌoch dꞌa yol chon̈abꞌ chiꞌ. Ix yalan vin̈:
11 —Maay mamin, sval dꞌayach to a jun n̈aqꞌueen yedꞌ lum luum chiꞌ ton̈ej tzin siej dꞌayach. Testigo tzꞌajcan ebꞌ vetchon̈abꞌ tic to ton̈ej tzin siej jun lum chiꞌ dꞌayach. Muc ix etbꞌeyum chiꞌ taꞌ, xchi vin̈. 12 Yuj chiꞌ ix emxi n̈ojnaj vin̈aj Abraham chiꞌ dꞌa yichan̈ ebꞌ ayecꞌ chiꞌ, 13 ix yalan vin̈ dꞌa vin̈aj Efrón dꞌa yichan̈ ebꞌ smasanil:
—Abꞌ val tas sval dꞌayach to tza cha stojol luum, ichato chiꞌ ol in mucan ix vetbꞌeyum chiꞌ taꞌ, xchi vin̈.
14 Ix tacꞌvi vin̈aj Efrón chiꞌ:
15 —Abꞌ jun mamin, 400 siclo qꞌuen plata stojol luum. Yujto a ach, svacꞌ lum dꞌayach icha jun stojol chiꞌ, toxon̈ej bꞌat a muc ix, xchi vin̈.
16 Ix scha scꞌol stojol lum chiꞌ vin̈aj Abraham icha ix yal vin̈ dꞌa yichan̈ masanil ebꞌ vin̈ hitita chiꞌ. Ix stupan lum vin̈ icha ix aj strato ebꞌ chiꞌ. 17 Icha chiꞌ ix aj yochcan lum sluum vin̈aj Efrón chiꞌ yicoc vin̈aj Abraham chiꞌ, lum Macpela dꞌa slacꞌanil lum yic vin̈aj Mamre, bꞌaj ay qꞌuen n̈aqꞌueen yedꞌ te teꞌ. Ix yiquejcan masanil juntzan̈ chiꞌ vin̈. 18 Ix yiquejcan lum vin̈aj Abraham chiꞌ dꞌa yichan̈ masanil ebꞌ vin̈ hitita molanecꞌ taꞌ. Masanil ebꞌ tzꞌoch dꞌa spuertail chon̈abꞌ chiꞌ, testigo pax ix ajcan ebꞌ dꞌa jun trato chiꞌ.