—Ina vajecꞌ tic Mamin, xchi vin̈.

2 Ix yalan Dios dꞌa vin̈ icha tic:

—Icꞌbꞌat vin̈aj Isaac jun pitan̈ uninal te xajan uuj, tzach bꞌat dꞌa lum Moriah. Ayic tzach cꞌoch dꞌa sjolom lum tzalan ol in chꞌox dꞌayach, ataꞌ ol a n̈ustzꞌa vin̈ silabꞌil dꞌayin, xchi Dios.

3 Axo dꞌa junxo cꞌu, te acꞌvalto ix qꞌue vaan vin̈aj Abraham chiꞌ. Ix yacꞌanoch stzꞌum nocꞌ sbꞌuru vin̈, ix xican teꞌ scꞌatzitzal jun silabꞌ chiꞌ vin̈. Ix yicꞌanbꞌat vin̈aj Isaac yuninal yedꞌ chavan̈ ebꞌ schecabꞌ, ix bꞌat vin̈ yedꞌ ebꞌ dꞌa jun lugar ix yal Dios chiꞌ. 4 Axo dꞌa schabꞌjial, najatto ix yilbꞌat lum tzalan chiꞌ vin̈. 5 Ix yalan vin̈ dꞌa ebꞌ schecabꞌ chiꞌ:

—Canan̈ec dꞌa tic yedꞌ nocꞌ bꞌuru tic, a inxo yedꞌ vin̈ vuninal tic, ol on̈ bꞌat dꞌa chiꞌ, yic scaqꞌuem co bꞌa dꞌa co Mam Dios. Slajvi chiꞌ, ol on̈ jax dꞌayex, xchi vin̈ dꞌa ebꞌ.

6 Ix lajvi chiꞌ ix yacꞌan teꞌ cꞌatzitz chiꞌ vin̈ scuch vin̈aj Isaac chiꞌ, ix yicꞌanbꞌat scuchilubꞌ vin̈ yedꞌ scꞌacꞌ, ix bꞌat ebꞌ schavan̈il. 7 Quenanto val sbꞌat ebꞌ, ix yalan vin̈aj Isaac chiꞌ dꞌa vin̈ smam chiꞌ icha tic:

—Mamin, xchi vin̈.

—¿Tas xchi vuninal? xchi vin̈aj Abraham chiꞌ.

—Ina quedꞌnac co cꞌatzitz yedꞌ co cꞌacꞌ, ¿bꞌaj ay pax nocꞌ calnel ol och silabꞌil chiꞌ? xchi vin̈.

8 —Ach vuninal, a Dios ol acꞌan nocꞌ, xchi vin̈.

Ix bꞌeyn̈ejbꞌat ebꞌ. 9 Axo ix cꞌoch ebꞌ bꞌaj ix yal Dios chiꞌ, ix sbꞌoan jun altar vin̈aj Abraham chiꞌ, ix sbꞌoanqꞌue teꞌ cꞌatzitz chiꞌ vin̈ dꞌa yibꞌan̈. Ix lajvi chiꞌ ix tzuyan vin̈ yuninal vin̈ chiꞌ, ix yacꞌanqꞌue vin̈ dꞌa yibꞌan̈ teꞌ cꞌatzitz chiꞌ. 10 Ix yicꞌancot qꞌuen cuchilubꞌ chiꞌ vin̈ yic smilancham yuninal vin̈ chiꞌ silabꞌil. 11 Axo yángel Jehová ix avajemta dꞌa satchaan̈ icha tic:

—Abraham, Abraham, xchi.

—¿Tas xchi Mamin? xchi vin̈.

12 Ix yalan jun ángel chiꞌ:

—Man̈ acꞌoch a cꞌabꞌ a milancham vin̈ uninal chiꞌ. Ix vojtaquejeli to ay velcꞌoch dꞌa yol a sat, yujto maj a tenecꞌ acꞌan jun pitan̈ uninal chiꞌ dꞌayin, xchi yángel Jehová chiꞌ.

13 Ix bꞌat qꞌuelnaj vin̈aj Abraham chiꞌ dꞌa spatic, ix yilan vin̈ ayecꞌ jun nocꞌ chꞌac calnel sudꞌancan schꞌac dꞌa scal jun teꞌ qꞌuiix. Ix bꞌat lemnaj vin̈ yicꞌcot nocꞌ, ix sn̈usan nocꞌ vin̈ silabꞌil sqꞌuexuloc vin̈ yuninal chiꞌ. 14 Ix yacꞌancan sbꞌi jun lugar chiꞌ vin̈: A Jehová tzꞌacꞌan tas tzꞌoch cuuj. Yuj chiꞌ syaln̈ej ebꞌ anima icha tic: A dꞌa lum vitz a Jehová tzꞌacꞌan tas tzꞌoch cuuj, xchi ebꞌ.

15 Ix yalanxiemta yángel Jehová chiꞌ dꞌa vin̈:

16 —A in ton Jehová in svalaꞌ: Yujto ix a cꞌanabꞌajej a cꞌulan jun tic, maj a tenecꞌ acꞌan jun pitan̈ uninal dꞌayin, yuj chiꞌ svacꞌ in tiꞌ, 17 dꞌa val yel ol vacꞌ in vachꞌcꞌolal dꞌa ibꞌan̈. Ol vacꞌ qꞌuibꞌ sbꞌisul in̈tilal, icha qꞌuen cꞌanal dꞌa satchaan̈, ma icha pax yarenail stiꞌ aꞌ mar. An̈ejtonaꞌ pax ebꞌ in̈tilal ol yacꞌ ganar ebꞌ ayoch ajcꞌolal dꞌa ebꞌ. 18 Yujto ix a cꞌanabꞌajej tas ix valaꞌ, yuj chiꞌ masanil nación dꞌa yolyibꞌan̈qꞌuinal tic ol scha in vachꞌcꞌolal yuj ebꞌ in̈tilal, xchi dꞌa vin̈.

19 Ix lajvi chiꞌ, ix meltzajxi vin̈aj Abraham chiꞌ yedꞌ vin̈ yuninal bꞌaj aycan chavan̈ ebꞌ schecabꞌ, junxon̈ej ix aj smeltzaj ebꞌ dꞌa Beerseba chiꞌ, ataꞌ ix cajnajcan ebꞌ.

20 Ayic ix ecꞌ jun tiempo, ix yabꞌan specal vin̈aj Abraham chiꞌ to ayxo yuninal vin̈ yucꞌtac vin̈, aton vin̈aj Nacor yedꞌ ix Milca. 21 A vin̈ sbꞌabꞌel unin ebꞌ, Uz sbꞌi vin̈. A vin̈ schabꞌil Buz sbꞌi vin̈, axo vin̈ yoxil Kemuel sbꞌi vin̈, aton vin̈ smam yichamcan ebꞌ Aram. 22 Ix aljipax vin̈aj Quesed, vin̈aj Hazo, vin̈aj Pildas, vin̈aj Jidlaf yedꞌ vin̈aj Betuel. 23 Aton vajxacvan̈ ebꞌ vin̈ tic yuneꞌ ix Milca yedꞌ vin̈aj Nacor chiꞌ. A vin̈aj Betuel chiꞌ, aton vin̈ smam ix Rebeca.

24 Ay juntzan̈xo ebꞌ yuninal vin̈aj Nacor yedꞌ junxo ix yetbꞌeyum scuch Reúma, aton vin̈aj Teba, vin̈aj Gaham, vin̈aj Tahas yedꞌ vin̈aj Maaca.