Yaljubꞌal vin̈aj Isaac
21
Icha ix aj yalan Jehová Dios dꞌa ix Sara to ol aljoc junoc yuneꞌ ix, icha chiꞌ ix aj yelcꞌochi. 2 Ix scuchoch yuneꞌ ix, ix alji ayic te icham vinacxo vin̈aj Abraham chiꞌ. Ix alji jun svinac unin ix, icha val stiempoal albꞌilcan yuj Dios. 3 Isaac ix sbꞌiej yuj vin̈aj Abraham chiꞌ. 4 Yucubꞌixial yalji vin̈ unin chiꞌ, ix acꞌjioch yechel strato Dios dꞌa snivanil vin̈ yuj vin̈aj Abraham chiꞌ icha yaj yalan Dios dꞌa vin̈. 5 Cien abꞌilxo sqꞌuinal vin̈aj Abraham chiꞌ ayic ix alji vin̈aj Isaac. 6 Ix yalan ix Sara icha tic: Ix in yacꞌ tzevaj co Mam Dios. Masanil ebꞌ tzꞌabꞌani to ay vuneꞌ, ol tzevajpax ebꞌ vedꞌoc. 7 ¿Toc ay ebꞌ anima ix alan dꞌa vin̈aj Abraham, tato olto vacꞌ chunoc unin? Palta ixto alji vuneꞌ yedꞌ vin̈ vachꞌchom icham vinacxo vin̈, xchi ix Sara chiꞌ.Ix pechjielta ix Agar yedꞌ vin̈aj Ismael
8 Ix qꞌuibꞌ vin̈aj Isaac, ix el vin̈ dꞌa yim, yuj chiꞌ ix yacꞌoch jun nivan qꞌuin̈ vin̈aj Abraham chiꞌ. 9 Axo ix yilan ix Sara to a jun yuninal vin̈aj Abraham yedꞌ ix Agar, ix aj Egipto, sbꞌuchvaj dꞌa vin̈aj Isaac chiꞌ. 10 Yuj chiꞌ ix acꞌji scꞌol vin̈aj Abraham yuj ix Sara chiꞌ, ix yalan ix: Pechbꞌat ix criada tic yedꞌ vin̈ yuneꞌ tic, yujto malaj in gana ol yicꞌ yic vin̈ dꞌa tastac ol acꞌcan dꞌa vin̈ vuneꞌ aj Isaac tic, xchi ix.
11 A jun lolonel tic te ya ix och dꞌa vin̈aj Abraham chiꞌ, yujto yuninal pax vin̈aj Ismael chiꞌ vin̈. 12 Axo Dios ix alan dꞌa vin̈: Man̈ ach cus yuj vin̈ unin tic yedꞌ pax ix a criada tic. Cꞌanabꞌajejn̈ej tas syal ix Sara chiꞌ, yujto a dꞌa vin̈aj Isaac tic ol bꞌeyn̈ejbꞌat jantac in̈tilal, icha ix aj valan dꞌayach. 13 A pax vin̈ yuneꞌ ix criada chiꞌ jun, a in ol in bꞌo jun nivan nación dꞌa yin̈tilal vin̈ yujto uninal pax vin̈, xchi Dios.
14 Axo dꞌa junxo cꞌu te acꞌvalto, ix yicꞌancot vael vin̈aj Abraham chiꞌ yedꞌ jun nocꞌ tzꞌuum yedꞌtal aꞌ bꞌudꞌan, ix yacꞌan vin̈ scuch ix Agar chiꞌ, ix acꞌjipax vin̈ yuneꞌ ix dꞌa yol scꞌabꞌ, ix tacꞌajbꞌat ebꞌ yuj vin̈. Ix bꞌat ix, ix satbꞌeyecꞌ ix dꞌa jun tzꞌinan luum dꞌa yol yic Beerseba. 15 Ayic ix lajvi a aꞌ dꞌa yol nocꞌ tzꞌum chiꞌ, ix yactancan vin̈ yuneꞌ ix chiꞌ dꞌa yich jun teꞌ yuneꞌ teꞌ. 16 Najattac ix bꞌat ix, ix em cꞌojan ix, yic vachꞌ max yil ix scham vin̈ yuneꞌ chiꞌ snaani. Ayic ix em cꞌojan ix chiꞌ, ix qꞌue sjaj vin̈ yoqꞌui.
17 Ix yabꞌan Dios yocꞌ vin̈, ato dꞌa satchaan̈ ix lolonemta yángel Dios dꞌa ix Agar chiꞌ, ix yalani: Ach Agar, ¿tas tzach icꞌani? Man̈ ach xivoc, a Dios toxo ix abꞌan yel yav vin̈ uneꞌ chiꞌ yocꞌ bꞌaj ix actejcan chiꞌ. 18 Ixic bꞌat il vin̈, tzicꞌanqꞌue van vin̈, tza montan vin̈, yujto a yedꞌ yin̈tilal vin̈ ol in bꞌo jun nivan nación, xchi.
19 Axo Dios ix acꞌan yil jun sjaj a aꞌ ix Agar chiꞌ, ix bꞌat ix, ix yacꞌan bꞌudꞌjoc nocꞌ tzꞌuum chiꞌ ix dꞌa aꞌ, ix yacꞌan aꞌ ix yucꞌ vin̈ yuneꞌ chiꞌ. 20-21 A Dios ix och yedꞌ vin̈aj Ismael chiꞌ, ix qꞌuibꞌ vin̈. Ix cann̈ej vin̈ dꞌa jun tzꞌinan lum dꞌa yol yic Parán. Te julum nocꞌ ix aj vin̈. Axo ix snun vin̈ ix sayan jun ix aj Egipto yicꞌaꞌ.
A strato vin̈aj Abraham yedꞌ vin̈aj Abimelec
22 A dꞌa jun tiempoal chiꞌ, ix javi vin̈aj Abimelec dꞌa vin̈aj Abraham, ajun vin̈aj Ficol yajal yaj dꞌa ebꞌ soldado yedꞌ vin̈. Ix yalan vin̈aj Abimelec dꞌa vin̈aj Abraham chiꞌ icha tic:
—Ix quilaꞌ to a Dios ayn̈ejoch edꞌoc dꞌa masanil tas tza cꞌulej. 23 Yuj chiꞌ acꞌ a tiꞌ dꞌayin dꞌa yichan̈ Dios dꞌa jun lugar tic, to man̈ ol acꞌ chucal dꞌayin, dꞌa ebꞌ vuninal yedꞌ pax dꞌa ebꞌ vin̈tilal. Tzacꞌan a tiꞌ to vachꞌn̈ej ol utej a bꞌa dꞌayin, icha ix vutej in bꞌa dꞌayach. Icha pax chiꞌ ol utej a bꞌa dꞌa ebꞌ anima cajan dꞌa jun chon̈abꞌ bꞌaj janac ach cajan tic, xchi vin̈.
24 Ix tacꞌvi vin̈aj Abraham chiꞌ:
—Svacꞌ in tiꞌ.
25 Palta ay jun aꞌ ucꞌbꞌilaꞌ in chec joychajnac ix yiqꞌuecꞌ ebꞌ vin̈ a checabꞌ, xchi vin̈ dꞌa vin̈. 26 Ix tacꞌvixi vin̈aj Abimelec chiꞌ:
—Val yel man̈ vojtacoc tas yaj jun chiꞌ, malaj tas tzal dꞌayin, ato ticnaic svabꞌi. Mach am ix cꞌulan jun chiꞌ, xchi vin̈.
27 Yuj chiꞌ ix yicꞌancot nocꞌ calnel vin̈aj Abraham chiꞌ yedꞌ nocꞌ vacax, ix yacꞌan nocꞌ vin̈ dꞌa vin̈aj Abimelec chiꞌ. A dꞌa jun cꞌu chiꞌ ix sbꞌocan jun strato ebꞌ chiꞌ schavan̈il. 28 A vin̈aj Abraham chiꞌ ix yiqꞌuelta ucvan̈ nocꞌ cobꞌestac calnel vin̈ dꞌa scal nocꞌ scalnel. 29 Yuj chiꞌ ix scꞌanbꞌan vin̈aj Abimelec chiꞌ:
—¿Tas yuj tziqꞌuelta nocꞌ calnel chiꞌ? xchi vin̈.
30 Ix yalan vin̈aj Abraham chiꞌ icha tic:
—Cha nocꞌ dꞌayin, a nocꞌ schꞌoxani to a in in joynac jun aꞌ ucꞌbꞌilaꞌ tic, xchi vin̈.
31 Yuj chiꞌ Beerseba* ix sbꞌiejcan jun lugar chiꞌ, yujto ataꞌ ix yacꞌcan stiꞌ ebꞌ dꞌay junjun.
32 Icha chiꞌ ix aj sbꞌoancan jun strato ebꞌ dꞌa Beerseba chiꞌ. Ix lajvi chiꞌ ix meltzaj vin̈aj Abimelec yedꞌ vin̈aj Ficol dꞌa schon̈abꞌ, aton schon̈abꞌ ebꞌ filisteo. 33 A dꞌa Beerseba chiꞌ, ix yavej jun te teꞌ vin̈aj Abraham scuch tamarisco. A dꞌa Beerseba chiꞌ ix yal sbꞌa vin̈ dꞌa Jehová, aton Dios ayn̈ejecꞌ dꞌa juneln̈ej. 34 Najtil ecꞌnac vin̈ dꞌa smacbꞌen ebꞌ filisteo chiꞌ.