A vin̈aj Abraham yedꞌ vin̈aj Abimelec
20
Ix el vin̈aj Abraham chiꞌ dꞌa yol yic vin̈aj Mamre, ix bꞌatcan cajan vin̈ dꞌa yol yic Neguev dꞌa jun chon̈abꞌ scuch Gerar. A dꞌa scal Cades yedꞌ Shur, ataꞌ ay Gerar chiꞌ. 2 Ayic ayecꞌ vin̈ taꞌ, ix yal vin̈ to man̈ yetbꞌeyumoc ix Sara vin̈, yanabꞌ ix vin̈ yalani. A vin̈aj Abimelec sreyal Gerar chiꞌ, ix schec vin̈ icꞌchajcot ix Sara chiꞌ yic tzꞌoch ix yetbꞌeyumoc yalani. 3 Ay jun acꞌval, ix lolon Dios dꞌa vin̈ rey chiꞌ dꞌa svayich icha tic: Ol ach chamoc, yujto a ix ix, ix icꞌcot etbꞌeyumoc alani, ay yetbꞌeyum ix, xchi dꞌa vin̈.4 Palta manto vaylaj vin̈ yedꞌ ix Sara chiꞌ, yuj chiꞌ ix yalan vin̈: Mamin, malaj in mul, ¿tom tzin a satel yedꞌ in chon̈abꞌ tic? 5 Yujto a vin̈aj Abraham chiꞌ ix alan dꞌayin to yanabꞌ ix vin̈. Ix yalanpax ix dꞌayin: In nulej vin̈, xchi ix. A in tic ix in cꞌulej dꞌa smasanil in cꞌool, man̈oc chucal naan vuuj, xchi vin̈ rey chiꞌ.
6 Ix tacꞌvi Dios dꞌa vin̈: Vojtac to ix a cꞌulej jun tic dꞌa stojolal, yuj chiꞌ maj in cha a yam ix, yic vachꞌ max och a mul dꞌayin. 7 A ticnaic, acꞌ meltzaj ix dꞌa vin̈ yetbꞌeyum chiꞌ, yujto in checabꞌ yaj vin̈. Syal slesalvi vin̈ uuj yic max ach chami. Palta tato max acꞌ meltzaj ix jun, val yel ol ach chamoc, ol champax jantac ebꞌ cajan edꞌoc, xchi Dios dꞌa vin̈.
8 Axo ix qꞌuin̈ibꞌi, ix qꞌue vaan vin̈ rey chiꞌ, ix yavtancot masanil ebꞌ schecabꞌ vin̈, ix yalan vin̈ dꞌa ebꞌ tas ix svayichej chiꞌ. Ayic ix yabꞌan jun chiꞌ ebꞌ, ix te xiv ebꞌ. 9 Ix lajvi chiꞌ ix schecan vin̈ rey chiꞌ avtaj vin̈aj Abraham chiꞌ, ix yalan vin̈:
—¿Tas yuj icha tic ix in utej? ¿Tas in mul dꞌayach, yuj chiꞌ ijan tzicꞌcot jun nivan mul tic dꞌa vibꞌan̈ yedꞌ dꞌa yibꞌan̈ jantac ebꞌ in chon̈abꞌ tic? Man̈ vachꞌoc ix in utej. 10 ¿Tas ix a naꞌ yuj chiꞌ icha tic ix a cꞌulej? xchi vin̈ rey chiꞌ.
11 Ix tacꞌvi vin̈aj Abraham chiꞌ dꞌa vin̈:
—A in naani to a dꞌa jun lugar tic malaj mach xiv dꞌa Dios. Qꞌuinaloc ay mach tzin macꞌancham yuj ix vetbꞌeyum tic in naani. 12 Val yel vanabꞌ ix, yisil ix vin̈ in mam, palta chꞌoc snun ix, yuj chiꞌ ix yal vicꞌlan in bꞌa yedꞌ ix. 13 Ayic ix yalan Dios to tzin el dꞌa spat vin̈ in mam, ix in cꞌanan pavor dꞌa ix to schꞌox svachꞌcꞌolal ix dꞌayin, yuj chiꞌ yaln̈ej bꞌaj tzon̈ eqꞌui, syal ix to vanabꞌ ix, xchi vin̈aj Abraham chiꞌ.
14 Ix yacꞌanxi meltzaj ix Sara chiꞌ vin̈ dꞌa vin̈aj Abraham chiꞌ. Ix acꞌjipax nocꞌ calnel, nocꞌ vacax, ebꞌ vin̈ checabꞌ yedꞌ ebꞌ ix checabꞌ dꞌa vin̈ yuj vin̈ rey chiꞌ. 15 Ix yalanxi vin̈ rey chiꞌ dꞌa vin̈:
—Ina in macbꞌen tic, syal a sicꞌlani bꞌajtil syal a cajnaji, xchi vin̈ rey chiꞌ dꞌa vin̈.
16 Ix yalanpax vin̈ rey chiꞌ dꞌa ix Sara:
—Ix vacꞌ mil siclo qꞌuen plata dꞌa vin̈ a nulej tic, yic tzꞌoch spacoc dꞌayach, yic sco chꞌoxaneli to malaj a mul ix ochi, yic vachꞌ malaj mach syal yalan chucal dꞌa a patic, xchi vin̈ dꞌa ix.
17 Ix lajvi chiꞌ ix lesalvi vin̈aj Abraham chiꞌ dꞌa Dios yuj vin̈aj Abimelec chiꞌ. Yuj chiꞌ ix yicꞌxiel scatabꞌ Dios chiꞌ dꞌa yibꞌan̈ vin̈ yedꞌ ix yetbꞌeyum yedꞌ ebꞌ ix schecabꞌ vin̈, yic tzꞌaljixi yuneꞌ ebꞌ ix. 18 Yujto yujn̈ej ix Sara chiꞌ, man̈xa junoc ebꞌ ix ayecꞌ dꞌa spat vin̈aj Abimelec chiꞌ ixto unevi junoc tiempoal yuj Jehová.