—Ex mamin, tzin tevi dꞌayex, coyec vedꞌ dꞌa in pat. Ay a aꞌ bꞌaj ol e bꞌiquel eyoc, ay pax bꞌaj vachꞌ ol ex can dꞌa jun acꞌval tic, axo qꞌuicꞌan spet ex bꞌati, xchi vin̈ dꞌa ebꞌ.

Ix tacꞌvi ebꞌ icha tic:

—Yuj val dios dꞌayach, palta a on̈ tic ol on̈ can dꞌa calle tic, a tic ol on̈ vayoc, xchi ebꞌ.

3 Palta ix och val tean vin̈aj Lot chiꞌ dꞌa ebꞌ, masanto ix bꞌat ebꞌ dꞌa spat vin̈ chiꞌ. Axo ix cꞌoch ebꞌ, ix sbꞌoan ixim pan vin̈ malaj yich sva ebꞌ, ix va ebꞌ sicꞌlabꞌil.

4 Ayic mantzac vay ebꞌ, ix cꞌoch masanil ebꞌ vin̈ vinac cajan chiꞌ taꞌ, ix oymaj ebꞌ vin̈ dꞌa spatictac spat vin̈aj Lot chiꞌ. 5 Ix och ijan ebꞌ vin̈ yavajoch dꞌa vin̈aj Lot chiꞌ, ix yalan ebꞌ vin̈ icha tic:

—¿Bꞌajtil ayecꞌ juntzan̈ ebꞌ vin̈ vinac ix jacan dꞌa a pat tic dꞌa jun acꞌval tic? Iqꞌuelta ebꞌ vin̈ dꞌayon̈ yic squixtej ebꞌ, xchi ebꞌ vin̈.

6 Ayic ix yabꞌan juntzan̈ lolonel vin̈aj Lot chiꞌ, ix elta vin̈ yil ebꞌ vin̈. Vachꞌ ix yutej vin̈ smacancanelta teꞌ puerta chiꞌ dꞌa spatic. 7 Ix yalan vin̈:

—Ex vetanimail, tzin tevi dꞌayex to man̈ e cꞌulej jun chucal chiꞌ. 8 Ay chavan̈ ebꞌ ix visil cobꞌestac, mantalaj vinac tzꞌecꞌ dꞌa spatic ebꞌ ix, syal vicꞌanelta ebꞌ ix dꞌayex yic tze cꞌulej icha e gana chiꞌ yedꞌ ebꞌ ix. Palta a yedꞌ ebꞌ vin̈ tic, max yal-laj, yujto ton̈ej ix jacan ebꞌ vin̈ dꞌa in pat tic, xchi vin̈ dꞌa ebꞌ vin̈.

9 Ix yalan ebꞌ vin̈:

—Man̈ acꞌoch a bꞌa, elan̈ dꞌa quichan̈. A ach tic chꞌoc chon̈abꞌil ach, ¿tom a ach ijan tzalaꞌ? A ticnaic ecꞌbꞌal ol ach quixtej dꞌa yichan̈ ebꞌ vin̈, xchi ebꞌ vin̈.

Ix och ijan ebꞌ vin̈ yecanel vin̈aj Lot chiꞌ yic scꞌoch ebꞌ vin̈ dꞌa teꞌ puerta chiꞌ, yic smacꞌanpoj teꞌ ebꞌ snaani. 10 Palta a chavan̈ ebꞌ ángel chiꞌ, ix yaqꞌuelta scꞌabꞌ ebꞌ yic tzꞌicꞌjioch vin̈aj Lot chiꞌ yuj ebꞌ dꞌa yol pat chiꞌ, ix smacanelta teꞌ puerta chiꞌ ebꞌ. 11 Ix yacꞌan qꞌuicꞌyatax ebꞌ anima ayecꞌ dꞌa patic pat chiꞌ ebꞌ, ebꞌ icham vinac yedꞌ ebꞌ quelemtac, ix te cꞌunbꞌi ebꞌ sayanecꞌ stiꞌ teꞌ pat chiꞌ. 12 Ix lajvi chiꞌ, ix yalan ebꞌ chavan̈ chiꞌ dꞌa vin̈aj Lot:

—Tato ayto ebꞌ ay uj a bꞌa yedꞌoc dꞌa tic, ebꞌ vin̈ uninal, ebꞌ ix isil, ebꞌ a n̈iꞌ, ma ebꞌ a cꞌabꞌoc, iqꞌuel ebꞌ dꞌa tic. 13 Yujto ol co satel jun chon̈abꞌ tic. Yujto ix teꞌ qꞌuecꞌoch schucal ebꞌ dꞌa yichan̈ Jehová, yuj chiꞌ on̈ scheccoti yic tzul co satel juntzan̈ anima tic, xchi ebꞌ ángel chiꞌ.

14 Yuj chiꞌ, ix bꞌat vin̈aj Lot chiꞌ yal dꞌa ebꞌ vin̈ dꞌin̈an yicꞌlan sbꞌa yedꞌ ebꞌ ix yisil chiꞌ, ix yalan vin̈:

—Pilec eyip, con̈ elec, yujto a jun chon̈abꞌ tic ol satel yuj Jehová, xchi vin̈ dꞌa ebꞌ.

Palta maj schalaj yabꞌ ebꞌ tas ix yal vin̈aj Lot chiꞌ. Ton̈ej spuchan vin̈ snaan ebꞌ. 15 Palta axo yic vanxo sacbꞌi, ix yalan ebꞌ ángel chiꞌ dꞌa vin̈aj Lot chiꞌ:

—Pil ip tato max yal a cꞌol tzach satel yedꞌ jun chon̈abꞌ tic. Icꞌbꞌat ix etbꞌeyum tic yedꞌ ebꞌ ix isil tic schavan̈il, xchi ebꞌ dꞌa vin̈.

16 Palta a vin̈aj Lot chiꞌ, max spil-laj yip vin̈ yeli. Yuj chiꞌ a ebꞌ ángel chiꞌ ix quetzan scꞌabꞌ ebꞌ schan̈van̈il, yic tzꞌicꞌjiel ebꞌ, yujto tzꞌocꞌ scꞌol Jehová dꞌa ebꞌ. Icha chiꞌ ix aj yicꞌjiel vin̈aj Lot yedꞌ ix yetbꞌeyum yedꞌ ebꞌ ix yisil dꞌa yol chon̈abꞌ chiꞌ. 17 Ayic toxo ix el ebꞌ dꞌa stiel chon̈abꞌ chiꞌ, ix yalan junoc ebꞌ ángel chiꞌ dꞌa ebꞌ:

—Yelcꞌolal tzex bꞌati, man̈ ex meltzajcot qꞌuelan dꞌa e patic. Man̈ ex och vaan e bꞌey dꞌa jun acꞌlic tic, qꞌuean̈ec dꞌa jolomtac vitz, tato max yal e cꞌol tzex sateli, xchi dꞌa ebꞌ.

18 Ix tacꞌvi vin̈aj Lot chiꞌ:

—Maay mamin, yuj val dios dꞌayex. 19 Te nivanxo e vachꞌcꞌolal ix e chꞌox dꞌayin, ina ix in eyiqꞌuelta yic max in chami. Palta max yal-laj in bꞌatcan dꞌa jolomtac vitz chiꞌ, tecan tzin yamchajcꞌoch yuj jun yaelal chiꞌ, tzin chami. 20 A dꞌa slacꞌanil tic ay jun yuneꞌ chon̈abꞌ, tzam yal in bꞌatcan dꞌay. ¿Tom max yalaꞌ tzin e chabꞌat taꞌ yic tzin col in bꞌa? Val yel yunen̈ej jun chon̈abꞌ chiꞌ, xchi vin̈aj Lot chiꞌ.

21 Ix yalan jun ángel chiꞌ:

—Toxo ix vabꞌi, yicꞌocabꞌ icha tzal chiꞌ. Man̈ ol in satel jun chon̈abꞌ ix al chiꞌ. 22 Elan̈chamel e bꞌati, yujto malaj tas syal in bꞌoani ta maxto ex cꞌoch taꞌ, xchi jun ángel chiꞌ.

Yuj chiꞌ Zoar^* ix sbꞌiejcan jun chon̈abꞌ chiꞌ.

23 Ayic van sjavi cꞌu ix cꞌoch vin̈aj Lot chiꞌ dꞌa jun chon̈abꞌ chiꞌ. 24 Ix lajvi chiꞌ ix yacꞌancot cꞌacꞌ Jehová yedꞌ azufre dꞌa satchaan̈ dꞌa yibꞌan̈ chon̈abꞌ Sodoma yedꞌ Gomorra chiꞌ. 25 Ix satel juntzan̈ chon̈abꞌ chiꞌ yedꞌ masanil ebꞌ cajan dꞌay yedꞌ masanil jun nivan acꞌlic chiꞌ yedꞌ tas sqꞌuibꞌ dꞌay. 26 A ix yetbꞌeyum vin̈aj Lot chiꞌ, najat tzacꞌanto scot ix, ix meltzajxicanbꞌat qꞌuelan ix dꞌa spatic. Ataꞌ ix ochcan ix atzꞌamil.

27 Axo dꞌa yevial slolon vin̈aj Abraham yedꞌ Jehová, dꞌa qꞌuin̈ibꞌalil, ix bꞌat vin̈ bꞌaj lolon ebꞌ chiꞌ. 28 Axo ix yilan vin̈ to a Sodoma yedꞌ Gomorra yedꞌ masanil jun acꞌlic chiꞌ, bꞌacaquixon̈ej sqꞌue stabꞌil icha sqꞌue stabꞌil junoc nivan horno. 29 Ayic ix satjiel juntzan̈ chon̈abꞌ chiꞌ yuj Dios dꞌa jun nivan acꞌlic bꞌaj ix ecꞌ cajan vin̈aj Lot chiꞌ, ix snaancot Dios tas ix scꞌan vin̈aj Abraham, yuj chiꞌ ix colchaj vin̈aj Lot chiꞌ dꞌa scal jun nivan yaelal chiꞌ.

30 Ix lajvi chiꞌ, ix xiv vin̈aj Lot scajnaj dꞌa chon̈abꞌ Zoar chiꞌ, yuj chiꞌ ix qꞌuecan vin̈ dꞌa jolomtac vitz yedꞌ ebꞌ ix yisil schavan̈il, ix cajnaj ebꞌ dꞌa yol jun qꞌuen n̈aqꞌueen. 31 Ay jun cꞌual ix yal ix bꞌabꞌel ix dꞌa ix snulej:

—A vin̈ co mam tic, te ichamxo vin̈, malaj junoc vinac dꞌa jun lugar tic syal quicꞌlan co bꞌa yedꞌoc icha sbꞌeybꞌal ebꞌ anima. 32 Yuj chiꞌ cacꞌ yucꞌ an̈ vin̈ co mam tic, yic ol on̈ vay yedꞌ vin̈, yic vachꞌ ol can yin̈tilal vin̈ quedꞌoc, xchi ix.

33 A dꞌa jun acꞌval chiꞌ, ix yacꞌ an̈ ebꞌ ix yucꞌ vin̈, ix qꞌue an̈ dꞌa sjolom vin̈. Yuj chiꞌ a ix bꞌabꞌel ix, ix vay yedꞌ vin̈. Maj yabꞌ vin̈ janicꞌ ix vay ix yedꞌoc, maj yabꞌpax vin̈ janicꞌ ix qꞌuexvan ix dꞌa stzꞌey. 34 Axo dꞌa junxo cꞌu ix yalan ix bꞌabꞌel chiꞌ dꞌa ix snulej chiꞌ:

—A qꞌuiqꞌui dꞌacꞌval ix in vay yedꞌ vin̈ co mam tic, axo ticnaic cacꞌxi an̈ yucꞌ vin̈ yic vachꞌ tzach vay yedꞌ vin̈ yic ol can yin̈tilal vin̈ quedꞌ co chavan̈il, xchi ix. 35 Yuj chiꞌ dꞌa jun acꞌval chiꞌ, ix yacꞌanxi an̈ ebꞌ ix yucꞌ vin̈ smam chiꞌ, axo ix schabꞌil chiꞌ ix vay yedꞌ vin̈. Palta a vin̈aj Lot chiꞌ, maj yabꞌ vin̈ janicꞌ ix vay ix yedꞌoc, maj yabꞌpax vin̈ janicꞌ ix qꞌuexvan ix. 36 Icha chiꞌ ix aj yochcan ebꞌ ix yisil vin̈ chiꞌ schavan̈il yabꞌixal yuuj. 37 A ix bꞌabꞌel, ix alji yuneꞌ ix, Moab ix yacꞌ ix sbꞌiej, aton vin̈ aycan yin̈tilal ebꞌ moabita ticnaic. 38 Ix aljipax yuneꞌ ix schabꞌil chiꞌ, Ben-ammi, ix yacꞌ ix sbꞌiej, aton vin̈ aycan yin̈tilal ebꞌ amonita ticnaic.