—Ach mamin, tato vachꞌ in tzilaꞌ, tzin tevi dꞌayach to man̈ bꞌen̈ejoc tzex eqꞌui. 4 Tan̈vejec, bꞌat valaꞌ yic tzꞌicꞌchajcot jabꞌoc a aꞌ yic tze bꞌiquel eyoc, tzeyicꞌan eyip dꞌa yich te teꞌ tic. 5 Yacbꞌan ayex ecꞌ dꞌa in tzꞌey tic, tzin bꞌat vicꞌcot jabꞌoc tas ol e va, yic vachꞌ tzꞌoch eyip, ichato chiꞌ ol ex bꞌatxoc, xchi vin̈ dꞌa ebꞌ.

—Ixic an, xchi ebꞌ dꞌa vin̈.

6 Ix ochbꞌat lemnaj vin̈ dꞌa yol smantiado. Ix yalan vin̈ dꞌa ix Sara icha tic:

—Lem, icꞌcot junoc coxtal ixim harina te vachꞌ, tza bꞌoan jantacoc pan staji dꞌa cal tzacꞌacꞌ, xchi vin̈ dꞌa ix.

7 Ix bꞌat lemnaj vin̈ bꞌaj ay nocꞌ svacax, ix bꞌat yicꞌancot jun nocꞌ quelem vacax vin̈ te vachꞌ, ix yacꞌan nocꞌ vin̈ dꞌa jun vin̈ schecabꞌ yic sbꞌo nocꞌ vin̈ dꞌa elan̈chamel yic schichaj nocꞌ. 8 Ix yicꞌancot mantequilla vin̈ yedꞌ lech yedꞌ nocꞌ chibꞌej ix bꞌochaj chiꞌ, ix yicꞌanbꞌat vin̈ dꞌa yichan̈ ebꞌ yic sva ebꞌ. Yacbꞌan van sva ebꞌ chiꞌ, ix och tecꞌtecꞌ vin̈ dꞌa stzꞌey ebꞌ dꞌa yich te teꞌ chiꞌ.

9 Ix scꞌanbꞌan ebꞌ dꞌa vin̈ icha tic:

—¿Bꞌajtil ayecꞌ ix Sara ix etbꞌeyum? xchi ebꞌ.

—Ayoch ix dꞌa yol co mantiado tic, xchi vin̈ dꞌa ebꞌ.

10 Ix yalan junoc ebꞌ icha tic:

—Yabꞌ icha tic junabꞌ, svacꞌanxi a paxyal, ataꞌ ol aljoc junoc yuneꞌ ix etbꞌeyum tic, vinac unin, xchi dꞌa vin̈.

Yacbꞌan a ix Sara chiꞌ van smaclan yabꞌ ix tas syalaꞌ, ayecꞌ ix dꞌa stiꞌ smantiado ebꞌ dꞌa spatic vin̈aj Abraham chiꞌ. 11 A vin̈aj Abraham yedꞌ ix Sara chiꞌ te ichamtac animaxo ebꞌ. A ix Sara chiꞌ pecatax man̈xalaj yechel unin syil ix, 12 yuj chiꞌ ton̈ej ix tzevaj ix dꞌa yol scꞌool. Ayic ix yabꞌan ix yalji jun chiꞌ, ix snaan ix icha tic: ¿Tasto val ol aj in nibꞌanoch jun tic, ina te chichim inxo, te ichamxo pax vin̈ vetbꞌeyum? xchi ix.

13 Yuj chiꞌ ix yalan Jehová dꞌa vin̈ icha tic:

—¿Tas yuj ton̈ej stzevaj ix etbꞌeyum chiꞌ? ¿Tzam snaꞌ ix yujto chichimxo ix maxtzac yal yalji junoc yuneꞌ ix? 14 ¿Tom ay tas ajaltac dꞌayin tze naꞌa? Yabꞌ icha tic junabꞌ, tzin jax junelxo, svacꞌanxi a paxyal. Ataꞌ ol aljoc jun yuneꞌ ix Sara chiꞌ, vinac unin, xchi Jehová.

15 Ayic ix yabꞌan jun chiꞌ ix Sara chiꞌ, ix te xiv ix, ix yalan ix icha tic:

—Malaj in tzin tzevaji, xchi ix.

Axo ix tacꞌvi Jehová dꞌa ix icha tic:

—Vojtac to ix ach tzevaji, xchi.

16 Ix lajvi chiꞌ ix bꞌat ebꞌ oxvan̈ chiꞌ dꞌa sbꞌeal Sodoma. Ix bꞌat vin̈aj Abraham yedꞌ ebꞌ yic stacꞌlancan sbꞌa ebꞌ yedꞌ vin̈. 17 Ix yalan Jehová icha tic: Max yal-laj in cꞌubꞌanel dꞌa vin̈aj Abraham tic tas toxo ol in cꞌulej. 18 Ina to a vin̈ ol och smam yichamoc jun nivan nación te tecꞌan ol ajoc. Toxo ix vacꞌ in tiꞌ to yuj vin̈ ol schaꞌ in vachꞌcꞌolal masanil nación dꞌa yolyibꞌan̈qꞌuinal tic. 19 A in ix in siqꞌuelta vin̈, yic vachꞌ syalel in checnabꞌil vin̈ dꞌa masanil yuninal yedꞌ ebꞌ cajan yedꞌoc, yic vachꞌ scꞌanabꞌajej ebꞌ sbꞌeybꞌalan masanil tas vachꞌ yedꞌ tojolal, yic vachꞌ svaqꞌuelcꞌoch jantac in lolonel ix val dꞌa vin̈, xchi Jehová. 20 Yuj chiꞌ ix yalan dꞌa vin̈aj Abraham chiꞌ icha tic:

—Masanil anima ay dꞌa Sodoma yedꞌ dꞌa Gomorra, yalxon̈ej bꞌaj te chuc yel specal ebꞌ, axon̈ej val chucal scꞌulej ebꞌ. 21 A ticnaic, tic tzin bꞌat vilaꞌ, tato yel axon̈ej chucal chiꞌ scꞌulej ebꞌ icha tzꞌaj yalchaj chiꞌ dꞌayin yic ol vojtaquejeli tas yaji, xchi Jehová chiꞌ.

22 Ay chavan̈ ebꞌ bꞌen̈ej ix bꞌatcan dꞌa Sodoma, axo vin̈aj Abraham chiꞌ ix loloncan vin̈ yedꞌ Jehová. 23 Ix snitzanbꞌat jabꞌxo sbꞌa vin̈ dꞌa stzꞌey Jehová chiꞌ, ix scꞌanbꞌan vin̈ icha tic: ¿Tom ol a satel ebꞌ anima malaj smul yedꞌ ebꞌ ay smul? 24 Qꞌuinaloc ay 50-oc ebꞌ vachꞌ dꞌa jun chon̈abꞌ chiꞌ, ¿tom ol a satel ebꞌ? ¿tom man̈ ol acꞌ nivancꞌolal yuj ebꞌ 50 malaj smul chiꞌ? 25 Man̈ ol yal utan icha chiꞌ. Tato tza satel ebꞌ malaj smul yedꞌ ebꞌ ay smul chiꞌ, ichato lajan smul ebꞌ smasanil syal chiꞌ. Man̈ utej icha chiꞌ. A ach tic Juez ach dꞌa yolyibꞌan̈qꞌuinal tic, ¿tocval ol a cꞌulej junoc tas man̈ tojoloc? xchi vin̈ dꞌay.

26 Ix tacꞌvi Jehová dꞌa vin̈ icha tic:

—Tato ay 50-oc ebꞌ vachꞌ dꞌa chon̈abꞌ Sodoma chiꞌ, yuj ebꞌ svacꞌ nivancꞌolal masanil ebꞌ cajan dꞌa jun chon̈abꞌ chiꞌ, xchi.

27 Ix yalanxi vin̈aj Abraham chiꞌ icha tic:

—Acꞌ nivancꞌolal dꞌayin ach Vajalil yuj tas sval tic dꞌayach, yujto a in tic, anima inn̈ej. 28 Qꞌuinaloc ayxon̈ej ovan̈oc max tzꞌacvi 50 anima vachꞌ, ¿tom yujxon̈ej ovan̈ chiꞌ, tza satel jun chon̈abꞌ chiꞌ smasanil? xchi vin̈.

Ix tacꞌvixi Jehová icha tic:

—Tato ay 45-oc ebꞌ vachꞌ, max in satel-laj jun chon̈abꞌ chiꞌ, xchi.

29 Ix yalanxi vin̈aj Abraham chiꞌ icha tic:

—Qꞌuinaloc an̈ej 40-oc ebꞌ vachꞌ, xchi vin̈.

—Yuj ebꞌ 40 chiꞌ, man̈ ol in satel-laj jun chon̈abꞌ chiꞌ, xchi Jehová.

30 Ix yalanxi vin̈aj Abraham chiꞌ icha tic:

—Ach Vajalil tzin tevi dꞌayach, mocabꞌ cot oval svalan dꞌayach. Qꞌuinaloc an̈ej 30-oc ebꞌ vachꞌ tzꞌilchaj uuj, xchi vin̈.

Ix tacꞌvixi Jehová chiꞌ icha tic:

—A yuj ebꞌ 30 chiꞌ, ol vacꞌ nivancꞌolal jun chon̈abꞌ chiꞌ, xchi.

31 Axo vin̈aj Abraham chiꞌ ix ochn̈ej ijan vin̈ yalani:

—Mamin Vajalil, tzin tevi val dꞌayach, ¿tas tzutej ta axon̈ej 20-oc ebꞌ vachꞌ? xchi vin̈.

Ix tacꞌvixi Jehová chiꞌ icha tic:

—A yuj ebꞌ 20 chiꞌ, man̈ ol in satel-laj jun chon̈abꞌ chiꞌ, xchi.

32 Ix yalanxi vin̈aj Abraham chiꞌ:

—Acꞌval nivancꞌolal dꞌayin ach Vajalil, mocabꞌ cot oval dꞌayin, axon̈ej junel tic tzin tevi dꞌayach, man̈xa tas ol valaꞌ: ¿Tas tzutej, qꞌuinaloc tato axon̈ej lajun̈van̈oc ebꞌ vachꞌ sbꞌeybꞌal tzꞌilchaj uuj? xchi vin̈.

Ix yalanxi Jehová chiꞌ icha tic:

—Qꞌuinaloc ay lajun̈van̈oc ebꞌ vachꞌ sbꞌeybꞌal, man̈ ol in satel-laj jun chon̈abꞌ chiꞌ, xchi.

33 Axo ix lajvi slolon ebꞌ chiꞌ, ix bꞌat Jehová, ix smeltzajcan vin̈aj Abraham chiꞌ dꞌa smantiado.