—A in ton Dios in, syal vuj masanil, vachꞌn̈ej tzutej a bꞌa dꞌa vichan̈. 2 Ol vacꞌ jun in trato edꞌoc, tzijtum in̈tilal ol eloc, xchi.

3 Ix lajvi chiꞌ ix em n̈ojan vin̈aj Abram chiꞌ dꞌa sat luum yacbꞌan van slolon Dios yedꞌ vin̈. Ix yalan icha tic:

4 —Aton jun in trato tic ol vacꞌ edꞌoc: Ol ach och smam yichamoc tzijtumal nación. 5 Man̈xo ol a cuch Abram, palta Abraham xo^* ol a bꞌiej, yujto ol ach vacꞌoch smam yichamoc tzijtumal nación. 6 Tzijtum ol aj vicꞌanchaan̈ sbꞌisul in̈tilal, tzijtum nación ol pitzvoc yuj ebꞌ. A dꞌa scal in̈tilal chiꞌ, ay ebꞌ rey ol elta. 7 A jun in trato svacꞌ edꞌoc tic yedꞌ masanil ebꞌ in̈tilal chiꞌ to a Diosal in, sDiosal in pax ebꞌ in̈tilal chiꞌ dꞌa juneln̈ej. 8 A ticnaic paxyalvum ach dꞌa lum Canaán tic, palta masanil luum tic ol vacꞌ iquej yedꞌ ebꞌ in̈tilal dꞌa juneln̈ej, sDiosal in pax ebꞌ, xchi Jehová.

9 Ix yalanxi Dios dꞌa vin̈:

—A achxo tic, cꞌanabꞌajej jun in trato tic, yovalil scꞌanabꞌajej pax ebꞌ in̈tilal chiꞌ ayic ol bꞌeyn̈ejbꞌat tiempo. 10 A jun in trato van in bꞌoan tic eyedꞌoc to yovalil tze cꞌanabꞌajej. Masanil ebꞌ vinac unin, ochocabꞌ yechel snivanil ebꞌ. 11 Yuj chiꞌ icꞌjocabꞌel stzꞌumal sjolom svinaquil ebꞌ e vinac unin. A jun chiꞌ yechel in trato yaj eyedꞌoc. 12-13 Yucubꞌixial yaj junjun vinac unin tzꞌoch jun yechel chiꞌ dꞌa ebꞌ, vachꞌchom eyuninal ma yuninal ebꞌ e checabꞌ. Yovalil tzꞌacꞌjipaxoch jun yechel chiꞌ dꞌa ebꞌ e checabꞌ, ebꞌ manbꞌil dꞌa chꞌoc chon̈abꞌil. Yovalil tzꞌoch jun yechel chiꞌ dꞌayex, max yal yecꞌbꞌati. Icha chiꞌ bꞌian, a jun in trato tic eyedꞌoc nivan chequel ol aj dꞌa e nivanil dꞌa juneln̈ej. 14 Yaln̈ej mach junoc vinac to malaj jun yechel chiꞌ dꞌay, yovalil tzeyiqꞌuel dꞌa e cal, yujto max scꞌanabꞌajej in trato ix vacꞌ eyedꞌoc, xchi dꞌa vin̈.

15 Ix yalanxi Dios dꞌa vin̈aj Abraham chiꞌ icha tic:

—Ayic ol bꞌeybꞌat tiempo tic, man̈xo Sarai-oc ol sbꞌiej ix etbꞌeyum, palta Sara^* ol sbꞌiej ix. 16 Ol vacꞌ in vachꞌcꞌolal dꞌa yibꞌan̈ ix, ol aljoc junoc uninal yedꞌ ix. Val yel ol vacꞌ in vachꞌcꞌolal dꞌa yibꞌan̈ ix. Nunabꞌil ol aj ix dꞌa tzijtumal nación. Tzijtum ebꞌ vin̈ sreyal chon̈abꞌ ol elta dꞌa scal yin̈tilal ix chiꞌ, xchi.

17 Ayic ix yabꞌan jun chiꞌ vin̈aj Abraham chiꞌ, ix em n̈ojan vin̈ dꞌa sat luum, ix och ijan vin̈ stzevaji, ix och ijan vin̈ snaubꞌtan̈ani: ¿Tom olto aljoc vuninal? cien abꞌilxo in qꞌuinal, 90 abꞌilxo sqꞌuinal ix Sara, ¿tom olto val aljoc yuneꞌ ix? xchi vin̈. 18 Ix lajvi chiꞌ ix yalan vin̈ dꞌa Dios icha tic:

—Tzin cꞌan dꞌayach, tzoc el val dꞌa a cꞌool tzacꞌ sqꞌuinal vin̈aj Ismael tic yic vachꞌ ol elcꞌoch vin̈, xchi vin̈.

19 Ix tacꞌvi Dios chiꞌ dꞌa vin̈ icha tic:

—Toxo ix val dꞌayach to ol aljoc junoc uninal yedꞌ ix Sara. Isaac^* ol acꞌ sbꞌiej, aton yedꞌ vin̈ ol vaqꞌuelcꞌoch jun in trato tic dꞌa masanil qꞌuinal yedꞌ ebꞌ yin̈tilal vin̈. 20 A pax vin̈aj Ismael jun, toxo ix vabꞌ tas ix alaꞌ, ol vacꞌ in vachꞌcꞌolal dꞌa yibꞌan̈ vin̈, yuj chiꞌ tzijtum ol aj yin̈tilal vin̈. Ol qꞌuibꞌchaan̈ sbꞌisul yin̈tilal vin̈. A dꞌa scal yin̈tilal vin̈ chiꞌ, ol elta lajchavan̈ ebꞌ nivac yajal. A yin̈tilal vin̈ chiꞌ, nivac nación ol ajoc. 21 Palta a in trato ix vacꞌ edꞌoc, ol vaqꞌuelcꞌoch yedꞌ vin̈aj Isaac vin̈ uninal ol aljoc dꞌa ix Sara dꞌa junxo abꞌil icha tiempo tic, xchi Jehová.

22 Ayic ix lajvi slolon Dios yedꞌ vin̈, ix paxqꞌuei. 23 Aton dꞌa jun cꞌu chiꞌ ix schec vin̈aj Abraham acꞌjioch jun yechel chiꞌ dꞌa vin̈aj Ismael yedꞌ dꞌa masanil ebꞌ vin̈ schecabꞌ vin̈, ebꞌ aljinac dꞌa yol scuenta vin̈ yedꞌ masanil ebꞌ vin̈ manbꞌil yuj vin̈ yedꞌ masanil ebꞌ cajan yedꞌ vin̈. Ix acꞌjioch yechel ebꞌ smasanil, icha ix aj yalan Dios dꞌa vin̈. 24-25 A vin̈aj Abraham chiꞌ, 99 abꞌil sqꞌuinal vin̈, axo vin̈aj Ismael 13 abꞌil sqꞌuinal vin̈ ayic ix acꞌjioch jun yechel chiꞌ dꞌa ebꞌ vin̈. 26 A dꞌa jun cꞌu chiꞌ ix acꞌjioch jun yechel chiꞌ dꞌa ebꞌ vin̈ schavan̈il 27 yedꞌ dꞌa masanil ebꞌ vin̈ ayecꞌ yedꞌ vin̈aj Abraham chiꞌ, ebꞌ schecabꞌ vin̈ aljinac dꞌa yol scuenta yedꞌ ebꞌ manbꞌil yuj vin̈ dꞌa juntzan̈xo chꞌoc chon̈abꞌil.