Yaljubꞌal vin̈aj Ismael
16
A ix Sarai, yetbꞌeyum vin̈aj Abram, max unevilaj ix, palta ay jun ix scriada ix manbꞌil yuuj, aton ix Agar, ix aj Egipto. 2 Ix yalan ix Sarai dꞌa vin̈ yetbꞌeyum chiꞌ icha tic:—Ina malaj vuneꞌ syacꞌ Jehová, yuj chiꞌ tzin tevi dꞌayach to tzach vay yedꞌ ix in criada tic, talaj tzꞌalji junoc yuneꞌ ix yic tzꞌoch vuneoc, xchi ix.
Ix scꞌanabꞌajan vin̈aj Abram tas ix yal ix chiꞌ. 3 Slajun̈ilxo abꞌil ayecꞌ ebꞌ dꞌa Canaán, ix yacꞌanoch ix scriada ix chiꞌ dꞌa yol scꞌabꞌ vin̈ yetbꞌeyum chiꞌ, yic tzꞌoch ix schabꞌiloc yetbꞌeyum vin̈. 4 Ayic ix vay vin̈aj Abram yedꞌ ix Agar chiꞌ, ix scuchcanoch yuneꞌ ix. Axo ix yabꞌan ix to yedꞌnacxo yuneꞌ ix, ix spaticanel ix Sarai chiꞌ ix, man̈xalaj tzꞌoch ix dꞌa ix. 5 Ix lajvi chiꞌ, ix yalan ix Sarai dꞌa vin̈aj Abram chiꞌ icha tic:
—Uujn̈ej emnaquil tzin yutejcan ix in criada tic. Tic pax ix vacꞌ ix etbꞌeyumoc, axo ticnaic yujto ix yabꞌ ix to yedꞌnacxo yuneꞌ ix, tzin spaticanel ix. Vachꞌ tzon̈ schꞌolbꞌitej Jehová, ¿tom a ach ay a mul, mato a in? xchi ix Sarai chiꞌ. 6 Ix tacꞌvi vin̈aj Abram chiꞌ icha tic:
—A ix a criada tic, yol a cꞌabꞌ ayoch ix. A ach tza naꞌ tas tzutej ix, xchi vin̈ dꞌa ix. Yuj chiꞌ ix och ix Sarai ajcꞌolal dꞌa ix masanto ix elta ix. 7 Palta axo Yángel Jehová ix schalaj sbꞌa yedꞌ ix dꞌa tzꞌinan luum dꞌa slacꞌanil jun a aꞌ bꞌaj sbꞌatcan sbꞌeal Sur dꞌa yol yic Egipto. 8 Ix scꞌanbꞌan dꞌa ix icha tic:
—Ach Agar, scriada ix Sarai, ¿bꞌajtil a petoj? ¿bꞌajtil tzach bꞌati? xchi dꞌa ix.
—To tzin el dꞌa ix Sarai, ix in patrona, xchi ix.
9 Ix yalan Yángel Jehová chiꞌ dꞌa ix icha tic:
—Meltzajan̈ dꞌa ix a patrona chiꞌ, emnaquil tzutej a bꞌa dꞌa ix, xchi dꞌa ix.
10 Ix yalanpax Yángel Jehová chiꞌ:
Ol vicꞌchaan̈ sbꞌisul in̈tilal, malaj mach ol yal sbꞌisani.
11 Ayxo unin edꞌnac, yuj chiꞌ ayic ol aljoc jun uneꞌ chiꞌ, Ismael* ol acꞌ sbꞌiej, yujto ix yabꞌ Jehová ocꞌ yuj a cuscꞌolal.
12 Icha nocꞌ nocꞌ te itzꞌat ol aj jun uneꞌ chiꞌ, icha junoc nocꞌ caltacteꞌal bꞌuru. Ol yacꞌ oval vin̈ yedꞌ ebꞌ anima, ol yacꞌanpax oval ebꞌ anima yedꞌ vin̈. Ol cajnaj vin̈ bꞌaj syacꞌ sgana, vachꞌchom max schalaj scꞌol ebꞌ ayto yuj sbꞌa chiꞌ yedꞌoc, xchi jun ángel chiꞌ.
13 Yujto ix lolon ix Agar chiꞌ yedꞌ Jehová, yuj chiꞌ icha tic ix yacꞌ ix sbꞌioc Jehová chiꞌ: A Dios Tzin ilani. Ix yalan ix icha tic: Toton val yel ix vil Dios tzin ilani, xchi ix. 14 A aꞌ ucꞌbꞌilaꞌ yic Dios Pitzan, Jun Tzin Ilani, icha chiꞌ ix yacꞌ ix sbꞌioc jun aꞌ ucꞌbꞌilaꞌ chiꞌ. A dꞌa scal Cades yedꞌ Bered, ataꞌ ay aꞌ. Ix lajvi chiꞌ ix meltzajxi ix bꞌaj aytaxoneqꞌui.