—Ach Abram man̈ ach xivoc, a in ol ach in coloꞌ, te nivan spac ol vacꞌ dꞌayach, xchi dꞌa vin̈.

2-3 Ix tacꞌvi vin̈aj Abram icha tic:

—Ach Jehová Vajalil, ¿tas val yopisio jun spac chiꞌ vuuj? Ojtac val to malaj junoc vuninal ix acꞌaꞌ yic ataꞌ svacꞌxican jantac tas ay dꞌayin, yuj chiꞌ a junoc in checabꞌ ol chaancan masanil tas ay dꞌayin, aton vin̈aj Eliezer aj Damasco, a vin̈ sat yaj dꞌa ebꞌ in checabꞌ smasanil, xchi vin̈.

4 Ix yalanxi Jehová dꞌa vin̈:

—Maay, a dꞌa junoc uninal ol canoc, man̈oclaj dꞌa vin̈ comon anima chiꞌ ol canoc, xchi dꞌa vin̈.

5 Ix lajvi chiꞌ, ix icꞌjielta vin̈ yuj Dios dꞌa stiꞌ smantiado, ix yalan dꞌa vin̈ icha tic:

—Qꞌuean̈ qꞌuelan dꞌa satchaan̈. Bꞌisto juntzan̈ cꞌanal chiꞌ naic, tato syal a bꞌisani. Ichaton chiꞌ ol aj sbꞌisul ebꞌ in̈tilal, xchi dꞌa vin̈. 6 Ix yacꞌoch vin̈aj Abram chiꞌ dꞌa scꞌool tas ix yal Jehová chiꞌ, yuj chiꞌ vachꞌ ix can vin̈ dꞌa yichan̈. 7 Ix yalanxi Jehová icha tic:

—A in ton Jehová in ach viqꞌuelta dꞌa chon̈abꞌ Ur dꞌa yol yic Caldea yic svacꞌ jun luum tic dꞌayach yic tziquej, xchi dꞌa vin̈.

8 —Palta ach Jehová Vajalil, ¿tas val tzꞌaj vojtacaneli tato sviquejcan jun luum tic? xchi vin̈aj Abram chiꞌ. 9 Ix yalanxi Jehová:

—Icꞌcot junoc nocꞌ cobꞌes vacax dꞌayin yedꞌ junoc nocꞌ chiva yedꞌ junoc nocꞌ chꞌac calnel, oxeꞌ abꞌil sqꞌuinal junjun nocꞌ. Tzicꞌanpaxcot junoc nocꞌ cuvajteꞌ yedꞌ junoc nocꞌ paramuch, xchi dꞌa vin̈.

10 Ix yicꞌcancot juntzan̈ nocꞌ nocꞌ chiꞌ vin̈ dꞌa yichan̈ Jehová chiꞌ, ix lajvi chiꞌ ix schapojan snan̈al junjun nocꞌ vin̈. Jilip nocꞌ ix can dꞌa stzꞌey jilipxo nocꞌ. Axo nocꞌ much chiꞌ, maj schapojejlaj snan̈al nocꞌ vin̈. 11 Tzꞌem nocꞌ ostoc dꞌa yibꞌan̈ nocꞌ, axo vin̈aj Abram chiꞌ spechan nocꞌ. 12 Ayic vanxo sqꞌuicꞌbꞌi, ix te sat scꞌol vin̈aj Abram chiꞌ svayi, ix ja jun nivan xivelal dꞌa yibꞌan̈ vin̈ yuj jun nivan qꞌuicꞌalqꞌuinal. 13 Ix lajvi chiꞌ ix yalan Jehová dꞌa vin̈:

—Yovalil tzojtaquejeli to a ebꞌ in̈tilal, ol bꞌatcan cajan ebꞌ dꞌa junocxo chꞌoc chon̈abꞌil, ol ochcan ebꞌ checabꞌoc, chan̈eꞌ ciento abꞌil ol ixtaj ebꞌ. 14 Palta a in ol vacꞌoch yaelal dꞌa yibꞌan̈ jun chon̈abꞌ bꞌaj ayoch ebꞌ checabꞌoc chiꞌ. Slajvi chiꞌ, ol elta ebꞌ yedꞌ jantac sbꞌeyumal. 15 Palta a ach tic juncꞌolal ol aj a chami ayic ol ach och icham vinaquil. 16 Chan̈ macan̈xo in̈tilal ix eqꞌui, ichato chiꞌ ol meltzajxicot ebꞌ dꞌa tic, yujto manto tzꞌacvoc schucal ebꞌ amorreo dꞌa tic, xchi Jehová.

17 Ayic dꞌacꞌvalilxo, ix schꞌoxan sbꞌa jun cꞌacꞌ culcon sqꞌuei, bꞌacaqui sqꞌue stabꞌil. Tzꞌecꞌ dꞌa scal nocꞌ nocꞌ chapoj yaj chiꞌ. 18 Aton dꞌa jun acꞌval chiꞌ ix sbꞌo strato Jehová yedꞌ vin̈aj Abram chiꞌ, ix yalan icha tic:

—A jun luum tic ol vacꞌ dꞌa ebꞌ in̈tilal, schacot lum dꞌa jun smelemal aꞌ dꞌa yic Egipto, masanto dꞌa aꞌ Éufrates, 19 aton sluum ebꞌ ceneo, ebꞌ cenezeo, ebꞌ cadmoneo, 20 ebꞌ hitita, ebꞌ ferezeo, ebꞌ refaíta, 21 ebꞌ amorreo, ebꞌ cananeo, ebꞌ gergeseo yedꞌ ebꞌ jebuseo, xchi dꞌa vin̈.