Ix colchajcanel vin̈aj Lot yuj vin̈aj Abram
14
1-2 A dꞌa jun tiempoal chiꞌ, ix yacꞌ oval cha macan̈ ebꞌ vin̈ rey. Jun macan̈ ebꞌ vin̈: Aton vin̈aj Amrafel sreyal Sinar, vin̈aj Arioc sreyal Elasar, vin̈aj Quedorlaomer sreyal Elam yedꞌ vin̈aj Tidal sreyal Goim. Junxo macan̈ ebꞌ: Aton vin̈aj Bera sreyal Sodoma, vin̈aj Birsa sreyal Gomorra, vin̈aj Sinab sreyal Adma, vin̈aj Semeber sreyal Zeboim yedꞌ vin̈ sreyal Bela, aton jun chon̈abꞌ Zoar ticnaic. 3 A ovan̈ ebꞌ vin̈ rey chiꞌ ix slajtiej sbꞌa ebꞌ vin̈, junxon̈ej ix yutej soldado ebꞌ vin̈ dꞌa jun acꞌlic scuch Sidim bꞌaj ay aꞌ mar Muerto ticnaic. 4 A ebꞌ vin̈ rey chiꞌ, slajchavilxo abꞌil yajoch ebꞌ vin̈ dꞌa yalan̈ smandar vin̈aj rey Quedorlaomer. Axo ix ecꞌ junxo abꞌil majxo yacꞌlaj qꞌuen tumin ebꞌ vin̈ syacꞌtaxon dꞌa vin̈. 5 Yuj chiꞌ dꞌa junxo abꞌil ix bꞌat vin̈ rey chiꞌ yedꞌ oxvan̈xo ebꞌ vin̈ rey ayoch yedꞌoc dꞌa yol yic Astarot Karnaim. Ataꞌ ix acꞌji ganar ebꞌ refaíta yuj ebꞌ vin̈. Ix acꞌjipax ganar ebꞌ zuzita yuj ebꞌ vin̈ dꞌa yol yic Ham. Ix acꞌjipax ganar ebꞌ vin̈ emita yuj ebꞌ vin̈ dꞌa yol yic Save-quiriataim. 6 Ix acꞌjipax ganar ebꞌ horeo yuj ebꞌ vin̈ dꞌa jun tzalan scuch Seir, ix pechji ebꞌ masanto dꞌa jun acꞌlic Parán, dꞌa slacꞌanil jun lum taquin̈ luum. 7 Ayic ix meltzajxi vin̈aj rey Quedorlaomer yedꞌ ebꞌ vin̈ ayoch yedꞌoc, ix javi ebꞌ vin̈ dꞌa En-mispat, an̈ejaꞌ jun lugar chiꞌ scuchanpax Cades. Ix satel masanil tas ay dꞌa yol yic ebꞌ amalecita yuj ebꞌ vin̈ yedꞌ tas ay dꞌa ebꞌ amorreo ay dꞌa yol yic Hazezon-tamar.8-9 Axo ovan̈ ebꞌ vin̈ rey, aton vin̈ yic Sodoma, vin̈ yic Gomorra, vin̈ yic Adma, vin̈ yic Zeboim yedꞌ vin̈ yic Bela, ix bꞌat ebꞌ vin̈ dꞌa acꞌlic Sidim. Ataꞌ ix yacꞌ oval ebꞌ vin̈ yedꞌ chan̈van̈xo ebꞌ vin̈ rey chiꞌ, aton vin̈aj Quedorlaomer, vin̈aj Tidal, vin̈aj Amrafel yedꞌ vin̈aj Arioc. 10 A dꞌa yacꞌlical Sidim chiꞌ, tzijtum bꞌajtac sqꞌueta jun asfalto te tzayayi. Yuj chiꞌ ayic ix bꞌat vin̈ sreyal Sodoma yedꞌ vin̈ yic Gomorra elelal, ay ebꞌ soldado ebꞌ ix bꞌatcan dꞌa scal asfalto chiꞌ, ay juntzan̈xo ebꞌ ix bꞌatcan elelal dꞌa jolomtac vitz.
11 A chan̈van̈ ebꞌ vin̈ rey ix acꞌan ganar chiꞌ, ix bꞌat ebꞌ vin̈ yiqꞌuelta masanil tas svaji yedꞌ masanil tas te ay stojol dꞌa Sodoma yedꞌ dꞌa Gomorra chiꞌ, ix bꞌat ebꞌ vin̈ bꞌian. 12 A vin̈aj Lot, scꞌabꞌ yoc vin̈aj Abram, cajan dꞌa Sodoma chiꞌ, ix icꞌjibꞌat vin̈ yuj ebꞌ vin̈ yedꞌ masanil tas ay dꞌay. 13 Palta ay jun vin̈ ixto yacꞌ ganar yeli, ix bꞌat yalan vin̈ dꞌa vin̈aj Abram vin̈ hebreo to ix icꞌjibꞌat vin̈aj Lot chiꞌ. A vin̈aj Abram chiꞌ cajan vin̈ dꞌa slacꞌanil juntzan̈ teꞌ ji dꞌa yol smacbꞌen vin̈aj Mamre vin̈ amorreo, yucꞌtac sbꞌa yedꞌ vin̈aj Escol yedꞌ vin̈aj Aner. A ebꞌ chiꞌ vachꞌ yacꞌan ebꞌ yedꞌ vin̈aj Abram chiꞌ.
14 Ayic ix yabꞌan vin̈aj Abram to ix icꞌjibꞌat vin̈aj Lot chiꞌ, ix smolbꞌan masanil ebꞌ schecabꞌ vin̈ cꞌaybꞌabꞌil dꞌa oval, aton ebꞌ ix alji dꞌa yol scuenta vin̈, 318 ebꞌ smasanil. Ix bꞌat ebꞌ dꞌa spatic ebꞌ chan̈van̈ rey chiꞌ masanto bꞌaj ay chon̈abꞌ Dan ticnaic, ataꞌ ix yamchaj ebꞌ yuj ebꞌ. 15 Axo dꞌacꞌvalil ix spojanbꞌat masanil ebꞌ svinac vin̈aj Abram chiꞌ, ix och ebꞌ vin̈ yacꞌ oval yedꞌ chan̈van̈ ebꞌ vin̈ rey chiꞌ. Ix pechji ebꞌ vin̈ yuj ebꞌ vin̈, masanto dꞌa Hoba dꞌa yichan̈bꞌat chon̈abꞌ Damasco ix cꞌoch ebꞌ vin̈. 16 Ix yicꞌanxiecꞌ vin̈aj Abram jantac tastac ix yiqꞌuecꞌ ebꞌ chiꞌ, ix ecꞌxican vin̈aj Lot yedꞌ masanil tas ay dꞌay yedꞌ pax ebꞌ ix ix yedꞌ juntzan̈xo ebꞌ ix icꞌjibꞌat yuj ebꞌ vin̈ rey chiꞌ.
Ix schalaj sbꞌa vin̈aj Melquisedec yedꞌ vin̈aj Abram
17 Ayic toxo ix acꞌji ganar vin̈aj rey Quedorlaomer yedꞌ ebꞌ vin̈ rey ayoch yedꞌoc yuj vin̈aj Abram chiꞌ, ix meltzajxi vin̈ yedꞌ ebꞌ ix colchajcan chiꞌ yuuj. Axo vin̈ sreyal Sodoma ix elta dꞌa yol bꞌe scha vin̈ dꞌa jun chꞌolan scuch Save, Chꞌolan yic ebꞌ Rey sbꞌi paxi. 18 A vin̈aj Melquisedec, sreyal Salem, sacerdoteal Dios Axon̈ej Nivan Yelcꞌochi, a vin̈ ix acꞌan ixim pan yedꞌ vino dꞌa vin̈aj Abram chiꞌ. 19 Ix yalan vachꞌ lolonel vin̈ dꞌa yibꞌan̈ vin̈ icha tic:
Yacꞌocabꞌ svachꞌcꞌolal Dios dꞌa ibꞌan̈, aton Dios Axon̈ej Nivan Yelcꞌochi, aton ix bꞌoan satchaan̈ yedꞌ sat luum.
20 Aljocabꞌ vachꞌ lolonel dꞌa Dios ix acꞌanoch ebꞌ ajcꞌol dꞌa yol a cꞌabꞌ, xchi vin̈ dꞌa vin̈aj Abram chiꞌ.
Ix lajvi chiꞌ, a jantac tastac ix yiqꞌuecꞌ vin̈aj Abram dꞌa ebꞌ vin̈ rey chiꞌ, ix yacꞌan sdiezmoal vin̈ dꞌa vin̈aj Melquisedec chiꞌ. 21 Axo ix yalan vin̈ sreyal Sodoma dꞌa vin̈aj Abram chiꞌ icha tic:
—An̈ej ebꞌ anima tzacꞌ meltzaj dꞌayin, axo masanil tastac, canocabꞌ dꞌayach, xchi vin̈.
22 Axo ix yalan vin̈aj Abram chiꞌ icha tic:
—Toxo ix vacꞌ in tiꞌ dꞌa Jehová, aton Dios Axon̈ej Nivan Yelcꞌochi, jun ix bꞌoan satchaan̈ yedꞌ yolyibꞌan̈qꞌuinal tic, 23 to malaj jabꞌoc tas scan dꞌayin, malaj val jabꞌoc chꞌal ma junoc chꞌan̈al xan̈abꞌ scan dꞌayin, yic vachꞌ man̈ ol alaꞌ to uuj tzin och bꞌeyumal. 24 Malaj jabꞌoc tas ix bꞌat viqꞌuecꞌ tic tzin nibꞌej scan dꞌayin, an̈ej tas ix sva ebꞌ in checabꞌ. Axo ebꞌ ajun vedꞌ tic, aton vin̈aj Aner, vin̈aj Escol yedꞌ vin̈aj Mamre, a ebꞌ vin̈ tic, schaocabꞌ yic ebꞌ vin̈.