Spojnac sbꞌa vin̈aj Abram yedꞌ vin̈aj Lot
13
Ayic ix el vin̈aj Abram yedꞌ ix yetbꞌeyum dꞌa Egipto chiꞌ yedꞌ masanil tas ay dꞌa vin̈, ix meltzaj ebꞌ dꞌa yol yic Neguev. Ix meltzajpax vin̈aj Lot yedꞌ ebꞌ. 2 A vin̈aj Abram chiꞌ, te bꞌeyumxo vin̈, ay qꞌuen oro, qꞌuen plata yedꞌ jantac nocꞌ nocꞌ dꞌa vin̈. 3 Ix elxi vin̈ dꞌa Neguev chiꞌ. Cꞌojancꞌolal ix cꞌochxi vin̈ dꞌa yol yic Betel bꞌaj ecꞌnac dꞌa sbꞌabꞌelal, aton dꞌa scal Betel yedꞌ Hai. 4 Ataꞌ bꞌobꞌilcan jun altar yuj vin̈ dꞌa yalan̈taxo. Ataꞌ ix yalxi sbꞌa vin̈ dꞌa Jehová.5 A vin̈aj Lot chiꞌ junn̈ej tzꞌecꞌ vin̈ yedꞌ vin̈aj Abram chiꞌ. Tzijtum pax nocꞌ scalnel vin̈ yedꞌ nocꞌ svacax. Tzijtum pax ebꞌ schecabꞌ vin̈. 6 Maxtzac yabꞌlaj lugar bꞌaj sva nocꞌ snocꞌ ebꞌ chiꞌ yujto te tzijtum nocꞌ. Yuj chiꞌ, maxtzac yal-laj junn̈ej tzꞌecꞌ ebꞌ. 7 A ebꞌ vin̈ stan̈vumal nocꞌ smolbꞌetz nocꞌ vin̈aj Abram chiꞌ, syacꞌ oval ebꞌ yedꞌ ebꞌ vin̈ stan̈vumal nocꞌ yic vin̈aj Lot chiꞌ. A dꞌa jun tiempoal chiꞌ, aytoecꞌ cajan ebꞌ cananeo yedꞌ ebꞌ ferezeo taꞌ. 8 Ay jun cꞌual ix yal vin̈aj Abram dꞌa vin̈aj Lot chiꞌ icha tic: Ina ayto cuj co bꞌa, man̈ vachꞌoc tato scacꞌ oval, vachꞌchom a ebꞌ stan̈vumal nocꞌ co molbꞌetzal nocꞌ tic, man̈ vachꞌoc tato syacꞌ oval ebꞌ. 9 Masanil jun lugar tic colan yaji. Syal a sicꞌlani bꞌajtil tzach cani, yic vachꞌ sco poj co bꞌa. Tato tzach elcan dꞌa yelcꞌoch chiꞌ, a inxo tzin ochcan dꞌa yochcꞌoch chiꞌ. Tato tzach ochcan dꞌa yochcꞌoch chiꞌ jun, a inxo tzin elcan dꞌa yelcꞌoch chiꞌ, xchi vin̈aj Abram chiꞌ dꞌa vin̈.
10 Ix bꞌat dꞌan̈an vin̈aj Lot chiꞌ dꞌa jun nivan acꞌlic ay dꞌa stiꞌ aꞌ Jordán masanto scꞌoch dꞌa chon̈abꞌ Zoar. Te yax sat jun acꞌlic chiꞌ yuj a aꞌ chiꞌ, lajan yilji icha jun avbꞌen teꞌ bꞌobꞌil yuj Jehová, icha yilji yol yic Egipto ix yil vin̈. Ayic ix sbꞌoan strato vin̈aj Abram yedꞌ vin̈aj Lot chiꞌ, manto satel-laj chon̈abꞌ Sodoma yedꞌ Gomorra yuj Jehová. 11 A jun acꞌlic dꞌa stiꞌ aꞌ Jordán chiꞌ ix sicꞌcanel vin̈aj Lot chiꞌ, ix bꞌat cajnaj vin̈ dꞌa stojolal bꞌaj sja cꞌu. Icha chiꞌ ix aj spojlan sbꞌa vin̈aj Abram yedꞌ vin̈aj Lot chiꞌ. 12 Yuj chiꞌ ix can vin̈aj Abram dꞌa yol smacbꞌen Canaán, axo pax vin̈aj Lot chiꞌ, ix cajnaj vin̈ dꞌa scal juntzan̈ chon̈abꞌ dꞌa yacꞌlical stiꞌ aꞌ Jordán, dꞌa slacꞌanil chon̈abꞌ Sodoma. 13 A dꞌa jun chon̈abꞌ chiꞌ, te chuc sbꞌeybꞌal ebꞌ anima, man̈ jantacoc chucal scꞌulej ebꞌ dꞌa yichan̈ Jehová.
14 Ayic toxo ix bꞌat vin̈aj Lot chiꞌ, ix yalan Jehová dꞌa vin̈aj Abram chiꞌ icha tic: A ticnaic ilbꞌat dꞌa ichan̈, dꞌa a patic yedꞌ dꞌa a tzꞌeytac. 15 Masanil juntzan̈ luum van ilanbꞌat chiꞌ, svacꞌ dꞌayach dꞌa juneln̈ej yedꞌ dꞌa ebꞌ in̈tilal. 16 Icha val spococal lum luum, malaj mach syal sbꞌisani, icha chiꞌ ol aj in̈tilal. 17 A ticnaic qꞌuean̈ vaan yic tza bꞌeytzitan yoc jun lum tic yedꞌ scꞌatul, yujto svacꞌ jun luum tic dꞌayach, xchi Jehová dꞌa vin̈.
18 Ix lajvi chiꞌ ix yicꞌanchaan̈ scampamento vin̈aj Abram chiꞌ, ix bꞌat cajnaj vin̈ dꞌa slacꞌanil juntzan̈ teꞌ ji dꞌa yol smacbꞌen jun vin̈ scuch Mamre dꞌa slacꞌanil chon̈abꞌ Hebrón. Ix sbꞌoan jun altar vin̈ bꞌaj syal sbꞌa dꞌa Jehová.