Ix sicꞌchajel vin̈aj Abram yuj Dios
12
Ayxotax yalan Jehová dꞌa vin̈aj Abram icha tic: Actejcan a lum tic yedꞌ jantac ebꞌ ay uj a bꞌa yedꞌoc yedꞌ ebꞌ ayecꞌ dꞌa spat a mam, ol ach bꞌat dꞌa jun luum ol in chꞌox dꞌayach. 2 A in̈tilal ol och nivac nacional vuuj, ol in chꞌoxan in vachꞌcꞌolal dꞌayach. Yelxo val nivan ol aj a bꞌinaji, uuj ol scha vachꞌcꞌolal masanil ebꞌ anima. 3 Ol vacꞌ in vachꞌcꞌolal dꞌa ebꞌ vachꞌ syutej sbꞌa dꞌayach, ol in catabꞌejpax ebꞌ chuc syutej sbꞌa. Uujn̈ej ol vacꞌ in vachꞌcꞌolal dꞌa yibꞌan̈ masanil ebꞌ anima dꞌa yolyibꞌan̈qꞌuinal tic, xchi Jehová chiꞌ.4-5 Yuj chiꞌ ix el vin̈aj Abram dꞌa yol yic Harán chiꞌ, icha ajnac yalancan Jehová dꞌa vin̈. 75 abꞌil sqꞌuinal vin̈ ayic ix el vin̈ dꞌa yol yic Harán chiꞌ. Ix yicꞌancot ix yetbꞌeyum vin̈ yedꞌoc, aton ix Sarai. Ix yicꞌpaxcot vin̈aj Lot vin̈, aton vin̈ yunin vin̈ yucꞌtac vin̈ chamnac. Ix yicꞌpaxcot ebꞌ schecabꞌ vin̈ yedꞌ jantac tas ix aj dꞌa vin̈ ayic ix ecꞌ vin̈ dꞌa Harán chiꞌ. Icha chiꞌ ix aj sja vin̈ dꞌa yol yic Canaán. 6 Ix cotn̈ej vin̈ dꞌa yol yic Canaán chiꞌ masanto ix javi vin̈ dꞌa Siquem bꞌaj ay jun teꞌ ji dꞌa yol yic More. A jun teꞌ chiꞌ chajul yuj ebꞌ cananeo cajan taꞌ. 7 Ataꞌ ix schꞌox sbꞌa Jehová dꞌa vin̈aj Abram chiꞌ, ix yalan dꞌa vin̈ icha tic: Masanil jun luum tic ol vacꞌ dꞌa ebꞌ in̈tilal, xchi dꞌa vin̈.
Yuj chiꞌ ix sbꞌo jun altar vin̈aj Abram chiꞌ dꞌa yichan̈ Jehová, yujto ataꞌ ix schꞌox sbꞌa dꞌa vin̈. 8 Ix lajvi chiꞌ, ix bꞌat vin̈ dꞌa tzalquixtac dꞌa snan̈al chon̈abꞌ Betel yedꞌ chon̈abꞌ Hai. Ataꞌ ix sbꞌoqꞌue smantiado vin̈. A chon̈abꞌ Betel chiꞌ, a dꞌa stojolal bꞌaj tzꞌem cꞌu ay. Ataꞌ ix sbꞌo junxo altar vin̈ yic syal sbꞌa vin̈ dꞌa Jehová. 9 Ix lajvi chiꞌ cꞌojancꞌolal ix cotxi vin̈ masanto ix javi vin̈ dꞌa yol yic Neguev.
Ix bꞌat vin̈aj Abram dꞌa Egipto
10 A dꞌa jun tiempoal chiꞌ, ix ja jun nivan vejel dꞌa jun lugar bꞌaj ayecꞌ vin̈aj Abram chiꞌ. Yuj chiꞌ ix bꞌat cajan vin̈ jun tiempoal dꞌa Egipto. 11 Ayic van scꞌoch vin̈ dꞌa Egipto chiꞌ, ix yalan vin̈ dꞌa ix yetbꞌeyum chiꞌ aton ix Sarai: A ticnaic ay jun tas tzin naꞌa: A ach tic te vachꞌ ilji. 12 Yuj chiꞌ ayic ol ach yilan ebꞌ vin̈ aj Egipto tic, ol am yal ebꞌ vin̈ icha tic: A ix tic yetbꞌeyum ton val vin̈ tic ix, yuj chiꞌ co mileccham vin̈ yic scan ix quedꞌoc, xcham ebꞌ vin̈. 13 Yuj chiꞌ sval dꞌayach to vanabꞌ ach alani, yic vachꞌ xajan ol in aj yuj ebꞌ vin̈, man̈ ol in smilcham ebꞌ vin̈ uuj, xchi vin̈ dꞌa ix.
14 Ayic ix cꞌoch vin̈ dꞌa Egipto chiꞌ, ix yilanoch ebꞌ vin̈ cajan taꞌ to a ix Sarai chiꞌ te vachꞌ yilji ix. 15 Ix yilanpax ebꞌ ay yopisio yedꞌ vin̈ rey to te vachꞌ yilji ix, ix bꞌat yalan ebꞌ vin̈ dꞌa vin̈ rey chiꞌ. Yuj chiꞌ ix yicꞌanbꞌat ix ebꞌ vin̈ dꞌa spat vin̈ rey chiꞌ.
16 Yuj ix Sarai chiꞌ, te xajan ix aj vin̈aj Abram yuj vin̈ rey chiꞌ. Tzijtum nocꞌ calnel, nocꞌ vacax, nocꞌ mam bꞌuru yedꞌ nocꞌ snun yedꞌ nocꞌ camello ix siaj dꞌa vin̈ yuj vin̈ rey chiꞌ. Ay pax ebꞌ vin̈ vinac yedꞌ ebꞌ ix ix, ix acꞌji schecabꞌoc vin̈. 17 Palta yujn̈ej ix, tzijtum yaelal ix javi dꞌa yibꞌan̈ vin̈ rey yedꞌ ebꞌ cajan yedꞌ vin̈ dꞌa spat yuj Jehová. 18 Yuj chiꞌ ix schec vin̈ rey chiꞌ avtajcot vin̈aj Abram chiꞌ, ix yalan vin̈ icha tic: ¿Tas yuj icha tic tzin utej? ¿Tas yuj maj al dꞌayin tato etbꞌeyum ix tic? 19 Ina ix alaꞌ to anabꞌ ix, yuj chiꞌ ix in na to tzꞌoch ix vetbꞌeyumoc. A ticnaic jun, icꞌbꞌat ix, ixiquec, xchi vin̈.
20 Ix lajvi chiꞌ ix yalan vin̈ rey chiꞌ dꞌa ebꞌ schecabꞌ to tzꞌicꞌjiel vin̈aj Abram dꞌa yol smacbꞌen Egipto chiꞌ yedꞌ ix yetbꞌeyum yedꞌ masanil tas ay dꞌa vin̈.