A jun nivan torre scuchan Babel
11
1-2 A dꞌa pecaꞌ, ayic toxo ix ecꞌ jun oval aꞌ mucvajum chiꞌ, junn̈ej tiꞌal syal ebꞌ anima. Ayic van sbꞌat ebꞌ dꞌa stojolal bꞌaj sjavi cꞌu, ix cꞌoch cajan ebꞌ dꞌa jun nivan acꞌlic dꞌa yol yic Sinar. Ataꞌ ix cajnaj ebꞌ. 3 Ay jun cꞌu ix yal-laj yabꞌ ebꞌ icha tic: Co bꞌoec lum ladrillo, sco mucan chacbꞌoc luum, xchi ebꞌ. A lum ix yacꞌlabꞌej ebꞌ sqꞌuexuloc qꞌuen qꞌueen. Axo spixul luum, ay jun sqꞌueta dꞌa yol luum, te tat, axo stacji, te tzatz tzꞌaji, asfalto sbꞌi, a jun chiꞌ ix yacꞌlabꞌej ebꞌ. 4 Ix lajvi chiꞌ, ix yalan ebꞌ vin̈ icha tic: Caqꞌuec quip co bꞌoec junoc co nivan chon̈abꞌ. Sco bꞌoanecpax junoc nivan torre, te chaan̈ tzꞌajqꞌue dꞌa satchaan̈ yic vachꞌ tzon̈ te bꞌinaji. Junxon̈ej scutej co bꞌa, man̈ ol on̈ saclembꞌat dꞌa yolyibꞌan̈qꞌuinal tic, xchi ebꞌ vin̈. 5 Axo Jehová ix emul yil jun chon̈abꞌ yedꞌ jun torre van sbꞌoan ebꞌ chiꞌ. 6 Ix yalan icha tic: Ix el yich jun munlajel yuj ebꞌ anima tic. Malaj tas scachanoch vaan ebꞌ vin̈ yic sbꞌoan ebꞌ tas nabꞌil yuuj, yujto junn̈ej chon̈abꞌil yaj ebꞌ, junn̈ej tiꞌ syal ebꞌ. 7 A ticnaic, con̈ emec dꞌa scal ebꞌ yic sco somchitan stiꞌ ebꞌ, yic vachꞌ man̈xo ol nachajel yuj ebꞌ tastac syal junjun, xchi Jehová chiꞌ.
8 Icha chiꞌ ix aj saclemcanbꞌat ebꞌ yuj Jehová dꞌa sat luum tic. Ix yactan ebꞌ sbꞌoan jun chon̈abꞌ chiꞌ. 9 Aton taꞌ ix somchajcanbꞌat stiꞌ ebꞌ anima chiꞌ yuj Jehová. Yuj chiꞌ ix saclemcanbꞌat ebꞌ dꞌa smasanil yolyibꞌan̈qꞌuinal tic. Yuj chiꞌ Babel* ix sbꞌiejcan jun chon̈abꞌ chiꞌ.
A ebꞌ yin̈tilal vin̈aj Sem
10 Aton yabꞌixal vin̈aj Sem tic: Schabꞌilxo abꞌil yecꞌbꞌat jun oval aꞌ mucvajum chiꞌ, ayic 100 abꞌilxo sqꞌuinal vin̈aj Sem, ix alji jun yuninal vin̈ scuchan Arfaxad. 11 Ix lajvi chiꞌ, 500 abꞌilto ix yil vin̈, ayto yuninal vin̈ yedꞌ yisil vin̈ ix alji.
12 35 abꞌil sqꞌuinal vin̈aj Arfaxad chiꞌ ayic ix alji jun yuninal vin̈ scuchan Sala. 13 Ix lajvi chiꞌ, 403 abꞌilto ix yil vin̈, ayto yuninal vin̈ yedꞌ yisil vin̈ ix alji.
14 30 abꞌil sqꞌuinal vin̈aj Sala chiꞌ ayic ix alji jun yuninal vin̈ scuchan Heber. 15 Ix lajvi chiꞌ, 403 abꞌilto ix yil vin̈, ayto yuninal vin̈ yedꞌ yisil vin̈ ix alji.
16 34 abꞌil sqꞌuinal vin̈aj Heber chiꞌ ayic ix alji jun yuninal vin̈ scuchan Peleg. 17 Ix lajvi chiꞌ, 430 abꞌilto ix yil vin̈, ayto yuninal vin̈ yedꞌ yisil vin̈ ix alji.
18 30 abꞌil sqꞌuinal vin̈aj Peleg chiꞌ ayic ix alji jun yuninal vin̈ scuchan Reu. 19 Ix lajvi chiꞌ, 209 abꞌilto ix yil vin̈, ayto yuninal vin̈ yedꞌ yisil vin̈ ix alji.
20 32 abꞌil sqꞌuinal vin̈aj Reu chiꞌ ayic ix alji jun yuninal vin̈ scuchan Serug. 21 Ix lajvi chiꞌ, 207 abꞌilto ix yil vin̈, ayto yuninal vin̈ yedꞌ yisil vin̈ ix alji.
22 30 abꞌil sqꞌuinal vin̈aj Serug chiꞌ ayic ix alji jun yuninal vin̈ scuchan Nacor. 23 Ix lajvi chiꞌ 200 abꞌilto ix yil vin̈, ayto yuninal vin̈ yedꞌ yisil vin̈ ix alji.
24 29 abꞌil sqꞌuinal vin̈aj Nacor chiꞌ ayic ix alji jun yuninal vin̈ scuchan Taré. 25 Ix lajvi chiꞌ, 119 abꞌilto ix yil vin̈, ayto yuninal vin̈ yedꞌ yisil vin̈ ix alji.
26 70 abꞌil sqꞌuinal vin̈aj Taré chiꞌ ayic ix alji jun yuninal vin̈ scuchan Abram. Ix lajvi chiꞌ, ix alji vin̈aj Nacor yedꞌ vin̈aj Harán, aton ebꞌ oxvan̈ yuninal vin̈aj Taré chiꞌ.
A ebꞌ yin̈tilal vin̈aj Taré
27 Aton yabꞌixal vin̈aj Taré tic: Aton vin̈ smam vin̈aj Abram, vin̈aj Nacor yedꞌ vin̈aj Harán. A vin̈aj Harán chiꞌ smam vin̈aj Lot. 28 Ix cham vin̈aj Harán chiꞌ dꞌa chon̈abꞌ Ur dꞌa yol yic Caldea, ayic mantzac cham vin̈aj Taré chiꞌ. A bꞌaj aljinac vin̈ chiꞌ, ataꞌ chamnacpax vin̈.
29 Ix yicꞌlan sbꞌa vin̈aj Abram yedꞌ ix Sarai. Axo vin̈aj Nacor ix yicꞌlaj sbꞌa yedꞌ ix Milca, yisil vin̈aj Harán, snulej sbꞌa ix yedꞌ ix Isca. 30 A ix Sarai chiꞌ max unevilaj ix. 31 Ix el vin̈aj Taré chiꞌ dꞌa chon̈abꞌ Ur dꞌa yol yic Caldea, yic scotcan vin̈ dꞌa yol yic Canaán yalani. Ix yicꞌancot vin̈ yuninal vin̈ yedꞌoc, aton vin̈aj Abram yedꞌ pax vin̈aj Lot, aton yixchiquin vin̈ yuninal vin̈aj Harán chamnac. Ix yicꞌpaxcot ix yalibꞌ vin̈, aton ix Sarai. Axo yic ix javi ebꞌ dꞌa chon̈abꞌ Harán, ix cajnajcan ebꞌ taꞌ. 32 A dꞌa Harán chiꞌ ix cham vin̈aj Taré chiꞌ. 205 abꞌil sqꞌuinal vin̈ ayic ix cham vin̈.