De rishcyit nu bzeeñ Agur
30
De nu nii riidz nu ricy ñi presis nu bzeeñ Agur,
iꞌñ Jaqué.
Ñgyoozh tonaꞌ la blazh fers ne̱.
Tonaꞌ la ratsiña̱ nañ lardo̱o̱.
¿Lac mod gagye̱e̱?
2 Naca̱ mbecy nu rila sac la shcab ni.
Rlyu nu a̱ꞌ naca̱ mbecy.
Sac la shcab ne̱ gal nu na cualcyer la mbecy.
3 Rila wangaca̱ de shcab nu druu lo de mbecy lily,
nunu rila wagad lagya̱ de coz ni Ñgyoozh.
4 ¿Cyu bi gup gal gyibaa?
¿Cyu bi bet nu bruu gal gyibaa?
¿Cyu gac cuꞌ yaa de bi nu druu?
¿Cyu gac tiish nisyudoo tub negy?
¿Cyu bzu bzaa ni gyishlombecy?
¿La la biñ nu gac gyicy de coz zeꞌ,
nunu la la iꞌñ mi?
Na mnii lo̱ benu rad lagy ru.
5 Dela riidz nu druu lo Ñgyoozh,
laab ni gac ñii.
Mi zeꞌ rcam dela mbecy nu cha lom nu cach lo dey lo losaꞌ yuuy.
6 Cueꞌ cyaañ ru riidz nim,
gun benu ni gyicy ru,
orzeꞌ shuu num ru,
nunu gabe nu nac ru mbecy rguu.
7 Ñgyoozh,
ya̱ diña̱ cyup zi coz lor.
Rlagya̱ nu cuic ru ñii ne̱ anzir nu gata̱.
8 Nu loga la cueꞌ zaan ru nu gaca̱ mbecy rguu.
Nu cyup,
ni cueꞌ zaan ru nu gaca̱ mbecy zi.
Ni cueꞌ zaan ru nu gaca̱ mbecy guaniꞌñ.
Nomaas gal nu gal ziꞌl ñi ne̱ cuic ru.
9 Gun benu gad sheñ gyel nap ne̱,
orzeꞌ dzi ga warishlo̱ lor.
Orzeꞌ ne̱e̱:
“¿Cyu ru Shuaan na?”
ne̱e̱.
Zeꞌ benu gaca̱ mbecy zi,
orzeꞌ dzi ga gyicya̱ gubaan.
Orzeꞌ gyicya̱ nu gruu gyel mbecy nir,
Ñgyoozh ne̱.
10 Rila cueꞌ nii zir ni tub moz lo la patro̱o̱ niy.
Benu ni gyicy ru,
orzeꞌ shiñ nii moz zeꞌ nir.
Orzeꞌ gzac zir nu nac coz nu mniir.
11 Yuꞌ mbecy nu rzaa lagy yu ni uz yu,
nunu wacuic dey gras ni ñaay.
12 Yuꞌ mbecy rnii tooy nu caacy iily la ub yu.
Zeꞌ laab tiem zeꞌ bded ruꞌ gaꞌ la nac yu mbecy bag.
13 Yuꞌ mbecy leꞌ nu rnii tooy nu gya zir zu ub yu.
Ñgya la ricy yu lo deꞌ zir mbecy.
14 Yuꞌ mbecy nu row yu coz nu cyiiñ ni mbecy zi
nu lay yu nu nañ gal nu na ruꞌ mandzicy o tub gyiscyiib.
Rzaꞌ lo lay mbecy zi nu yuꞌ gyishlombecy.
15 Zu cyup iꞌñ bily lach.
Rup laa ma rgyiiñ ma:
“Cuic ru gane̱,
cuic ru gane̱”,
rnii ma.
Yuꞌ chon lo coz,
mas gal tap ñi,
nu rila wagyel.
Gash lañ:
16 Nu loga,
wayel ni lugaar zeꞌ nu cha mbecy gut.
Nu cyup,
wayel ni tub biñ mñaa nu wangac gaal mdoo.
Nu chon,
wayel ni yu wach nu rlagy nis.
Nu tap,
wayel ni lyush gyi ily nu wayu.
17 Benu ca na tub mbecy wayicy cuen yu uz yu,
nunu gyigy nu naañ yu ñaay,
orzeꞌ rlagy ñi nu co byac urloy.
Zeꞌ lyash gow ma cuerp niy.
18 Chon coz,
mas gal tap ñi,
ricy ñi nu za du ica̱ nunu wagyet laga̱ cuen.
Gash lañ:
19 Nu loga la,
wagad lagya̱ lac mod rded psi lo bi.
Nu cyup,
wagad lagya̱ lac rded bily lat gyitaꞌ.
Nu chon,
wagad lagya̱ lac mod ryap dey nez nu chay lo nisyudoo nu barc.
Nu tap,
wagad lagya̱ lac mod rca yu gyeey biñ mñaa nu nac losaꞌy.
20 Ni mod ricy biñ mñaa nu wagyicy paa nu ñgyee.
Ral mi tuubaꞌ yu gyeey nu walab ñgyeem.
Orzeꞌ rgyiib ruꞌm ni de coz nu bicy mi.
Despuees orzeꞌ rniim:
“Ya̱ wangyicya̱ ni tub la coz a̱ꞌ nap”,
rniim.
21 Chon coz,
mas gal tap ñi,
ricy ñi nu rash bis gyishlombecy nunu wagagyeeñ.
Gash lañ:
22 Nu loga la,
wagagyeeñ ornu tub moz ryac yu rey nu gyub ic.
Nu cyup,
wagagyeeñ ornu shaadaꞌ la rad coz nu gow mbecy ton.
23 Nu chon,
wagagyeeñ ornu chelaa tub biñ mñaa dzaꞌ ic.
Nu tap,
wagagyeeñ ornu chuꞌ tub moz mñaa lugaar ni patro̱o̱ niñ.
24 Tap bañcyug miꞌ nu yuꞌ gyishlombecy,
tees siñ zir too ma gazeꞌ mbecy nu siñ too.
Gash lañ:
25 Nu loga la,
de bree.
Mas a̱ꞌ fert ma,
tees rguꞌ choow ma coz nu gow ma tiem zig.
26 Nu cyup,
dziidz nu yuꞌ Israeel.
Tonaꞌ la a̱ꞌ fert ma,
tees rzaa ma yuꞌ ma lat de gyitaꞌ.
27 Nu chon,
de gushagy.
Mas sac tub rey nu gyub ic de ma,
tees ricy ma marchaar gal nu ricy tub nac soldad.
28 Nu tap,
low.
Beñ biigy nu dub na ma,
tees rya mas gal loliꞌ ni rey.
29 Yuꞌ chon rey lily gyishlombecy,
o gal tap yu nu dzi leꞌ rzay.
Gash lañ:
30 Nu loga,
bishtoo nac ma rey ni de bañcyug,
nunu rila waruu chu ma mas cyur lo.
31 Nu cyup,
ngüel nu rulgyiꞌ.
Nu chon,
ndeꞌ chiib guzeey.
Nu tap,
ndeꞌ rey ornu rza nuy de soldad niy.
32 Benu bicy ton ru ornu bicy ru nu dzi lily nar,
benu bloo ic ru nu gyicy ru coz a̱ꞌ nap,
orzeꞌ gush shcab nu nac de coz nu bicy ru.
33 Benu fert la niid na lech,
orzeꞌ ruu cyezh reꞌñ.
Benu ye shi̱i̱ gyidiꞌñ na,
orzeꞌ gruu reñ.
Niꞌ ziꞌl ornu rzi lagy na lo losaꞌn,
zeꞌ druu nu shet yaan yu nu riidz.