SALMOS
De riidz nu rul de mbecy Israeel lo Ñgyoozh
Libro 1
Ca na mbecy nu dzi zir ni
1
Dzi ni de mbecy nu wayicy gal nu na consef nu rbic mbecy a̱ꞌ nap,
ni wagash yu nez ni de mbecy cyi,
ni wagac nuy de yu nu rgubdzaa Ñgyoozh,
2 sinu lo leey ni Ñgyoozh racyit lagy yu,
nunu dzi rel la rnii tooy nu nac ñii.
3 Yu zeꞌ nay gal nu na tub yag nu zub cuit gyoow.
Orzeꞌ yag zeꞌ rbic ñi uugy tiem niñ,
nunu lyag niñ rila wacsiiñ.
Orzeꞌ lat dela coz nu ricy yu gruu nap yu.
4 Tees de mbecy a̱ꞌ nap walab ni nay.
De yu zeꞌ nay gal na toop ni trig nu rneꞌ bi.
5 Ndeꞌ nu de mbecy a̱ꞌ nap waruu cacy dey ornu ri bee Ñgyoozh niy.
Ni de mbecy cyi wac chuꞌ dey lat de mbecy ni Ñgyoozh.
6 Zeꞌ Ñgyoozh rgüiim de coz nu ricy de mbecy nap.
Tees de mbecy a̱ꞌ nap,
ricy dey coz nu ricy ñi nu nit loy.