“Ru nac ru iꞌña̱”, na Ñgyoozh rab mi rey nim
2
¿Walab gaal nu ryach de mbecy nu walab mbecy ni Ñgyoozh?
¿Walab gaal nu leew la rboo ic dey de coz nu gyicy yu?
2 De rey nu yuꞌ gyishlombecy nu de yu nu zu riiñ bicy dey tub ziꞌl riidz
nu cush cya dey ich Ñgyoozh,
nunu rbish cya dey ich rey nu bloo sum.
3 Orzeꞌ rbish ti dey nu rniiy:
“Rlagy ñi shiꞌñ na coyunt nu ptiish mi toon,
nunu neꞌn de duu nu nag na”,
na dey.
4 Orzeꞌ Ñgyoozh,
biñ nu zub gal gyibaa,
gyigy num dey,
nunu gubdzaam yu.
5 Orzeꞌ shuu num dey nu gyel rzi lagy,
nunu chiib mi dey gyiꞌ nu tantaꞌ chaꞌ ic mi niy.
Orzeꞌ niim gab mi dey:
6 “Ya̱ bi bzu̱ rey ne̱ gyedz Sión,
zeꞌ nu zub bicy nu bzu chu̱ nu gac ne̱”,
nam.
7 Orzeꞌ na rey zeꞌ:
“Ya̱ ne̱e̱ lo dela mbecy de riidz nu mnii Ñgyoozh.
Mniim lo̱,
orzeꞌ nam:
‘Ru iꞌña̱.
Dzi na ya̱ gyicya̱ nu cui mbañ ru.
8 Bdiiñ lo̱.
Orzeꞌ ya̱ zeeña̱ de lo la mbecy nu yuꞌ gyishlombecy yaar,
nunu rica̱ dela lugaar ni gyishlombecy ganir.
9 Ornu shet yaar dey,
orzeꞌ gyicy nur yu gal nu ricy nu mbecy yangay nu byaa nu gyiib.
Gyicy nur dey gal nu ricy mbecy ornu rlaꞌy gyis’,
na Ñgyoozh”,
na rey nim.
10 Orzeꞌ na,
de ru rey gal nu de ru mbecy nu riib ic,
bicy der nu gyet lag ru cuen de nu nii,
nunu nap bicy cuidad der de coz nu rlyu̱u̱ nir.
11 Bdzib lagy lo Ñgyoozh,
nunu gash la bis ru lat nu ricy der coz nu rlagy mi.
12 Pca lagy der lom,
gun nis chaꞌ ic mi.
Orzeꞌ nit lo der.
Gun mi zeꞌ sij ziꞌl chaꞌ ic mi.
¡Dzi ni de mbecy nu rza lom nu cach loy lo de losaꞌ yuuy!