Riidz nu mnii Dabi lo Ñgyoozh ornu bruchuy lo iꞌñ yu Absolom
3
A̱ Ñgyoozh,
dzi ga byañ de losaꞌ yu̱u̱.
Zigy dey bish cyay icha̱.
2 Zigy dey rzat yu ya̱.
Orzeꞌ rniiy:
“Ñgyoozh wabo mbañ mi yu”,
rnii dey.
3 Tees,
ru,
Ñgyoozh nar gal na tub gyiib she nu soow cuerp ne̱ lo de rishdzidz.
Ru ricy ru nu ricy zily mbecy ya̱.
Ru nac ru biñ nu rbic baloor ne̱.
4 Ya̱ brish ti du̱ ru nu locyuub ru ya̱.
Orzeꞌ “O” mniir blocyuub ru ya̱
nese too bicy nu bzu chur nu ganir.
5 Ya̱ gugyita̱ nu dasa̱.
Orzeꞌ gal tuubaꞌ dzi risha̱ yaa.
Gun ru mñar ya̱.
6 Ya̱ wadziba̱ lo mas bee miily la mbecy nu bri loꞌ ya̱
par nu shet yaay ya̱.
7 Ñgyoozh,
bicy lal.
Bloo mbañ ya̱,
gun ru rbic ru cashtig ni de losaꞌ yu̱u̱.
Shet gash ru de mbecy a̱ꞌ nap zeꞌ.
8 Ru,
Ñgyoozh,
nac ru biñ nu rboo mbañ mbecy.
Nap bicy nu de mbecy nir.