29
Benu mbecy cyigy tooy,
wazaan yu nu gyicy nap mbecy yu.
Orzeꞌ tub sij ziꞌl dunuy tub mod nu wacaꞌ gyanap yu.
2 Ornu mbecy nap gyiyeeñ yu fushtiz,
orzeꞌ gyet lagy de mbecy.
Zeꞌ ornu gyub ic mbecy a̱ꞌ nap,
orzeꞌ gzuub tiꞌ de mbecy.
3 Benu mbecy gusht niy nu galy shcab niy,
orzeꞌ gyet lagy uz yu.
Zeꞌ benu gusht niy biñ mñaa gur rded,
orzeꞌ leew la nit lo gyel nap niy.
4 Rey gzu fert yu ledz yu ornu ricy yu gyel fushtiz niy.
Zeꞌ benu tub fushtiz “O” niiy nu cuic mbecy tiñ niy
par nu chay faboor ni yu zeꞌ,
orzeꞌ gnuy ledz yu.
5 Benu tub mbecy dub laa tiem ryabic yu gyel mbecy ni amig niy,
orzeꞌ ndeꞌ rishli nañ gal nu na nu rzuy caa ni amig zeꞌ niy.
6 De mbecy a̱ꞌ nap yet lag yu nañ caa ni de coz cyi nu ricy yu.
Zeꞌ de mbecy nap rul yu nunu yet lagy yu rded yu.
7 De mbecy nap nap rad lagy dey ca na nu seꞌñ nu nac mbecy zi.
De mbecy a̱ꞌ nap walagy dey gad lagy yu de coz zeꞌ.
8 Mbecy rgubdzaa ricy dey nu ryach dela mbecy gyedz.
Zeꞌ mbecy nu yuꞌ shcab ni ricy dey nu rcyaag yu ic mbecy.
9 Benu tub mbecy nu yuꞌ shcab ni cha riib yu cyi tub mbecy ton lo de fushtiz,
orzeꞌ mbecy ton rnii dza lay,
o nu rigy ziꞌl yu.
Orzeꞌ sac gyel fushtiz.
10 Benu mbecy yet lagy yu cut yu losaꞌy,
orzeꞌ rzi lagy yu lo de mbecy nu sac falt ni.
Zeꞌ mbecy nap wazaan yu nu shiñ zac mbecy nu sac falt ni.
11 Mbecy ton “O” rniiy nu chaꞌ ic yu.
Mbecy nu yuꞌ shcab ni rcyaag ic ub lay.
12 Benu tub fushtiz riib zily yu tub mbecy rguu,
orzeꞌ dela mbecy nu rbic consef niy nac dey mbecy a̱ꞌ nap.
13 Mbecy zi gal nu mbecy nu rshet gash losaꞌ saap dey losaꞌy
nu nac nu Ñgyoozh briic mi urloy nu gzac rup laay.
14 Benu tub rey nap ricy nuy de mbecy zi,
orzeꞌ tuñ tiem gzuy riiñ.
15 Benu shuu dun tub yu nguzh,
orzeꞌ gyicy na nu gad shcab niy.
Benu tub yu nguzh gash yu ca ziꞌl na nez nu rlagy ub yu,
orzeꞌ coy gyel mbecy ni ñaay.
16 Ornu mbecy a̱ꞌ nap gac yu fushtiz,
orzeꞌ niꞌ ziꞌl ryañ coz cyi.
Tees de mbecy nap zac dey nu nit lo de mbecy a̱ꞌ nap zeꞌ.
17 Pshuu nu der iꞌñ ru,
gun orzeꞌ dub laa tiem gyet lagy ru nu nac yu.
Gyicy yu nu zu cyit lagy ru nañ lardoor.
18 Benu de mbecy washet ic yu nu cuic Ñgyoozh nez nu chay,
orzeꞌ cha dzaa la dey.
Dzi ni mbecy nu zuub gyidag leey ni Ñgyoozh.
19 Wac gyicy nap ru tub moz nu riidz ziꞌl,
gun mas gyeñ yu,
tees wayicy cuen yu.
20 Dzi zir gruu nap tub mbecy ton
gazeꞌ tub mbecy nu wagash shcab ornu niiy.
21 Benu mbecy güii loy ni moz niy nese miiñ lay,
ornu moz zeꞌ gya guush yu,
orzeꞌ chuꞌy lugaar ni patro̱o̱ niy.
22 Mbecy dzaꞌ ic ricy yu nu rtub su mbecy losaꞌy,
nunu ricy yu zañ lo cyi.
23 Mbecy gyet gash yu nu nac gyel leꞌ niy.
Benu a̱ꞌ leꞌy orzeꞌ ca lagy mbecy loy.
24 Benu tub mbecy nac nuy gubaan,
orzeꞌ laab ub lay rshet ziy ub yu.
Mas reñ yu nu rzaa lagy mbecy niy nu nac coz nu bicy yu,
tees wacshuub ruꞌy coz nu bicy yu.
25 Dzi rishdzidz nu dzi sug ic mbecy
nu nac de coz nu rnii too losaꞌy nu nac yu.
Tees benu ricy cup yu consuel lo Ñgyoozh,
orzeꞌ zaab ic mi yu.
26 Zigy mbecy ryub dey faboor ni fushtiz.
Tees gyel fushtiz,
ndeꞌ gruuñ gal lo Ñgyoozh.
27 De mbecy nap wagyet lagy yu de mbecy a̱ꞌ nap.
Zeꞌ de mbecy a̱ꞌ nap wagyet lagy dey de mbecy nap.