28
Mbecy a̱ꞌ nap rza dziidz yu mas se cyu la zaab ich yu.
Se mbecy nap ricy cup dey baloor gal nu ricy cup biidz.
2 Ornu de tub nac mbecy nu losaꞌy ricy dey cyi,
orzeꞌ zaab rdza la fushtiz ni dey.
Zeꞌ benu lily na de fushtiz nunu yuꞌ shcab niy,
orzeꞌ ricy fert yu de mbecy nu riib ic yu.
3 Benu mbecy zi shet gash yu losaꞌ ziy,
orzeꞌ yu zeꞌ nay gal nu na tub gyey bi nu nit loñ de coz nu gow mbecy.
4 De yu nu wagyicy cuen leey,
de yu zeꞌ zay faboor ni de mbecy a̱ꞌ nap.
Zeꞌ de mbecy nu ricy paa nu leey,
de yu zeꞌ zay contr ni de mbecy a̱ꞌ nap.
5 Mbecy a̱ꞌ nap wagad lagy yu la coz gyel fushtiz.
Zeꞌ de yu nu ryub Ñgyoozh yet lag dey cuen delañ.
6 Nap zir nu gyel zi zun nunu gyicy na mod nu seꞌñ
gazeꞌ nu gac naa mbecy guaniꞌñ.
Zeꞌ wayicy na gal mod nu seꞌñ.
7 Yu feñ nu ricy yac nu leey,
yu zeꞌ nac yu mbecy nu yuꞌ shcab ni.
Zeꞌ yu nu rded nu mbecy nu se la la rcyiiñ,
yu zeꞌ rbooy gyel mbecy ni uz yu.
8 Benu tub mbecy cyaañ yu gyel nap
nu nac nu rbooy iꞌñ tiñ nu rbic yu rboo losaꞌy,
orzeꞌ gyel nap zeꞌ chañ yaa tuubaꞌ mbecy nu cyez yuñ lat de mbecy zi.
9 Benu tub mbecy wagyicy cuen yu leey ni Ñgyoozh,
na ornu rnii nuy mi,
orzeꞌ wagyet lagy mi.
10 Benu mbecy gyicy yu nu cha dza tub mbecy nap,
orzeꞌ gash yu nez a̱ꞌ nap,
orzeꞌ yu zeꞌ gyet lag yu nañ caa ni ub yu.
Zeꞌ mbecy nu sac falt ni,
dela coz nap gyeñ ñi yaay.
11 Mbecy guaniꞌñ rnii tooy nu dzi yuꞌ shcab ni ub yu.
Zeꞌ mbecy zi nu nap rad lagy la na mbecy nu rnii coz rishli,
yu zeꞌ rad lagy yu la mod nu na yu zeꞌ.
12 Ornu mbecy nap gyicy dey gan nu gyub ic yu,
orzeꞌ dela mbecy gyet lagy yu.
Zeꞌ ornu mbecy a̱ꞌ nap gyub ic yu dey,
orzeꞌ dela mbecy cach loy.
13 Waruu nap mbecy benu soow ruꞌy de cyi nu ricy yu.
Tees benu mbecy shuub ruꞌy de cyi nu ricy yu,
nunu benu neꞌy ñi,
orzeꞌ Ñgyoozh gashni lagy mi dey.
14 Dzi ni mbecy nu dub laa tiem rdzib lagy lo Ñgyoozh.
Tees benu mbecy gyicy cyigy yu nañ lardooy,
orzeꞌ yu zeꞌ zac yu coz deet.
15 Tub fushtiz a̱ꞌ nap nu riib ic mbecy zi
nay gal nu na tub biidz nu fert rbishti o tub os nu yad carer.
16 Benu tub fushtiz shet gash yu mbecy,
orzeꞌ nac yu mbecy ton.
Zeꞌ benu tub fushtiz rzi lagy yu lo de yu nu rzup nu nac mod nu walab seꞌñ,
orzeꞌ yu zeꞌ tuñ gyub ic yu.
17 Benu tub mbecy guꞌ falt niy nu biit yu losaꞌy,
orzeꞌ za dzaa lay gal gat lay.
Orzeꞌ ni tub la mbecy wac cueez dey yu.
18 Benu nac ru mbecy cacy,
orzeꞌ gruu nap ru.
Zeꞌ de mbecy nu shiñ ricy gyes saa dey.
19 Mbecy nu rlaꞌ yu gad sheñ coz nu gow yu.
Zeꞌ mbecy nu leew la rnit lo tiem,
yu zeꞌ gyel zi zuy.
20 Tonaꞌ la nap gyicy nu Ñgyoozh de mbecy nu ricy paa.
Zeꞌ benu tub mbecy rlagy yu nu dzach chup yu,
orzeꞌ yu zeꞌ waruuy lo cashtig.
21 A̱ꞌ nap benu chan faboor ni ca na tub mbecy.
Gun yuꞌ la be mbecy nu “O” rniiy nu gyicy yu coz a̱ꞌ nap
gyiꞌ nu gyicy yu gan mas tub coz miꞌ.
22 Mbecy nu ye rzac ryub yu mod nu dzach gyaguaniꞌñ yu.
Zeꞌ wagad lagy yu nu gyet gyel zi niy par lo.
23 Gyet zir lagy mbecy or gales gyiꞌ nu shuu dun yu,
gazeꞌ par nu ñgyabic na gyel mbecy niy.
24 Benu tub mbecy ricy gubaan yu coz ni uz yu o coz ni ñaay,
orzeꞌ rniiy:
“Ndeꞌ walab cyi na rniiy”,
orzeꞌ yu zeꞌ nay gal nu na mbecy nu rut losaꞌ.
25 Benu mbecy ye rzac yu,
orzeꞌ ndeꞌ gaal nu ricy ziꞌl ñi nu chucooy nu losaꞌy.
Zeꞌ benu mbecy gyicy cup yu consuel lo Ñgyoozh,
Shuaan na,
orzeꞌ ndeꞌ gyicy ñi nu gyicy yu gan gad la coz niy.
26 Benu mbecy gyicy cup yu consuel lo ub ziꞌl yu,
orzeꞌ tonaꞌ la ton nay.
Nap zir benu “O”,
niiy ni riidz ni mbecy nu yuꞌ zir shcab ni par ub yu.
27 Benu mbecy rbic yu coz ni mbecy zi,
orzeꞌ rila wayicy falt de coz niy.
Tees benu ca chu loy lo mbecy zi,
orzeꞌ zigy mbecy zaa lagy yu niy.
28 Ornu de mbecy a̱ꞌ nap riib ic yu,
orzeꞌ de mbecy cach lo dey loy.
Na ornu nit lo de mbecy a̱ꞌ nap zeꞌ,
orzeꞌ ryañ de mbecy ni Ñgyoozh.