27
Cueꞌ gyicy leꞌr nu nac coz nu gyicy ru ina,
gun wagad lagy ru la coz ruꞌña ina.
2 Nap zir benu reñaꞌ mbecy,
mas mbecy nu a̱ꞌ yu lo nap ru,
griib zily ruy.
Cueꞌ griib zily ru ub ru.
3 Dzi ye gyitaꞌ gal nu yu uzh.
Tees ye zir coz deet nu cheti nañ lardoon
nu nac de coz nu gyicy mbecy ton ornu rzi lagy yu.
4 Tonaꞌ la a̱ꞌ nap ricy ñi ornu rzi lagy mbecy.
Coz ily nit loñ gal nu ricy nis yu tiem nu dzi yet gyey.
Tees,
¿cyu gagye ornu mbecy ricy saap yu?
5 Nap zir nu shuu dun mbecy lo rgüii la losaꞌy
gazeꞌ nu caan yu tub mod ngach.
6 Nap zir benu tub amig nin cad güiiy ub na,
gazeꞌ nu tub losaꞌ yuun gow yu zañ chit lon.
7 Benu mbecy dza nañ yu,
orzeꞌ mas dziñ doo woꞌy.
Benu mbecy ran yu,
orzeꞌ mas coz lya dzi ya ish ñi,
rziiy.
8 Ornu mbecy ruuy yuꞌy,
orzeꞌ za dzaa lay.
Ricy yu gal nu ricy tub chigyiñ.
Ornu ruu ma lo teez ma,
za dzaa la ma.
9 Nis zguul ricy ñi nu yet lagy mbecy nañ lardooy.
Niꞌ ziꞌl consef ni tub mbecy ricy ñi nu yet lagy de amig niy.
10 Rila cueꞌ laa yaar de amig nir gal nu de amig ni uz ru.
Na tiem nu rac deet cueꞌ char lo bicy ru,
gun nap zir nu char lo tub amig nir nu rcyiiñ gaab ga,
gazeꞌ nu char lo tub famil nir nu rcyiiñ zet.
11 Yu feñ ne̱,
bicy nu gac ru mbecy nu yuꞌ shcab ni.
Orzeꞌ gyet lagya̱.
Gun orzeꞌ gad riidz nu ne̱e̱ lo de mbecy nu griib cyi ica̱.
12 Mbecy raso̱o̱,
ornu zac yu nu yad coz deet,
orzeꞌ ruu chuy loñ.
Zeꞌ mbecy nu wagnii too,
ornu rzac yu nu bi yad coz deet,
orzeꞌ zaab za lay.
Orzeꞌ zac deet dey nu nac ñii.
13 Benu tub mbecy yad booy tiñ lor,
zeꞌ tuubaꞌ mbecy neꞌ ic yu ni mbecy yad zeꞌ,
orzeꞌ mnii lo yu nu neꞌ ic niy nu rzeeñ yu shab yu gyiꞌ tiñ nir.
14 Benu tub mbecy ye la rbish tiy
nu gyabic yu gyel mbecy ni losaꞌy gabee cow nap la,
orzeꞌ yu guyuꞌ zeꞌ rnii tooy nu gul yu duu
nu nac nu rbish ti mbecy zeꞌ.
15 Tub biñ mñaa cyi ruꞌ
nam gal nu na ndzu̱j ni nis nu zaab rlag la tiem nu dzi yet gyey.
16 Nu gyicy na nu checa ruꞌm,
ndeꞌ nañ gal nu na nu gyicy na nu checa bi ornu druuñ,
o nu nañ gal nu na nu duꞌ yaan asecy.
Wac gyicy na de ndeꞌ.
17 Gal nu cyup gyiib rzub ñi losaꞌñ,
orzeꞌ rup laañ gya riꞌñ ñi,
niꞌ ziꞌl mod ornu cyup mbecy gagye dey lo losaꞌy.
Orzeꞌ rup gaa la dey gya nap yu.
18 Benu mbecy nap ricy nuy ya mni niy,
orzeꞌ gad uugy niñ gow yu.
Niꞌ ziꞌl benu tub moz nap ricy nuy patro̱o̱ niy,
orzeꞌ gyed gyel mbecy niy.
19 Ornu güiir lo nis,
orzeꞌ zac ru lor.
Niꞌ ziꞌl benu güiir nañ lardoor,
orzeꞌ zac ru lac mod nar.
20 De coz nu rlagy mbecy nañ gal na lugaar zeꞌ nu rya mbecy gut.
Dub laa tiem yuꞌ lugaar nu chuꞌ zañ zir mbecy.
Niꞌ ziꞌl dub laa tiem yuꞌ lugaar nu chuꞌ zañ zir gyel ye rzac lat de coz nu rlagy yu.
21 Gyi ricy ñi preb plat nu or ben a rishli nac ñii coz ga ub.
Niꞌ ziꞌl rac preb mbecy ornu de losaꞌy griib zily dey yu.
22 Mas gyicy nur mbecy ton gal nu ricy biñ mñaa nu uub nim nu rlaꞌm ñii
nunu driꞌm ñii lo gyech nim,
mas ni gyicy nur mbecy ton
tees wac cor coz ton nañ lardooy.
23 Nap bzu altant nu de shily nir gal nu de chigud nir.
24 Gun gyel nap,
ndeꞌ walab coz nu gzuñ tub la.
Nunu walab nu gyeñ gyel gubier yaa tub famil par tubla.
25 Ornu shiꞌñ ru gyizh nu gow bañcyug,
orzeꞌ grib iꞌñ ñi.
Na lat nu raly ñi,
orzeꞌ teꞌr gyizh nu nash logyiꞌ.
26 Shily rbic ma gyich nu gya shab ru.
Na ornu cut ru chiib nir,
orzeꞌ gad tiñ nu zir yu.
27 Nunu gad sheñ lech ni chiib nu goꞌr,
nunu goꞌ de famil nir,
nunu goꞌ de fiñ feñ nu ricy riiñ yuꞌr.