26
Walab seꞌñ nu griib zily na mbecy ton.
Ndeꞌ nañ gal nu na nu gyet gyey rag tiem zig,
o nu gyet gyey tiem nu rdudeꞌ cosech.
2 Se la la gyicy benu zaa lagy mbecy nir
benu walab ni rlagy ñi nu gyicy yu.
Riidz nu rnii dey
nañ gal nu na tub chigyiñ nu zaab lo bi nunu rila wayet ma.
3 Yuꞌ nu rlagy ñi nu shet ru cuart ritiiñ cuay.
Yuꞌ nu rlagy ñi nu gzuur fren ruꞌ bur.
Yuꞌ nu rlagy ñi nu gaaz ru mbecy ton.
4 Cueꞌ tush cyar riidz ton lo mbecy ton
nis gyac ru gal nu nay.
5 Ornu mbecy ton rnii ton yu,
orzeꞌ mnii coz nu laab ñi loy
nis nii tooy nu dzi coz ily nac ub yu.
6 Benu tub mbecy rnii nuy tub mbecy ton nu cha nuy tub raso̱o̱,
orzeꞌ ndeꞌ nañ gal nu na nu cyug yu tub gyiꞌy o nu goꞌy benen.
7 Gal nu mbecy chi̱ wacyiiñ gyiꞌy nu gzay,
niꞌ ziꞌl wacyiiñ riidz cyit nu driib ruꞌ mbecy ton.
8 Yu nu griib zily mbecy ton nay
gal nu na mbecy nu rcyiigy nicy yu gyitaꞌ nu ri nañ gushaal.
9 Mbecy ton ni wagyet lag yu cuen de riidz cyit nu rniiy.
Yu zeꞌ nay gal nu na mbecy rzugy.
Ni wagad lagy yu ryow gyech yaay.
10 Tub patro̱o̱ nu rbic riiñ gyicy mbecy ton,
o ni cyu ziꞌl mbecy nu rded,
yu zeꞌ nay gal nu na yu nu rgyit nu guaz.
Orzeꞌ rzeed ton lay gyech ni guaz niy.
Orzeꞌ cad güiiy de lo la mbecy.
11 Mbecy ton nu ricy coz ton tuubaꞌ tir
nay gal nu na tub che̱ꞌ nu cush ca ma lo coz nu guugy ma.
12 Dzi zir gruu nap ñi ni mbecy ton
gazeꞌ mbecy nu rzii nu lily na,
zeꞌ walab rishli lily nay.
13 Dzi yuꞌ rishtoꞌ lo ni mbecy zed.
Orzeꞌ rniiy:
“Wagac ru̱u̱,
gun dzi ga dzeela̱ tub biidz gyernez.
Waded la zu tub biidz”,
rniiy.
14 Gal nu cyudz rboyub yaroꞌ lo bisagr niñ,
niꞌ ziꞌl mod rbish cya mbecy zed lo daꞌ niy.
15 Mbecy zed guti yaay nañ gyaꞌn yu.
Ni wacuicaꞌy fers nu shuub ñi gal ruꞌy.
16 Mbecy zed rash yu shcab
nu siñ zir tooy gazeꞌ gagy mbecy nu rbic consef nap.
17 Ornu tub mbecy rneꞌ ruꞌy lat gyel chaꞌ ic ni tuubaꞌ mbecy,
orzeꞌ yu zeꞌ nay gal nu na mbecy nu rguꞌ yaa gyidag che̱ꞌ.
18,19 Benu tub mbecy guuy losaꞌy,
gazeꞌ nu niiy:
“Nu ricy ras ziꞌla̱”,
niiy,
orzeꞌ yu zeꞌ nay gal nu na mbecy ton
nu rgyit nuy suu dañ yu nu gac cut mbecy.
20 Benu sac yag,
orzeꞌ gyu gyi.
Benu sac riidz cuen,
orzeꞌ rzeca nu rzub mbecy losaꞌy.
21 Gyerboo rbooñ boo rely,
nunu yag rgaaly zir ñi gyi.
Niꞌ ziꞌl mbecy nu ricy deet ricy yu nu rzub mbecy losaꞌy.
22 Tonaꞌ la nap row rishcuen.
Nunu yet lagy na don ñi.
Tees gyet lag ñi gal zeꞌ nu gyi zir nin.
23 Riidz nu cyudz za nu rnii mbecy nu a̱ꞌ nap na nañ lardoo,
ndeꞌ nañ gal nu na barniis fin nu driily mbecy ich gur gyis la.
24 Mbecy rzi lagy lon ricy yu nu wagad lagy na nu rzi lagy yu nu nac de riidz nap nu driib ruꞌy.
Yu zeꞌ rzeti gyel rguu nañ lardooy.
25 Mas tonaꞌ la gugy za de riidz nu rniiy,
tees cueꞌ cheña lagy ru niy,
gun yu zeꞌ dza laa nañ lardooy yuꞌ coz a̱ꞌ nap.
26 Mas ryub yu mod nu cueꞌ gad lagy mbecy nu rzi lagy yu,
tees dela mbecy gzac yu de coz shiñ na nu gyicy yu.
27 Yu nu rzu caa nu gyet lag losaꞌ,
laab ub yu gyet lag yu nañ ñi.
Yu nu rtub gyitaꞌ too losaꞌ,
laab tooy cush cyañ.
Orzeꞌ cyich ñgyeꞌñ yu.
28 Yu nu rguu losaꞌ,
yu zeꞌ rishli wayet lagy yu yu nu rniiy lo.
Yu nu ryabic gyel mbecy ni losaꞌ,
yu zeꞌ rnuy losaꞌy.