Tub nacaꞌ rishcyit nu bzeeñ rey Salomoong
25
De nu nii riidz cyit ni Salomoong,
riidz cyit nu pcaa de mbecy nu zu riiñ lo rey Ezequías,
yu nu byub ic Judá.
2 Cuen ni Ñgyoozh benu soow mi lo la coz.
Zeꞌ cuen ni rey nu shaal yu de coz zeꞌ.
3 Gal nu wac gal naa baa nu tantaꞌ gya.
Niꞌ ziꞌl wac griin gal iiñ nisyudoo nu tantaꞌ gyi.
Niꞌ ziꞌl wac gad lagy na la na de coz nu yuꞌ nañ lardoo rey.
4 Benu loon toop nu yuꞌ lat plat,
orzeꞌ gruu gyiib nu bi zu lily par birgyiib.
5 Niꞌ ziꞌl benu loon mbecy a̱ꞌ nap nu yuꞌ lat de fushtiz ni rey,
orzeꞌ gad lagy mbecy nu riib ic yu nu gyel fushtiz.
6 Cueꞌ gyicy lily ru ub ru ornu zur lo rey.
Ni cueꞌ gzur zeꞌ nu rzu de mbecy lily,
7 gun cueꞌ nu co dey gyel mbecy nir
ornu shet yu ru lo rgüii la de yu lily.
Nap zir nu gyicy zily mbecy ru ornu rniiy:
“Gua zeꞌ nu yuꞌ mbecy lily”,
rniiy.
Benu gzac urlo lar tub coz,
8 cueꞌ nu dzi dzach char nu cuꞌr cyi lo de fushtiz.
Dzi ga grusu mbecy nu niiy nu walab rishli gal nu ru rniir.
Orzeꞌ gruu gyel mbecy nir.
Orzeꞌ wad lagy ru lac gyicy ru.
9 Benu ricy cup ru tub gyel dzaꞌ ic nu losaꞌr,
orzeꞌ yu zeꞌ ziꞌl go nur yu riidz.
Cueꞌ niir lo reñaꞌ mbecy,
10 nis nii mbecy nu nac ru mbecy cuen.
Orzeꞌ wacaa gaꞌ lagy mbecy lor par lo.
11 Cyit na de riidz nu rnii mbecy tiem nu rlagy ñi
gal nu cyit rabee nab mansan nu byaa nu or nu ri nañ tub chicyiw plat.
12 Dzi zir sac ñi ornu tub yu lily shuu nuy mbecy nu zuub gyidag
gazeꞌ tub biꞌ or o tub bec nu byaa nu or ga ub.
13 Tub yu nu ricy paa ornu rza nuy raso̱o̱ nap,
yu zeꞌ nay gal nu na nis rag
ornu dzi zig tiem nu rdudeꞌ cosech.
Orzeꞌ rbic yu fers ni patro̱o̱ niy tuubaꞌ tir.
14 Mbecy nu rnii nu waded la cuic la coz,
zeꞌ wabic yu,
yu zeꞌ nay gal nu na za nu yad nu bi nu washet ñi gyey.
15 Benu mbecy pase̱z nii nuy de fushtiz,
orzeꞌ gyicy yu gan nu cuugy yu lardooy.
Benu nu raso̱o̱ niiy,
orzeꞌ gyicy yu gan mas yu nu za contr niy.
16 Benu gyap ru dziñ doo,
orzeꞌ goꞌr dziñ ni ma gal mod nu rlagy ñi.
Na benu goꞌ shaad ru dziñ ni ma,
orzeꞌ tush cyañ nir.
17 Cueꞌ nu cyaꞌ char yuꞌ mbecy nu rcyiiñ nur gaab ga nis gazed yu lor.
Orzeꞌ gaduu lagy yu lor.
18 Dzi ga tañ riidz fals nu driib mbecy too losaꞌy.
Tañ ñii gal nu tañ mandzicy,
nu maz,
gal nu gyech nu rzeed mbecy nu guaz.
19 Benu grish lon lo mbecy wagyicy paa tiem nu rac deet,
ndeꞌ nañ gal nu na nu rdon gyit,
zeꞌ byalaa lay na,
o nañ gal nu na nu se tub laꞌ zi gyiꞌn rzan.
20 Nu dul ruꞌn lo tub mbecy nu rzac deet,
ndeꞌ nañ gal nu na nu loon shab yu tiem rag,
nunu nañ gal nu na nu riily na zed zeꞌ nu gud güii niy.
21 Benu losaꞌ yuur ran yu,
orzeꞌ briic coz nu gow yu.
Benu rbigy yu nis,
briic nis goꞌy.
22 Orzeꞌ gyicy ru nu gat loy.
Orzeꞌ Ñgyoozh cyish mi nir.
23 Bi nu druu par yaa been benu güiin zeꞌ nu driib doo güidz,
ndeꞌ waded la yad nuñ gyey.
Niꞌ ziꞌl waded la gyicy rishcuen nu gazi lagy mbecy.
24 Nap zir nu cyiiñ na nañ baa dziꞌñ,
gazeꞌ nu cyiiñ na nañ tub yuꞌ cyit na nu tub biñ mñaa nu rnid ruꞌ.
25 Ornu druꞌña raso̱o̱ nap nu druu lugaar zet,
ndeꞌ nañ gal nu na nis rag nu rdoꞌn tiem nu wach añ nin.
26 Benu tub mbecy nap “O” rniiy ni mbecy a̱ꞌ nap,
yu zeꞌ nay gal nu na zeꞌ nu driib nis bag,
o tub zo nu yuꞌ nis yu.
27 A̱ꞌ nap nu goꞌ bag ru dziñ doo.
Niꞌ ziꞌl a̱ꞌ nap nu dzi yub ru gyel mbecy nu gyabic losaꞌr nir.
28 Benu wagac gyicy ru mandaar ub ru tiem nu rzi lagy ru,
orzeꞌ nar gal nu na tub gyedz nu walab nañ loꞌ ri,
nunu gac chuꞌ losaꞌ yuuñ ruꞌñ.