19
24
Cueꞌ gasaap lagy ru nu nac de coz
nu ricy de mbecy a̱ꞌ nap.
Ni cueꞌ nii toor nu gac nur dey.
2 Tub lo ziꞌl nu zu dey shcab nu gyicy ras nuy de losaꞌy.
A̱ꞌ nii gaꞌ dey reñaꞌ coz,
se tub lo ziꞌl riidz a̱ꞌ nap driib ruꞌy.
20
3 Mbecy nap rash yu shcab ornu zaay tub yuꞌ.
Fert zuuy ñi nu nac nu nap yet lag yu cuen lac mod gyicy yu.
4 Dza laa nañ yuꞌy yuꞌ gyel nap nu cyit rabee
nu gyel nap nu ñgyup sac nu nac nu yuꞌ shcab niy.
21
5 Nap zir nu gac naa mbecy nu yuꞌ shcab ni
gazeꞌ nu gac naa mbecy fert.
Ricy zir ñi presis nu gac naa mbecy nu gyet lag cuen
gazeꞌ nu gac naa tub mbecy fert.
6 Gun ricy ñi presis nu nap gash mbecy shcab
anzir nu chuꞌy gyel yuu.
Nunu dub gal nu zu mbecy nu rbic zañ consef,
dub ni gad mod nu gyicy yu gan gyel yuu.
22
7 Dzi biigy shcab lily par de mbecy ton.
Watiib la riidz ruꞌy
ornu zuy lat mbecy nu ro riidz nu ricy ñi presis.
23
8 Benu dub laa tiem mbecy rash yu shcab
nu nac de coz a̱ꞌ nap nu gyicy yu,
orzeꞌ zaab riidz nu nac nuy mbecy nu deet ricy.
9 La ziꞌl coz nu rboo ic mbecy ton nu gyicy yu,
ndeꞌ coz cyi.
Orzeꞌ dela mbecy rzi lagy yu lo mbecy rguu bdzaa.
24
10 Dzi ga shni zur benu se la la gyicy ru tiem nu deet rac.
25
11 Benu ca lo cuen nu gat mbecy nu nac cyiy,
zeꞌ sac falt niy,
orzeꞌ bloo mbañ yu.
Cueꞌ zaan ru nu gat yu.
12 Dzi ga rash ru shcab nu walab cuen nir.
Tees Ñgyoozh rad lagy mi la coz yuꞌ nañ lardoor.
Mi zeꞌ rñam ru.
Orzeꞌ rad lagy mi.
Nunu mi zeꞌ gyabic mi ir dub gal na mod nu ricy ru.
26
13 Yu feñ ne̱,
goꞌ dziñ doo.
Gun nap roꞌ.
Gal nu nap roꞌ dziñ doo,
14 niꞌ ziꞌl nap na shcab lily par lardoor.
Bicy nu gad shcab lily nir.
Orzeꞌ nap zac ru par lo.
Nunu walab nu leew la rgyish lor loñ.
27
15 Cueꞌ gyicy ru gal nu ricy mbecy a̱ꞌ nap.
Yu zeꞌ rboo ic yu lac mod gyicy gubaan yu de coz ni mbecy nap gal nu de yuu nu yuꞌ nañ yuꞌ.
16 Mbecy nap,
mas la ziꞌl be tir gyes saay,
tees gyeshtey tuubaꞌ tir.
Zeꞌ mbecy a̱ꞌ nap,
tub tir ziꞌl gyes saay tiem nuꞌ gac deet.
28
17 Cueꞌ gyet lagy ru ornu gyes saa de losaꞌ yuur.
Ni cueꞌ gyigy ru ornu glagy gyiꞌy.
18 Ñgyoozh gad lagy mi
benu ni gyicy ru nunu wayet lagy mi.
Orzeꞌ wabic mi cashtig ni dey.
29
19 Cueꞌ sug ic ru nu nac de mbecy a̱ꞌ nap.
Ni cueꞌ gyicy saap lagy ru de coz nu ricy dey.
20 Orzeꞌ de mbecy a̱ꞌ nap waruu nap dey par lo.
Gun de yu zeꞌ gnit yu
gal nu ricy gyi ni candiil ornu ryuuñ.
30
21 Yu feñ ne̱,
bicy nu dzib lagy ru lo Ñgyoozh,
nunu pca lagy lo rey nir.
Rila cueꞌ gac nur mbecy nu za contr ni dey.
22 De mbecy nu ni ricy,
tub sij ziꞌl rnit lo dey.
Ni tub la mbecy wagad lagy yu la na cashtig gac cuic Ñgyoozh o nu gac cuic rey.
Zañ zir riidz cyit nu bzeeñ mbecy nu yuꞌ shcab ni
23 Niꞌ ziꞌl tub mbecy nu yuꞌ shcab ni mniiy de riidz ii.
A̱ꞌ nap benu mbecy nu ri bee chay faboor ni tub mbecy
anzir nu gyeñ yu la coz guc.
24 Benu niiy nu sac falt ni mbecy nu yuꞌ falt ni,
orzeꞌ rzi lagy mbecy loy,
nunu rzaa lagy dey niy.
25 Se benu rbic yu cashtig ni mbecy nu yuꞌ falt ni,
orzeꞌ gyet lagy mbecy yu nunu gruu nap yu.
26 Benu mbecy rishli rca lagy yu lo losaꞌy,
orzeꞌ rniiy riidz rishli loy.
27 Nu loga la zu nap ru riiñ nir ngush par nu gad coz nu gow ru.
Despuees orzeꞌ zuub ru gyiꞌ nu zaar yuꞌr.
28 Cueꞌ gac ru teshtig fals nu niir nu yuꞌ falt ni losaꞌr benu sac la gyiꞌ.
Cueꞌ zaan ru nu griib riidz rguu ruꞌr.
29 Cueꞌ niir:
“Ya̱ gyicy du̱ yu laabaꞌ gal mod nu bicy nuy ya̱.
Ya̱ gyabica̱ niy laabaꞌ gal nu bicy nuy ya̱”,
niir.
30 Ya̱ gusa̱ lat naa mbecy zed.
Nunu bdeda̱ lat lyucy urbyay ni mbecy nu sac shcab ni.
31 Ya̱ bzaaca̱ nu tonaꞌ la nash gyish lat ñi nu ya gyech.
Zeꞌ loꞌ gyitaꞌ nu zu dub yub la ruꞌñ bzug lañ.
32 Ornu bzaaca̱ de naa zeꞌ,
orzeꞌ brusha̱ shcab nu nac ñii.
Na ornu bduꞌ cuena̱ñ,
orzeꞌ blyuuñ ne̱:
33 “Das na tub miiñ.
Nit lagy na tub miꞌ.
Nunu laagy yaan toon nu nap zir das na.”
34 Benu ni gyicy ru,
orzeꞌ ruꞌña gyel zi lor
gal nu druꞌña tub gubaan.
Sij ziꞌl gyicy falt ñi nir
gal nu sij ziꞌl druꞌña gubaan nu zu tañ.