6
23
Benu gzub ru nu gor gyit nu tub yu lily,
orzeꞌ bicy cuidad nu de coz nu gow ru.
2 Mas tonaꞌ la ran ru,
tees bzu cuidad nu cueꞌ sheñ gow ru.
3 Cueꞌ dzi gzac ru lo de coz nap nu cuic yu gow ru,
gun orzeꞌ dzi ga gyicy yu gan nu guuy ru.
7
4 Cueꞌ laazh ru fers nir lat nu ryub ru gyel nap.
Cueꞌ dzi gzu bich ru nu nac ñii.
5 Gyel nap gac sij ziꞌl nit ñi.
Nañ gal nu na nu zub loweꞌñ.
Orzeꞌ gac gyes nañ ñi chañ lo bi gal nu ricy chigyiñ.
8
6 Benu tub mbecy rziy nu rbic yu de coz ni losaꞌy,
yu zeꞌ cueꞌ gow nur yu gyit.
Cueꞌ nu ric la añ nir lo de coz nu rbic yu nu gow mbecy.
7 Mas niiy gab yu ru:
“Bdow nunu go”,
niiy,
tees nañ lardooy walab rishli rniiy.
Gal nu rniiy,
ni nay.
8 Orzeꞌ gab ru de coz nu bdor,
nunu leew la byabic ru gyel mbecy niy.
9
9 Cueꞌ niir riidz nu nap za lo mbecy ton,
gun yu zeꞌ gubdzaay de riidz nu niir.
10
10 Cueꞌ chaar seꞌ bzaa gush.
Ni cueꞌ cor yu ni de yu nguzh zi.
11 Gun biñ nu ca lo cuen nu locyuub de yu zeꞌ,
mi zeꞌ dzi fert mi.
Orzeꞌ mi zeꞌ chuꞌm lo cuen ni de yu zeꞌ.
Orzeꞌ cham contr nir.
11
12 Nap bduꞌ cuen dela riidz nu rnii moscuel nir.
Nap bzuub gyidag de riidz lily nu rlyuuy nir.
12
13 Cueꞌ nu gyicy gul lagy ru nu gaaz ru yu nguzh nir.
Mas shet ru laspeed ich yu,
tees walab nu gat yu.
14 Benu gaaz ruy nu laspeed,
orzeꞌ gyicy ru nu cui mbañ yu.
13
15 Yu feñ ne̱,
benu gac ru mbecy nu yuꞌ shcab ni,
orzeꞌ tonaꞌ la gyet lagya̱.
16 Gyet lagya̱ nañ lardo̱o̱
ornu gyeña̱ rniir de riidz nu seꞌñ.
14
17 Cueꞌ gyicy saap lagy ru de coz nu ricy de mbecy cyi,
sinu nap zir benu rdzib lagy ru lo Ñgyoozh dub laa tiem.
18 Gun orzeꞌ gruu nap ru par lo,
nunu walab nu leew la cyish lor lo de coz nu yad par lo.
15
19 Yu feñ ne̱,
bzuub gyidag.
Bicy nu gac ru mbecy nu yuꞌ shcab ni,
nunu nap gush shcab nu nac mod nu gzur.
20 Cueꞌ gac nur de mbecy nu dzi roꞌ mashcaly.
Ni cueꞌ gac nur de mbecy nu dzi row shaad.
21 De mbecy rzugy gal nu de mbecy row bag,
gyet gyel zi ni dey.
Mbecy zed cuiñ gzuy.
16
22 Bzuub gyidag ni uz ru.
Ti cueꞌ yu zeꞌ,
sac la ru.
Bicy nu gabe nu ricy ru graseer nu nac ñaar
lat nu bi zum gyel gush nim.
23 Bicy nu gad de coz rishli,
nunu bicy nu gad shcab lily nir,
nunu bicy nu gyet lag ru cuen de coz nu dulyuu nir,
nunu bicy nu gyet lag ru cuen,
tees cueꞌ cut ru de nu ndeꞌ.
24 Tub mbecy gyet lagy yu nunu nap zu lagy yu
benu iꞌñ yu nac yu mbecy nap nunu nap na shcab niy.
25 Bicy tub mod nu gyet lagy uz ru nu ñaar.
Bicy nu zu cyit lagy ñaar,
biñ nu bgaal ru.
17
26 Yu feñ ne̱,
nap bduꞌ cuen de coz nu ricya̱.
Gal mod nu ricya̱,
niꞌ ziꞌl mod gyicy ru.
27 Rishdzidz biñ mñaa congal nu biñ mñaa gur rded rishdzidz mi
gal nu rishdzidz tub gyerye gyi o tub zo gyi nu shii.
28 Rishli de biñ mñaa zeꞌ rsiiñ mi ni yu gyeey
gal nu ricy gubaan.
Nunu ricy mi nu yu gyeey wayicy paa gaꞌy nu mñaay.
18
29 ¿Cyu rac deet nañ lardoo?
¿Cyu nu ricy sentiir?
¿Cyu nu zaab rzub losaꞌ la?
¿Cyu nu zaab rnii deet la?
¿Cyu nu gad güii sinu wacabee la gyiꞌ?
¿Cyu nu gyow la urlo?
30 Laab yu zeꞌ yu nu zaab zu la lo mashcaly,
yu nu ricy preb de lo la nis cyudz nu a̱ꞌ yuꞌ loy.
31 Cueꞌ dzoꞌw ru lo ñup ni urbyay.
Cyit ñuu rabeeñ.
Ña la rgüiiñ.
Riib nu ryal loñ.
Nunu un la yet ñi.
32 Despuees orzeꞌ rucuaꞌñ
gal nu rucuaꞌ tub bily dañ.
Ricy ñi nu gatow gal nu ricy benen ni bily dañ.
33 Gyicy ñi nu deꞌ lor nunu niir riidz ton.
34 Gyicy ñi nu rziir nu rded ru nañ barc lo nisyudoo,
o nu zub ru gal too timoo ni barc
ornu rguul nis ñi par re par ii la.
35 Orzeꞌ niir:
“Pshet mbecy ne̱,
tees wangad lagya̱.
Bdi su dey ya̱,
tees wanrica̱ raso̱o̱.
Ornu grisha̱ yaa,
orzeꞌ do̱ꞌ se tub”,
niir.