22
Ricy zir ñi presis nu ca lagy mbecy lor,
nunu nu nap nii dey nu nac ru
gazeꞌ nu gad sheñ or nu plat nir.
2 Tub coz nu mbecy zi nu mbecy guaniꞌñ saap dey losaꞌy.
Ndeꞌ nu laab Ñgyoozh psaꞌ lagy mi rup nac lay.
3 Mbecy nu yuꞌ shcab ni rad lagy dey ornu yad coz deet.
Orzeꞌ druu chu dey loñ.
Zeꞌ mbecy nu sac shcab ni waruu chu dey loñ.
Orzeꞌ zac zi dey nu nac ñii.
4 Benu dzib lagy der lo Ñgyoozh,
nunu benu a̱ꞌ nac der mbecy leꞌ,
orzeꞌ gad gyel nap nir,
nunu de mbecy ca lagy dey lor,
nunu tuñ cyiiñ ru gyishlombecy.
5 Nez ni de mbecy a̱ꞌ nap nash ya gyech,
nunu zaab zu la caa.
Benu mbecy ricy cuidad yu ub yu,
orzeꞌ gruu chuy lo nez zeꞌ.
6 Blyuu der ni iꞌñ ru ca na nez nap.
Orzeꞌ waruu chu dey loñ ornu gyaguush yu.
7 De mbecy guaniꞌñ ricy dey mandaar de mbecy zi.
Niꞌ ziꞌl de yu nu rboo tiñ nac yu moz ni yu nu rbic tiñ zeꞌ.
8 Benu mbecy wayicy yu gyel fushtiz niy,
orzeꞌ gzac yu tub gyel zi.
Orzeꞌ be zeꞌ checa nu gyicy ras nuy mbecy.
9 Dzi ni mbecy nu wacsiy ornu rbicy yu coz ni losaꞌy,
gun yu zeꞌ rgoow yu mbecy zi.
10 Pcyuu nu de mbecy rguu bdzaa.
Orzeꞌ gyaꞌ lo nu rzub mbecy losaꞌy,
nunu rtub suy losaꞌy nu riidz.
Nunu gyaꞌ lo nu rzat zi dey losaꞌy.
11 Benu mbecy gyacaacy nañ lardooy,
nunu benu gugy za de riidz nu rniiy,
orzeꞌ rey nap gac nuy yu.
12 Ñgyoozh ricy mi nu rzu laa coz rishli.
Wazaan mi nu gzu de riidz rguu ni de mbecy a̱ꞌ nap.
13 Mbecy zed zu laay yuꞌy.
Orzeꞌ rniiy:
“Benu gru̱u̱,
dzi ga dzeela̱ tub biidz.
Orzeꞌ cut ma ya̱”,
rniiy.
14 Ruꞌ biñ mñaa gur rded nañ gal nu na tub gyerye nu dzi gyi.
De mbecy bzaa lagy Ñgyoozh ni gyet lag dey nañ ñi.
15 Coz ton druu nañ lardoo yu nguzh.
Orzeꞌ nu laspeed gyicy nap nay.
Orzeꞌ gruu chuy loñ.
16 Benu shet zi dey mbecy zi
par nu gyicy yu gan gyel nap,
o nu cuic leew yu coz ni guaniꞌñ,
orzeꞌ despuees gyicy falt la coz niy.
Gal rup tii rishcyit nu bzeeñ mbecy nu yuꞌ shcab ni
17 Bzuub gyidag de riidz nu rnii mbecy nu yuꞌ shcab ni.
Orzeꞌ nap gush shcab nu nac ñii.
18 Dzi ga nap benu checa ic ruñ,
nunu benu bi zur nu niir ñii nu ruꞌr.
19 Ne̱e̱ de riidz ii lor na,
gun orzeꞌ gyicy cup ru consuel lo Ñgyoozh,
Shuaan na.
20 Pca̱a̱ gal rub tii de riidz ii nu niir,
riidz nu rbic consef.
Ndeꞌ riidz nu ricy ñi presis nu gad lagy na.
21 Nunu lyuuñ nir ca na coz rishli.
Ornu mbecy zu nez yu ru nu cha yub ru coz rishli nu gad lagy ru,
na ornu cyush cyar,
orzeꞌ gac niir loy gal nu rlagy ñi.
1
22 Rila cueꞌ saap ru nu gyicy ru gan mbecy zi
nu nac nu gad ziꞌl mod nir.
Cueꞌ gor too de mbecy nu rzaac deet
ornu zu dey lo de fushtiz.
23 Gun Ñgyoozh chuꞌm faboor ni de yu zi zeꞌ.
Orzeꞌ cuic mi cashtig ni de mbecy nu rgo too de yu zeꞌ.
2
24 Rila cueꞌ gac nur mbecy dzaꞌ ic.
Ni cueꞌ zaab lor lo mbecy rzi lagy.
25 Gun dzi ga syaꞌr lo dey.
Orzeꞌ gyet lag ru nañ caa ni de coz nu ricy yu.
3
26 Rila cueꞌ neꞌ ic ru nu nac diꞌñ reñaꞌ mbecy.
27 Dzi ga wagyeer cyish ru.
Orzeꞌ gyash dey mas gashtal nuun nir.
4
28 Rila cueꞌ chaar seꞌ bzaa gush nu bzuub gyitoo bel nir.
5
29 Mbecy nu nap na riiñ ricy yu,
yu zeꞌ gzuy riiñ lo de rey.
Orzeꞌ walab lo gur mbecy la gzuy riiñ.