21
Lardoo rey nañ gal nu na gyoow.
Ñgyoozh rbic mi nez niñ.
Orzeꞌ rbic ñi welt ca ziꞌl zeꞌ nu rlagy mi.
2 Mas mbecy rnii tooy nu ricy yu mod nu rlagy ñi,
tees Ñgyoozh nap rad lagy mi dela coz nu yuꞌ nañ lardooy.
3 Dzi zir yet lagy Ñgyoozh ornu ricy na de coz nu seꞌñ gal nu mod nu rlagy ñi,
gazeꞌ ornu dric na gun lom.
4 Cyi na ornu tañ güiin lo losaꞌn,
nu ornu gyicy leꞌn nañ lardoon,
nunu ornu gyicy na de coz shiñ na.
5 Benu mbecy nap gash yu shcab lac gyicy yu,
nunu benu fert ricy yu riiñ,
orzeꞌ dub gusht la cyiiñ yu.
Zeꞌ benu mbecy ryub yu mod nu gyel gyaꞌ lo riiñ,
orzeꞌ ruꞌña gyel zi loy.
6 Dzach rlazh de coz nu rad nu nac gyel rguu.
Nunu sij ziꞌl ded ñi gal na tub birzigy
nunu gyicy ñi nu gat mbecy.
7 De mbecy a̱ꞌ nap nit lo dey nu nac de coz shiñ na nu ricy yu
nu nac nu washet ic yu nu gyicy yu mod nu seꞌñ.
8 De mbecy a̱ꞌ nap za dey tub nez nu za dzaa la.
Zeꞌ de mbecy nap za dey tub nez nu li za.
9 Nap zir nu cyiiñ na nañ baa dziꞌñ
gazeꞌ nu cyiiñ na nañ tub yuꞌ cyit na nu tub biñ mñaa rnid ruꞌ.
10 De mbecy a̱ꞌ nap dzi bizh dey nu gyicy yu nu gatow ni losaꞌy.
Wagashni lagy dey de mbecy nu rcyiiñ gaab ga.
11 Ornu de mbecy rguu bdzaa chay lo cashtig,
orzeꞌ mbecy wacnii too zeꞌ gad shcab niy.
Zeꞌ mbecy siñ too gad shcab niy nu nac nu dulyuu niy.
12 Ñgyoozh,
biñ,
nu ricy de coz nu seꞌñ,
rad lagy mi
la coz rac nañ yuꞌ ni de mbecy a̱ꞌ nap,
nunu gyicy mi nu nit lo dey.
13 Benu mbecy soow yu gyidag yu ornu cush ti mbecy zi,
orzeꞌ niꞌ ziꞌl se cyu la gyicy cuen yu
ornu shuub dzi nu gyicy falt la coz niy.
14 Benu tub mbecy rzi lagy yu lor,
orzeꞌ ngach briic tub coz ganiy.
Orzeꞌ gyag lagy yu.
15 Ornu rad gyel fushtiz,
orzeꞌ tonaꞌ la yet lagy de mbecy nap.
Zeꞌ de mbecy a̱ꞌ nap rlazh consuel ni dey.
16 Benu mbecy ruu chuy lo mod nap,
orzeꞌ nez nu gash yu ndeꞌ zañ lat de mbecy gut.
17 De mbecy nu dzi yet lagy gyicy gusht,
de yu zeꞌ gyel zi zuy.
De yu nu bizh ñup ni urbyay gal nu comid nap,
yu zeꞌ wac yu mbecy guaniꞌñ.
18 Yuꞌ tiem nu Ñgyoozh rbic mi cashtig ni de mbecy a̱ꞌ nap
par nu rboo mbañ mi de mbecy nim.
Rbic mi cashtig ni de mbecy nu rdzib lagy den lo
par nu rboo mbañ mi de mbecy nu ricy de coz nu seꞌñ.
19 Nap zir nu cyiiñ na ub zin ngush
gazeꞌ par nu cyiiñ dun tub biñ mñaa nu cyi ruꞌ nu dzi rtub sum ñgyeem.
20 De mbecy siñ too ricy cup dey gyel nap
nunu dub gusht la rcyiiñ yu.
Zeꞌ de mbecy ton dzach rniit yu dela tiñ nu ricy cup yu.
21 Benu mbecy ryub yu mod nu seꞌñ,
nunu nap ricy nuy de losaꞌy,
orzeꞌ tuñ rcyiiñ yu,
nunu ca lagy mbecy loy,
nunu nap gyicy nu mbecy yu.
22 Soldad nu siñ too gac gyicy yu gan tub gyedz fert,
nunu gac tiily yu lugaar fert ni losaꞌ yuuy.
23 Benu gyicy cuidad ru de riidz nu rniir,
orzeꞌ wazac ru lo coz deet.
24 De mbecy rguu bdzaa,
ñgyay,
nunu leꞌy,
nunu dela coz nu ricy dey bded ruꞌ gaꞌ la ñgya ricy dey.
25 De mbecy zed nu walagy gyicy riiñ,
de yu zeꞌ rut ub lay.
26 Mbecy zeꞌ,
de coz nu rlagy yu nu gad ganiy,
se nu gusu ziꞌl ic yuñ.
Zeꞌ de mbecy nap,
yu zeꞌ wacsi laay rbic yu coz ni losaꞌy.
27 Ñgyoozh wagyet lagy mi ornu de mbecy a̱ꞌ nap rbic dey gun nim,
yegar ornu rgyish loy nu gad coz a̱ꞌ nap nu nac gun zeꞌ.
28 Yu nu driib cyi fals ic losaꞌ nit loy.
Zeꞌ yu nu nap rguꞌ cuen,
yu zeꞌ gzu tuñ coz nu niiy.
29 De mbecy a̱ꞌ nap ricy zed la loy.
Zeꞌ de mbecy nu ricy coz nu seꞌñ nap rad lagy dey coz nu ricy yu.
30 Se la la cyiiñ ñi mas nap rad lagy mbecy,
mas nap rash yu shcab
benu Ñgyoozh zam contr niy.
31 Mbecy gac zu lily yu cuay par nu cha ma gyel yuu,
tees laab Ñgyoozh gyicy mi nu gyicy yu gan gyel yuu zeꞌ.