20
Mbecy rgubdzaay losaꞌy nu nac ñup.
Zeꞌ mbecy rucooy nu losaꞌy nu nac nis rzugy.
Ca ziꞌl na yu nu dzi roꞌ,
yu zeꞌ nac yu mbecy nu sac shcab ni.
2 Ornu chaꞌ ic tub rey,
ndeꞌ nañ gal nu na nu rbishti tub bishtoo.
Benu chaꞌ mbecy ic yu,
orzeꞌ ricy yu nu rishdzidz nu gat yu.
3 Dzi lily na tub mbecy benu watub suy losaꞌy nu riidz.
Tees cyu ziꞌl mbecy ton gac gzuub yu gyiꞌ riidz nu tub suy losaꞌy.
4 Benu mbecy razeed yu nu laꞌy yu tiem niñ,
despuees wad la cosech nu teꞌy.
5 De coz nu rnii too mbecy ndeꞌ nañ gal nu na nis nu ri nañ tub zo gyi.
Zeꞌ mbecy siñ too gac gyicy yu nu gruu zac ñi.
6 Dela mbecy rniiy nu nac yu mbecy ricy paa.
Orzeꞌ ¿ca gyap na yu nu rishli ricy paa zeꞌ?
7 Dzi ni yu feñ benu uz yu a̱ꞌ nac yu mbecy rguu,
nunu ricy yu gal mod nu seꞌñ.
8 Ornu tub rey ricy yu gyel fushtiz,
orzeꞌ nap rguꞌ cuen yu ca na coz nu nap nunu ca na coz nu a̱ꞌ nap.
9 ¿Walab gaal ruu su tub mbecy nu niiy:
“Ya̱ bicy caacya̱ nañ lardo̱o̱,
nunu sac la cyi̱”,
niiy?
10 Ñgyoozh rzi lagy mi lo mbecy nu wactush pee zaꞌ.
11 Mas gal tub yu nguzh miꞌ,
gac gad lagy na la nay nu nac de coz nu ricy yu,
benu nap ricy yu o nu a̱ꞌ nap ricy yu.
12 Ñgyoozh briic mi ur lon par nu gzac na,
nunu briic mi gyidag na par nu gyeñ na.
13 Benu dzi gusht nir nu gas ru,
orzeꞌ gyel zi gzur.
Benu co pcaal ru,
orzeꞌ gad sheñ de coz nu gow ru.
14 De yu nu rzii la coz:
“Dzi ñgyup”,
rnii dey.
Despuees orzeꞌ driib zily dey ub yu
nu nac nu dzi barad guud ñi niy.
15 Benu rniir riidz nu rnii mbecy nu yuꞌ shcab ni,
orzeꞌ de riidz nu rniir dzi zir sac ñi gazeꞌ or o de gyitaꞌ ña nu dzi ñgyup sac.
16 Benu tub mbecy yad booy tiñ lor,
zeꞌ tuubaꞌ mbecy neꞌ ic yu ni mbecy yad zeꞌ,
orzeꞌ mnii lo yu nu neꞌ ic niy nu rzeeñ yu shab yu gyiꞌ tiñ nir.
17 Tonaꞌ la nap row comid nu rad nu nac de coz a̱ꞌ nap nu ricy mbecy.
Zeꞌ despuees orzeꞌ gyac ñi ruꞌy gal nu row tub ruꞌ yu uzh.
18 Ornu mbecy rboo ic yu de coz nu gyicy yu,
orzeꞌ gruu nap ñi niy nu nac de consef nu briic mbecy niy.
Orzeꞌ cueꞌ gyicy ru gyel yuu anzir nu cyiñ ru consef lo mbecy.
19 Mbecy nu rnii rishcuen wagac soow ruꞌy de coz ngach.
Ndeꞌ nu cueꞌ gac nur mbecy nu ro rishcuen.
20 Benu zaa lagy ru ni uz ru nu ni ñaar,
orzeꞌ gat ru gal nu rzac gyi ni candiil ornu ryuuñ.
21 Benu feñ mbecy gyiyeeñ gyel nap yaay,
orzeꞌ walab nu dzi nap gyicy nuñ yu ornu gyaguush yu.
22 Rila cueꞌ nu ub ru gyicy gal gar.
Bicy cup consuel lo Ñgyoozh.
Orzeꞌ mi zeꞌ gyicy mi nu chesu nap ñi nir.
23 Ñgyoozh wayet lagy mi ornu mbecy wac tush pee zaꞌy de coz nu rut yu o coz nu zi ub yu.
24 Orzeꞌ ¿lac mod gyet lag na cuen nez nu chan
lat nu zun gyishlombecy ii?
Orzeꞌ ub la Ñgyoozh niim ca na nez nu rush na.
25 Bicy cuidad ornu niir lo Ñgyoozh tub coz nu waded la gyicy ru.
Dzi ga dza shcab nir despuees.
26 Benu tub rey lily nay,
orzeꞌ gyicy yu nu gad lagy yu ca na mbecy nu shiñ ricy.
Orzeꞌ washni lagy yuy nu cuic yu cashtig niy.
27 Espiriit nu briic Ñgyoozh ni mbecy,
ndeꞌ nac ñii yaa nu ricy nu gabe de coz nu yuꞌ nañ lardooy.
28 De rey zuy riiñ dub laa lat nu rniiy de coz rishli,
nunu nap ricy nuy de mbecy.
29 Dzi ga nap nu de yu feñ fert yu.
Dzi ga cyit rabee nu rtop too de mbecy gush.
30 Yuꞌ tiem rlagy ñi nu zac zin,
orzeꞌ ndeꞌ gyicy ñi nu chaan mod nu cyiiñ na.