19
Nap zir nu gac naa mbecy zi nu waguu
gazeꞌ nu gac naa mbecy ton nu rguu.
2 A̱ꞌ nap benu tub mbecy gzu fert yu,
zeꞌ wagad lagy yu.
Benu tub mbecy dzi dzach zuy,
orzeꞌ dzi dzach gadzay.
3 Yuꞌ mbecy rnuy ub yu nu nac de coz ton nu ricy yu.
Gazeꞌ nu rniiy nu ndeꞌ falt ni Ñgyoozh.
4 Benu mbecy guaniꞌñ yu,
orzeꞌ tonaꞌ la yuꞌ amig niy.
Zeꞌ mbecy zi wacabee ca yuꞌ amig niy.
5 Benu riib ru cyi fals too losaꞌr lo de fushtiz,
orzeꞌ waded la char lo cashtig.
Rila walar.
6 Dela mbecy rlagy yu nu gyet lagy de fushtiz yu.
Dela mbecy nac yu amig ni yu nu rbic coz leew.
7 Benu mbecy zi,
mas de bicy yu wagyicy cuen dey yu.
Zeꞌ yegar de amig gyicy cuenaꞌ dey yu.
Mas rnishbaa lay zaab yu ich dey,
tees gyazet dey loy.
8 Benu mbecy yet lagy yu nu gyet lag yu cuen,
orzeꞌ yu zeꞌ nap ricy nuy ub yu.
Benu yet lagy yu de coz nu yet lag yu cuen,
orzeꞌ gruu nap yu.
9 Yuꞌ mbecy nu riib yu cyi fals too losaꞌy lo de fushtiz.
Orzeꞌ ni tub lay wac gruu chuy lo cashtig.
Benu rguuy,
orzeꞌ bi ca lo cuen nu nit loy.
10 A̱ꞌ nap nu cyiiñ mbecy ton gal mod nu rcyiiñ mbecy güaniꞌñ.
A̱ꞌ nap nu gyub ic mbecy nu nac moz por fers la de famil ni rey.
11 Benu mbecy raso̱o̱,
orzeꞌ walagy ñi nu chaꞌ ic yu.
Ornu shiñ ricy nu mbecy yu,
orzeꞌ nap rabee nu dzi lily nay
gyiꞌ nu wagyicy cuen yu.
12 Ornu tub rey chaꞌ ic yu,
ndeꞌ nañ gal nu na nu rbish ti tub bishtoo.
Zeꞌ ornu nap ricy nuy mbecy,
ndeꞌ nañ gal nu na nu yet gyey tiem niñ.
13 Benu tub yu feñ ton,
orzeꞌ gyicy yu nu nit lo uz yu.
Benu tub biñ mñaa zaab rnid ruꞌ lam lo ñgyeem,
mi zeꞌ nam gal nu na de ndzu̱j ni nis nu zaab driib la.
14 Tub yuꞌ,
gal nu gyel nap,
ndeꞌ gyaꞌn nu zeeñ mbecy ni iꞌñ yu.
Zeꞌ biñ mñaa raso̱o̱ nu gac mñaa yu gyeey,
ndeꞌ coz nu gruu tub zi la gal lo Ñgyoozh.
15 Tantaꞌ nap raas mbecy zed.
Na despuees,
orzeꞌ ryan yu.
16 De yu nu ricy paa nu de riidz ni Ñgyoozh,
de yu zeꞌ tuñ cui mbañ yu.
Zeꞌ de yu nu rgüii naañ loñ,
de yu zeꞌ waded la gat yu.
17 Benu tub mbecy nap ricy nuy mbecy zi,
orzeꞌ ndeꞌ nañ gal nu na nu rbic yu tiñ co Ñgyoozh.
Orzeꞌ mi zeꞌ cyish mi niy nu nac de coz nu bicy yu.
18 Gyicy nap ru de iꞌñ ru tiem nu gac locyuub ru.
Benu wayicy ru ndeꞌ,
orzeꞌ ub lar rnur dey.
19 Mbecy dzaꞌ ic rlagy ñi nu cyish yu de coz nu ricy yu.
Benu co nap ruy tub tir,
orzeꞌ niꞌ ziꞌl rlagy ñi gyicy ru tuubaꞌ tir.
20 Nap bzuub gyidag ornu mbecy rbic dey consef nir,
nunu “O” mnii ornu rlyuu dey nir,
gun or gales,
orzeꞌ gyac ru mbecy nu yuꞌ shcab ni.
21 Zañ coz druu nañ lardoo mbecy nu gyicy yu,
tees tub lo ziꞌl coz nu rlagy Ñgyoozh ndeꞌ gac ñii.
22 Nap benu mbecy nap ricy nuy losaꞌy.
Nap zir nu gyel zi zu mbecy
gazeꞌ nu gac yu mbecy rguu.
23 Benu mbecy rdzib lagy yu lo Ñgyoozh,
orzeꞌ ndeꞌ gyicy ñi nu cui mbañ yu.
Orzeꞌ yu zeꞌ nap la zu lagy yu.
Sac la nu sug ic yu.
24 Mbecy nu tonaꞌ la razeed,
yu zeꞌ ni wagoow yu ub yu.
25 Benu ric na cashtig ni mbecy ñgya,
orzeꞌ syaꞌ deꞌ zir mbecy nu wagad lagy
nu cueꞌ nu ni gyicy yu.
Benu shuu dun mbecy nu yuꞌ shcab ni,
orzeꞌ dzi zir galy shcab niy.
26 Tub lo ziꞌl de mbecy wagat lo,
nu de mbecy gash zu,
tub lo ziꞌl de yu zeꞌ shiñ ricy nuy uz yu o nu cyuu nuy ñaay.
27 Yu feñ ne̱,
ornu checar nu rzuub gyidag ru de riidz nu rdulyuu nir,
orzeꞌ niga ruu chur lo de coz nu nil rad lagy ru.
28 Zeꞌ nu rguu teshtig zeꞌ sac la gyel fushtiz.
De mbecy a̱ꞌ nap ga ub riidz a̱ꞌ nap la driib ruꞌy.
29 De mbecy a̱ꞌ nap bi ca locuen nu cha dey lo cashtig,
nunu bi ca lo cuen nu dugaaz de mbecy ton.