18
Mbecy ñgya ryub yu coz nu rlagy ub ziꞌl yu.
Nunu yu zeꞌ wazuub gyidag yu ni ni tub la mbecy nu cuic consef niy.
2 Mbecy ton,
yu zeꞌ walagy yu syaꞌy.
Tub zi la coz nu rlagy yu gyicy yu,
ndeꞌ nu nii too mbecy nu dzi yuꞌ loy.
3 Ornu mbecy ricy yu coz a̱ꞌ nap,
yad ñi nu gat loy.
Ornu ricy leꞌy,
yad ñi nu gruu gyel mbecy niy.
4 Riidz nu rnii mbecy nu yuꞌ shcab ni,
ndeꞌ nañ gal na nis nu ri gyi,
o gyoow nu dzach rza.
5 A̱ꞌ nap nu feez chay faboor ni mbecy nu yuꞌ falt ni,
nunu wagyicy cuen yu coz nu yad ñi ni mbecy nu sac falt ni.
6 Riidz nu rnii mbecy ton,
ndeꞌ ricy ñi nu ruꞌña gyel yuu loy.
Rlagy ñi nu dugaaz yu nu nac de riidz nu driib ruꞌy.
7 Riidz nu driib ruꞌ mbecy ton,
ndeꞌ gyicy ñi nu gnuy,
nunu gyicy ñi nu cha duu yeñ yu.
8 Rishcuen,
ndeꞌ nañ gal nu na tub ruꞌ comid nu tonaꞌ la nap row.
Tonaꞌ la nap chetiñ.
9 Mbecy zed nu mbecy nu rnit lo,
de yu zeꞌ rlyu nu bicy yu losaꞌy.
10 Ñgyoozh nam gal nu na tub yuꞌ nu dzi gya
nu soow ñi mbecy nu ricy coz nu seꞌñ par nu cueꞌ shiñ zac yu.
11 Mbecy guaniꞌñ rash yu shcab nu gyel nap niy.
Ndeꞌ nañ gal na tub gyedz nu ri noow nañ loꞌ nu gya.
12 Despuees ornu gyicy leꞌ mbecy,
orzeꞌ nit loy.
Despuees ornu bicy yu gyel gyidz niy,
orzeꞌ gyed gyel mbecy niy.
13 Benu tub mbecy niiy anzir nu zub gyidag yu,
orzeꞌ ton nay,
nunu gruu toꞌ loy.
14 Ornu tub mbecy garat yu,
benu cuic yu baloor,
orzeꞌ gagyey.
Tees benu shiꞌñ yu baloor,
orzeꞌ ¿cyu gagye?
15 Mbecy nu rad lagy,
nu mbecy nu yuꞌ shcab ni,
orzeꞌ gad nu gyet lag yu cuen de coz nu ryub yu.
16 Benu mbecy cuic yu coz leew,
orzeꞌ gyal roꞌ,
nunu gac chay gashtal lo yu lily.
17 Coz nu rnii mbecy lo feez loga la,
ndeꞌ rlyu nu rishli gashtal ornu nii tuubaꞌ mbecy.
Orzeꞌ nuy coz rishli.
18 De mbecy co dey suert ben ca nay gyicy yu gan,
gun orzeꞌ gyicy dey nu checa gyel yuu lat losaꞌy.
Orzeꞌ gyicy ñi nu gabe ben ca nay gyicy yu gan.
19 Biigy zir nu gyicy nap na riidz nu tub mbecy nu shiñ bicy dun,
gazeꞌ par nu gyicy na gan tub gyedz nu ri nañ loꞌ.
Gyel yuu ndeꞌ nañ gal na tub roꞌ ni gyedz nu wac ded na.
Orzeꞌ wac chan loy.
20 Tub ga la mbecy rlagy ñi nu gow yu de coz nu rad nu nac de riidz nu rniiy.
21 Mbecy cui mbañ yu o nu gat yu dub gal nu na riidz nu rniiy.
Mbecy nu dzi rnii,
de yu zeꞌ gyad iy.
22 Yu nu gad mñaa,
yu zeꞌ gad tub coz nap niy,
nunu Ñgyoozh nap gyicy num yu nu nac mñaay.
23 Mbecy zi rnishbaay.
Zeꞌ mbecy guaniꞌñ tañ rniiy.
24 Yuꞌ nu a̱ꞌ biigy gruu chu mbecy lo amig niy.
Yuꞌ gaꞌ nu dzi zir ricy paa amig ni mbecy gazeꞌ tub bicy yu.