17
Nap zir nu gow mbecy gyishtily wach lat nu chuꞌy nu gyel ri zu,
gazeꞌ nu chucooy nuy losaꞌy lat nu gyicy yu saꞌ.
2 Moz nu dzi cyiiñ,
yu zeꞌ gyub ic yu iꞌñ a̱ꞌ nap patro̱o̱ niy.
Nunu gyiyeeñ gyel nap ni patro̱o̱ yaay
laabaꞌ gal nu gyiyeeñ ñi yaa deꞌ zir iꞌñ patro̱o̱.
3 De mbecy gyicy dey preb or nu plat nañ yo ni gyi.
Zeꞌ Ñgyoozh gyicy mi preb nañ lardoo mbecy.
4 Mbecy a̱ꞌ nap,
yu zeꞌ zuub gyidag yu riidz a̱ꞌ nap,
nunu mbecy rguu,
yu zeꞌ zuub gyidag yu riidz rguu.
5 Yu nu rgubdzaa mbecy zi,
yu zeꞌ wayet lagy biñ nu psaꞌ lagy yu de mod nu ricy yu.
Mbecy nu yet lagy ornu rzac zi losaꞌ,
yu zeꞌ waded la chay lo cashtig.
6 Yag de mbecy gush na dey gal nu na coron nu zub tooy.
Nunu de yu feñ dzi yet lagy yu nu nac de uz yu.
7 De riidz nu cyudz za wagyap ñi mbecy ton.
Nunu riidz rguu wangyap ñi mbecy nu ca lagy na lo.
8 Yuꞌ mbecy nu cuic yu tiñ ni losaꞌy nu chay faboor niy.
Par yu zeꞌ tiñ zeꞌ,
ndeꞌ gyel lily niy.
Yu zeꞌ rnii tooy nu gac gyicy yu la ziꞌl coz nu rlagy yu.
9 Benu tub mbecy rlagy yu nu ca losaꞌy yu,
orzeꞌ rlagy ñi nu gyicy sulagy yu de coz a̱ꞌ nap nu bicy losaꞌy nuy yu.
Tees benu caa ic yu coz a̱ꞌ nap zeꞌ,
orzeꞌ yu zeꞌ gyicy yu nu glaꞌ losaꞌy nu amig niy.
10 Dzi zir gruu nap ñi benu shuu dun mbecy nu yuꞌ shcab ni,
gazeꞌ nu shet na tub gaynal yaa cuart ich mbecy ton.
11 Mbecy rnid ruꞌ nu chucoo ziꞌl yu rlagy yu.
Orzeꞌ zeed dey tub yu nu wagashni lagy nu cuic yu cashtig niy.
12 Nap zir dzeel lon tub os dzaꞌ ic
gazeꞌ nu dzeel lon tub mbecy ton lat nu ricy yu coz ton.
13 Benu tub mbecy nap gyicy nuy losaꞌy,
zeꞌ yu nu nap bicy nuy zeꞌ,
yu zeꞌ shiñ gyicy nuy yu,
orzeꞌ rila waruu coz deet lat de famil ni yu nu shiñ bicy zeꞌ.
14 Benu tub mbecy zuub yu gyiꞌ gyel yuu nu losaꞌy,
orzeꞌ ndeꞌ nañ gal na nu blaat yu tub gyegy zeꞌ nu ca tom ni nis.
Ndeꞌ nu nap zir nu gyicy ru nu checa gyel yuu zeꞌ anzir nu duñ niñ.
15 Ñgyoozh wayet lagy mi
benu mbecy glaay mbecy nu yuꞌ falt ni,
o benu niiy nu yuꞌ falt ni mbecy nu sac falt ni.
16 Benu tub mbecy ton cyish yu tiñ par nu syaꞌy,
leew la cyish yu tiñ zeꞌ,
gun sac shcab niy.
17 De amig dub laa tiem rcay losaꞌy.
Nunu lat nu deet rac,
orzeꞌ na dey gal nu na bicy yu nu losaꞌy.
18 Tub mbecy nu wagash shcab,
yu zeꞌ rzay faboor ni amig niy ornu coy tiñ.
Orzeꞌ gyicy yu nu diꞌñ zeꞌ ca lo cuen niy.
19 Yu nu dzi cyi ruꞌ,
yu zeꞌ dzi gusht niy nu chucooy.
Yu nu driib zily ub,
yu zeꞌ gyicy yu nu nit lo ub yu.
20 Mbecy nu shiñ na shcab ni rila waruu nap yu.
Nunu yu nu driib riidz rguu ruꞌ,
yu zeꞌ zac deet yu.
21 Dzi rac nañ lardoo tub mbecy benu iꞌñ yu dzi ton nay.
Rila a̱ꞌ zu cyit lagy tub mbecy benu sac shcab ni iꞌñ yu.
22 Benu zu cyit lagy mbecy,
orzeꞌ ndeꞌ nañ gal nu na tub guñaa nap.
Tees benu tub mbecy shiꞌñ yu baloor,
orzeꞌ ndeꞌ nañ gal na tub güii.
23 Mbecy a̱ꞌ nap “O”,
niiy nu cyish mbecy tiñ niy ngach
par nu cueꞌ gyicy yu gal mod nu seꞌñ.
24 Coz nu ricy ñi presis par mbecy nu yuꞌ shcab ni,
ndeꞌ nu galy shcab niy.
Zeꞌ mbecy ton wacabee la coz nu ricy ñi presis par ub yu.
25 Mbecy ton,
yu zeꞌ gyicy yu nu gyicy shni de mbel niy,
nunu cheti bis nañ lardooy.
26 A̱ꞌ nap nu co dey mult ni mbecy nu sac falt ni,
nunu a̱ꞌ nap benu cuic dey cashtig ni mbecy nu rca lagy losaꞌ lo.
27 Mbecy nu yuꞌ shcab ni,
yu zeꞌ walab nu dzi rniiy.
Nunu mbecy nu yuꞌ shcab ni,
wachaꞌ ic yu.
28 De mbecy ton rnii de losaꞌy nu yuꞌ shcab niy
benu soow yu ruꞌy nunu waniiy.