16
Mbecy,
yu zeꞌ rboo ic yu la coz gyicy yu.
Zeꞌ Ñgyoozh niim benu gac o nu wac.
2 Mbecy,
yu zeꞌ rziiy nu dzi nap de coz nu ricy yu.
Zeꞌ Ñgyoozh,
mi zeꞌ rad lagy mi la gyiꞌ nu ni ricy yu.
3 Mnii nu der Ñgyoozh nu locyuub mi ru
nu nac de coz nu gyicy ru.
Orzeꞌ de coz nu gyicy ru zeꞌ,
ndeꞌ gruu nap ñi.
4 Dela coz nu psaꞌ lagy Ñgyoozh,
psaꞌ lagy miñ par tub coz.
Mas mbecy a̱ꞌ nap,
psaꞌ lagy mi nu chay lo cashtig.
5 Ñgyoozh wayet lagy mi de mbecy leꞌ.
Waded la cha dey lo cashtig.
6 Nu nac nu Ñgyoozh rashni lagy mi de ub na,
nunu ricy mi gal nu rniim,
orzeꞌ gyicy mi nu gyecy cyin.
Zeꞌ mbecy,
ornu dzib lagy yu lom,
orzeꞌ gruu chuy lo cyi.
7 Ornu Ñgyoozh yet lagy mi mod nu ricy tub mbecy,
orzeꞌ mas gashtal de losaꞌ yuuy nap chuꞌ nuy yu.
8 Nap zir nu gyicy na gan ñumiiñ mod nu nap,
gazeꞌ nu gyicy na gan sheñ mod nu walab seꞌñ.
9 Tub mbecy,
yu zeꞌ co ic yu lac mod gyicy yu.
Zeꞌ Ñgyoozh,
mi zeꞌ niim lac mod rlagy ñi nu gyicy yu.
10 Rey,
yu zeꞌ rniiy por cuen ni Ñgyoozh,
nunu cuic yu cashtig gal mod nu seꞌñ.
11 Ndeꞌ cuen ni Ñgyoozh nu de beey nu rtush pee,
li rniiñ.
Mi zeꞌ psaꞌ lagy mi mod nu rlagy ñi nu tush pee mbecy.
12 De rey rzi lagy dey lo mbecy nu shiñ ricy,
gun gyel fushtiz,
ndeꞌ ricy ñi nu nap gyub ic yu.
13 De rey yet lagy yu de mbecy nu rnii rishli,
nunu par yu zeꞌ dzi sac de mbecy zeꞌ.
14 Benu tub rey chaꞌ ic yu ni tub mbecy,
orzeꞌ ndeꞌ nañ gal na nu bri tub raso̱o̱ nu gat yu.
Na benu yuꞌ shcab ni mbecy zeꞌ,
orzeꞌ yub yu mod nu gyag ic rey zeꞌ.
15 Ornu yet lagy rey,
orzeꞌ gad nu cui mbañ mbecy.
Ornu nap ricy nuy mbecy,
orzeꞌ ndeꞌ nañ gal na za nu cyid nu gyey.
16 Dzi zir sac ñi nu galy shcab ni mbecy gazeꞌ or.
Dzi zir sac ñi nu gyet lag yu cuen gazeꞌ plat.
17 Mod nu nil ricy mbecy nap,
ndeꞌ nu gruu chuy lo coz a̱ꞌ nap.
Benu mbecy ricy cuidad yu coz nu ricy yu,
niꞌ ziꞌl ricy cuidad ub yu.
18 Benu mbecy gyicy leꞌy,
orzeꞌ ndeꞌ gyicy ñi nu wayicy yu gan.
Benu mbecy gyicy ñgyay,
orzeꞌ ndeꞌ gyicy ñi nu gyes saay.
19 Nap zir nu gyicy mbecy gyel gyidz niy lat mbecy zi,
gazeꞌ nu gyicy yu nu dzi guaniꞌñ yu lat mbecy leꞌ.
20 Benu nap cuꞌ cuen mbecy de coz nu dulyuu niy orzeꞌ gyicy yu gan.
¡Dzi ni mbecy ornu gyicy cup yu consuel lo Ñgyoozh!
21 Yu nu nap rash shcab,
nii mbecy nu yu zeꞌ siñ tooy.
Riidz nu nap za,
nap zir rcuugy ñi lardoo mbecy.
22 Benu nap gyet lag mbecy cuen,
orzeꞌ ndeꞌ nañ gal na tub zeꞌ nu driib nis nu rbic gyel mbañ.
Benu lyuu mbecy ni mbecy ton,
orzeꞌ ndeꞌ tub coz ton ziꞌl.
23 Yu nu nap rash shcab,
yu zeꞌ rad lagy yu lac mod niiy,
nunu riidz nu rniiy nap cuugy ñi lardoo losaꞌy.
24 De riidz nu gugy za nañ gal nu na tub laꞌ dziñ doo.
Riidz nu gugy za cuic ñi baloor ni mbecy,
nunu cuic ñi fers niy.
25 Yuꞌ mod nu ricy mbecy nu rlyu nu mod nap.
Zeꞌ walab,
gun mod zeꞌ gyicy ñi nu gat yu.
26 Cyiiñ ñi nu ran mbecy,
gun orzeꞌ gyicy ñi nu gyicy yu riiñ.
Orzeꞌ gad nu gow yu.
27 Mbecy a̱ꞌ nap,
dzi rboo loy par nu gruu zac coz a̱ꞌ nap.
De riidz nu driib ruꞌy,
ndeꞌ nañ gal nu na lyush gyi.
28 Yu nu shiñ na shcab ni,
yu zeꞌ cheel yuuy losaꞌy.
Yu nu rnii rishcuen,
yu zeꞌ gyicy yu nu laꞌ losaꞌ mbecy nu amig niy.
29 Yu nu shet zi losaꞌ,
yu zeꞌ rguuy amig niy,
nunu ricy yu nu gadza yu zeꞌ nez.
30 Yu nu rziñ lo,
yu zeꞌ rboo ic yu nu gyicy yu coz a̱ꞌ nap.
Yu nu rucuaꞌ gyid ruꞌ,
yu zeꞌ bi mneꞌ ic yu coz nu gyicy yu.
31 Ornu mbecy rtop tooy,
ndeꞌ nañ gal na tub coron nu ca lagy mbecy lo.
Mbecy gyicy yu gan ñi nu nac mod nap nu gusay gyishlombecy.
32 Nap zir mbecy nu wachaꞌ ic gazeꞌ mbecy balient.
Nap zir tub mbecy nu ricy mandaar ub,
gazeꞌ yu nu ricy gan tub gyedz lat gyel yuu.
33 Mbecy gac coy suert par nu gad lagy yu coz nu rlagy Ñgyoozh.
Zeꞌ Ñgyoozh,
mi zeꞌ niim ca na nu gac.