15
Ornu mbecy rdzaꞌy nin,
zeꞌ benu niin riidz nu gugy za,
orzeꞌ gyag ic yu.
Zeꞌ benu niin riidz nu tañ za,
orzeꞌ dzi zir chaꞌ ic yu.
2 Driib riidz cyiiñ ruꞌ mbecy nu yuꞌ shcab ni.
Zeꞌ mbecy ton driib riidz ton ruꞌy.
3 Ñgyoozh zum dela lugaar.
Rgüiim lo mbecy nap,
nunu rgüiim lo mbecy a̱ꞌ nap.
4 Riidz nu gugy za,
ndeꞌ nañ gal nu na tub yag nu rbic gyel mbañ.
Zeꞌ riidz a̱ꞌ nap,
ndeꞌ ricy ñi da̱y nu espiriit ni mbecy.
5 Mbecy ton wagyicy cuen yu
ornu shuu nu uz yuy.
Zeꞌ yu nu lily na,
ornu shuu nu uz yuy,
yu zeꞌ gyicy yu nu gabe nu yuꞌ shcab niy.
6 Mbecy nu ricy coz nu seꞌñ,
yu zeꞌ yuꞌ zañ coz cyiiñ yuꞌy.
Zeꞌ mbecy a̱ꞌ nap zac deet yu nu nac coz nu ricy yu gan.
7 De mbecy nu yuꞌ shcab lily ni,
de yu zeꞌ tush las yu riidz nu cyiiñ.
Zeꞌ mbecy ton walab ni na coz nu druu nañ shcab niy.
8 Ñgyoozh wayet lagy mi gun nu rbic mbecy a̱ꞌ nap lom.
Tees ornu mbecy nu rnii coz nu seꞌñ rnii nu dey mi,
orzeꞌ yet lagy mi.
9 Ñgyoozh wayet lagy mi mod nu ricy mbecy a̱ꞌ nap.
Tees rcam mbecy nu chesa mod nu seꞌñ.
10 Yu nu gruu chu lo coz nu seꞌñ,
yu zeꞌ gad tub cashtig ily niy.
Benu tub mbecy walagy yu nu shuu nu mbecy yu,
orzeꞌ gat yu.
11 Benu Ñgyoozh rad lagy mi la rac lat mbecy gut,
se yegar coz nu rnii too mbecy mbañ wad lagy mi.
12 De mbecy rgubdzaa wayet lagy dey
ornu shuu nu mbecy yu.
Ni wayub yu mbecy nu yuꞌ shcab ni chesa nuy.
13 Benu mbecy rigy rgüiiy,
orzeꞌ yet lagy yu nañ lardooy.
Zeꞌ benu mbecy shni rgüiiy,
orzeꞌ ricy shniy.
14 Benu mbecy yuꞌ shcab niy,
orzeꞌ yub yu mod nu gyet lag yu cuen.
Zeꞌ mbecy ton yet la lagy yu mas shteey.
15 Par mbecy nu rzac zi,
de dzi la shni zu rziiy.
Zeꞌ par mbecy nu nap zu lagy,
de dzi la yuꞌ saꞌ rziiy.
16 Nap zir benu mbecy gyel zi zuy,
se rdzib lagy yu lo Ñgyoozh,
gazeꞌ nu gac yu mbecy guaniꞌñ,
tees a̱ꞌ gusht cyiiñ yu.
17 Nap zir gow mbecy gyeez zeꞌ nu yuꞌ mbecy nu rca losaꞌ,
gazeꞌ nu gow yu beel chigud zeꞌ nu yuꞌ mbecy nu rzi lagy lo losaꞌ.
18 Mbecy dzaꞌ ic,
yu zeꞌ cheel yuuy losaꞌy.
Zeꞌ mbecy wachaꞌ ic,
yu zeꞌ ricy yu
nu rzuꞌ gyel ri zu zeꞌ nu rucoo mbecy.
19 Mbecy zed dzi deet rzac yu.
Ricy yu gal nu ricy mbecy nu rded gyernez nu nguaa gyech.
Zeꞌ nap rcyiiñ mbecy nu ricy coz nu seꞌñ.
Ndeꞌ nañ gal nu na nu zay nez zu.
20 Yu feñ nu yuꞌ shcab ni,
ricy yu nu yet lagy de mbel niy.
Zeꞌ yu feñ nu ton na rgüii naañ yu lo de mbel niy.
21 Mbecy nu sac shcab ni,
yu zeꞌ yet lagy yu gyel ton.
Mbecy nu yuꞌ shcab ni,
yu zeꞌ wazaan yu nu gadzay ni par bee ni par reg.
22 Benu sac yu nu rbic consef,
orzeꞌ coz nu rboo ic mbecy wacyuu nap ñi.
Par nu gruu nap ñi,
orzeꞌ rlagy ñi zañ de yu nu rbic consef.
23 Tonaꞌ la yet lagy mbecy ornu cuic yu consef nap.
Nap tonaꞌ la ornu rniiy coz nu rlagy ñi tiem nu galagy ñi.
24 Mbecy nu yuꞌ shcab ni,
yu zeꞌ ricy yu mod nu cui mbañ yu,
walab mod nu gat yu.
25 Ñgyoozh nit lom coz nu ricy cup mbecy leꞌ.
Tees ñam coz ni byud.
26 Ñgyoozh rzi lagy mi lo shcab ni mbecy a̱ꞌ nap.
Tees yet lagy mi riidz nu sac falt ni.
27 De mbecy nu ye rzac ricy deet yu lat famil niy.
Tees benu mbecy washet ic yu nu cyish mbecy niy
par nu gyicy yu coz nu walab seꞌñ,
yu zeꞌ cui mbañ yu.
28 Mbecy nu ricy coz seꞌñ,
yu zeꞌ rash yu shcab anzir nu niiy.
Zeꞌ mbecy a̱ꞌ nap,
yu zeꞌ dzach rniiy riidz deet.
29 Ñgyoozh wayicy cuen mi mbecy a̱ꞌ nap.
Tees zum altant ornu rnii nu mbecy nu ricy coz nu seꞌñ mi.
30 Yet lagy mbecy zac yu coz cyit na.
Nunu raso̱o̱ nap cuic ñi fers niy.
31 Yu nu zuub gyidag ornu shuu nu mbecy yu,
ornu rnii mbecy zeꞌ lac mod cui mbañ yu,
orzeꞌ gazaꞌ yu zeꞌ chuꞌy lat de mbecy nu yuꞌ shcab ni.
32 Mbecy nu wazuub gyidag ornu shuu nu mbecy yu,
orzeꞌ yu zeꞌ wacay ub yu.
Zeꞌ yu nu zuub gyidag ornu shuu nu mbecy,
orzeꞌ yu zeꞌ galy shcab niy.
33 Benu mbecy rdzib lagy yu lo Ñgyoozh,
orzeꞌ raly shcab niy.
Benu mbecy rlagy yu nu gyed gyel mbecy niy,
nu loga la rlagy ñi nu gyicy yu gyel gyidz niy.