14
Biñ mñaa nu yuꞌ shcab ni nap gyub ic mi de famil nim.
Zeꞌ biñ mñaa ton,
laab ub lam rnit lom lat de famil nim.
2 Yu nu ricy gal mod nu rlagy ñi,
yu zeꞌ rdzib lagy yu lo Ñgyoozh.
Zeꞌ mbecy nu yub mod a̱ꞌ nap,
de yu zeꞌ güii naañ yu lom.
3 De riidz nu driib ruꞌ mbecy ton,
ndeꞌ rlyuuñ nu leꞌy.
Zeꞌ de riidz nu driib ruꞌ mbecy nu yuꞌ shcab ni,
ndeꞌ gyicy ñi nu se la la zac yu.
4 Benu sac tor,
orzeꞌ niꞌ ziꞌl sac sheñ gyez nañ ye.
Nu nac tor,
orzeꞌ rad sheñ cosech.
5 Teshtig nu ricy paa,
waguuy.
Zeꞌ teshtig nu wayicy paa,
yu zeꞌ rguuy.
6 Mbecy rgubdzaa,
yu zeꞌ rlagy yu galy shcab niy,
tees wac.
Mbecy nu yuꞌ shcab ni,
rila a̱ꞌ biigy nu gyet lag yu cuen.
7 Bruu chu lo mbecy ton,
gun waly shcab nir nu nac de riidz nu driib ruꞌy.
8 Mbecy nu yuꞌ shcab ni rad lagy yu lac mod gyicy yu nu nac shcab niy.
Zeꞌ mbecy ton,
coz ton nu ricy yu rguuñ laab ub yu.
9 Mbecy ton wayicy cuen dey mas ricy yu coz cyi.
Zeꞌ mbecy nap,
yu zeꞌ rlagy yu nap cyiiñ nuy losaꞌy.
10 Tub ga la mbecy rad lagy yu la na bis nu guti nañ lardooy.
Nunu ni tub la mbecy wagad lagy yu la coz yet lagy yu nañ lardooy.
11 Nit lo famil ni mbecy a̱ꞌ nap.
Zeꞌ de mbecy nap gruu nap de famil niy.
12 Yuꞌ mod nu ricy mbecy nu rlyu nu mod nap.
Zeꞌ walab,
gun mod zeꞌ gyicy ñi nu gat yu.
13 Mas rigy mbecy,
tees ri nu rac nañ lardooy.
Na ornu lazh nu yet lagy yu,
orzeꞌ mas gal ruun yu.
14 Mbecy a̱ꞌ nap razeed yu nu nac mod nu ricy yu.
Zeꞌ mbecy nap nap zulagy yu nu nac mod nu ricy yu.
15 Mbecy sac shcab ni cheña lagy yu dela coz nu rnii mbecy loy.
Zeꞌ mbecy rash shcab rguꞌ cuen yu ca par chay.
16 Mbecy nu yuꞌ shcab ni rdzib yu lo coz a̱ꞌ nap,
nunu gruu chuy loñ.
Mbecy nu ton na ndejad yu,
nunu ricy cup yu consuel lo coz nu ricy yu.
17 Mbecy dzaꞌ ic,
yu zeꞌ wagnii la tooy
ornu ricy yu coz ton.
Zeꞌ mbecy a̱ꞌ nap,
dela mbecy ca ic dey loy.
18 De mbecy nu wagash shcab,
tub zi la coz nu gyiyeeñ yaa dey,
ndeꞌ coz ton.
De mbecy nu rash shcab,
de yu zeꞌ gad lagy yu zañ coz.
19 De mbecy nu shiñ ricy,
de yu zeꞌ rzaab tiily yu lo de mbecy nap.
De mbecy a̱ꞌ nap rza tiiñ dey la coz gyeroꞌ ni mbecy nu ricy coz nu seꞌñ.
20 Tub mbecy zi,
mas de amig niy wayet lagy dey yu.
Zeꞌ de mbecy guaniꞌñ drusubaꞌ la amig niy.
21 Yu nu rgüii naañ lo losaꞌ ricy yu cyi.
Zeꞌ yu nu rashni lagy mbecy zi,
yu zeꞌ dzi niy.
22 De yu nu rboo ic coz a̱ꞌ nap,
yu zeꞌ radzay.
Tees benu mbecy yub yu mod nu gyicy yu coz nap,
orzeꞌ ca lagy mbecy loy,
nunu ricy paa nu dey yu.
23 De mbecy nu fert ricy riiñ,
ricy dey gan.
Zeꞌ de mbecy nu rnii riidz ziꞌl,
de yu zeꞌ gyel zi zuy.
24 Gyel nap ni mbecy nu yuꞌ shcab ni,
ndeꞌ nañ gal nu na tub coron nu zub tooy.
Zeꞌ mbecy ton rabee nu ton nay nu nac gyel ton niy.
25 Tub teshtig nu rnii rishli,
yu zeꞌ co mbañ yu tuubaꞌ mbecy.
Zeꞌ teshtig fals,
yu zeꞌ cush cyay ich losaꞌy.
26 Yu nu rdzib lagy lo Ñgyoozh,
dzi fert consuel nu ricy cup yu lom.
Nu nac ndeꞌ a̱ꞌ rishdzidz yuꞌ de iꞌñ yu.
27 Benu rdzib lagy mbecy lo Ñgyoozh,
orzeꞌ ndeꞌ nañ gal nu na tub zeꞌ nu driib nis
nu gyicy ñi nu wat mbecy.
28 Benu tub rey gyub ic yu zigy mbecy,
orzeꞌ dzi lily nay.
Zeꞌ benu gyub ic yu ñuu zi mbecy,
orzeꞌ se la la sac yu.
29 Mbecy nu wachaꞌ ic,
yu zeꞌ dzi yuꞌ shcab niy.
Zeꞌ mbecy chaꞌ ic,
yu zeꞌ ton nay.
30 Benu che ti ri nañ lardoo mbecy,
ndeꞌ gyicy ñi nu cyiiñ ruub yu.
Zeꞌ mbecy lagy saap,
yu zeꞌ nay
gal nu na nu radz nañ rit yu.
31 Yu nu rshet zi mbecy zi,
yu zeꞌ tub yu nu rnii zi ni biñ nu psaꞌ lagy yu.
Zeꞌ yu nu rashni lagy mbecy zi,
yu zeꞌ rca lagy yu lom.
32 Mbecy a̱ꞌ nap,
yu zeꞌ nit loy
nu nac coz a̱ꞌ nap nu ricy yu.
Zeꞌ mbecy nu ricy coz nu seꞌñ,
yu zeꞌ cyish loy
nu Ñgyoozh gac num yu mas gat yu.
33 Nañ lardoo mbecy nu yuꞌ shcab ni druu shcab lily.
Zeꞌ nañ lardoo mbecy ton wacyuu lañ.
34 Gyed gyel mbecy ni tub nac mbecy nu nac nu nap dey.
Zeꞌ gruu gyel mbecy ni dey nu nac cyi.
35 Tub rey dzi yet lagy mbecy nu zu riiñ loy
benu nap rcyiiñ yu.
Tees chaꞌ ic yu ni mbecy nu waccyiiñ.