13
Yu feñ nu yuꞌ shcab ni,
yu zeꞌ “O”,
niiy
ornu shuu nu uz yuy.
Zeꞌ yu nu ricy ñgya,
yu zeꞌ wagyicy cuen yu
ornu shuu nu mbecy yu.
2 Tub ga la mbecy dub gal nu na coz nu rniiy dub ni na iy gyad.
Zeꞌ de mbecy rguu,
de yu zeꞌ ric la añ ni dey lo coz deet.
3 Mbecy nu ricy cuidad riidz nu rnii,
yu zeꞌ ricy cuidad yu ub yu.
Yu nu dzi rnii,
yu zeꞌ nit loy ub yu.
4 Mbecy zed,
yu zeꞌ rlagy yu gad la coz niy,
par wagad ñi.
Zeꞌ yu nu ricy riiñ,
yu zeꞌ gruu nap yu.
5 Mbecy nu ricy coz nu seꞌñ rzi lagy yu lo gyel rguu.
Zeꞌ de mbecy a̱ꞌ nap,
yu zeꞌ gat loy,
nunu gruu gyel mbecy niy.
6 De coz nu seꞌñ nu ricy mbecy,
ndeꞌ gyicy ñi nu wazac deet yu.
Zeꞌ de coz a̱ꞌ nap nu ricy mbecy cyi,
ndeꞌ gyicy ñi nu nit loy.
7 Yuꞌ mbecy nu ricy yu nu guaniꞌñ yu,
zeꞌ se la la coz yuꞌ niy.
Zeꞌ yuꞌ mbecy nu ricy yu nu gyel zi zuy,
zeꞌ tonaꞌ la guaniꞌñ yu.
8 Gyel nap ni mbecy guaniꞌñ,
ndeꞌ gyicy ñi nu cueꞌ cut mbecy yu.
Zeꞌ mbecy zi wanii too mbecy nu cut yuy.
9 De mbecy nu ricy coz nu seꞌñ,
yu zeꞌ nay gal nu na gyi nu rbic yaa.
Zeꞌ mbecy a̱ꞌ nap na dey gal nu na tub candiil nu byuu.
10 Gyel leꞌ,
ndeꞌ ricy ñi coz deet.
De mbecy nu yuꞌ shcab ni,
de yu zeꞌ yu nu rgyiiñ consef.
11 Gyel nap nu gur rad,
ndeꞌ dzach laazh ñi.
Benu gyel nap nu gyet lag ñuu ga ñuu ga nu nac riiñ nu ricy mbecy,
ndeꞌ gyañ ñii.
12 Benu wazac mbecy lo coz nu cyish loy lo lueg la,
orzeꞌ rac deet nañ lardooy.
Ornu zac loy lo coz nu ric la añ niy lo,
orzeꞌ ndeꞌ ricy ñi gal nu ricy tub yag nu rbic gyel mbañ niy.
13 Yu nu rdily lo lo riidz ni Ñgyoozh,
yu zeꞌ gyicy shniy nu nac coz nu bicy yu.
Zeꞌ yu nu rdzib lagy lo mandaar nim,
yu zeꞌ gyad iy.
14 Coz nu rlyuu mbecy nu yuꞌ shcab ni,
ndeꞌ nañ gal nu na tub zeꞌ nu driib nis nu rbic gyel mbañ.
De riidz zeꞌ gyicy ñi nu gruu mbañ mbecy.
15 Benu mbecy nap na shcab niy,
orzeꞌ ndeꞌ gyicy ñi nu ca lagy losaꞌy loy.
Zeꞌ mbecy nu wayicy cup dey consuel lo,
yu zeꞌ deet chesay gyishlombecy.
16 Mbecy nu rash shcab,
yu zeꞌ gyicy yu gal mod nu druu nañ shcab niy.
Zeꞌ mbecy nu ton na,
yu zeꞌ gyicy yu nu gabe gyel ton niy.
17 Benu tub mbecy nu rza nu raso̱o̱ wagyicy paay,
orzeꞌ yu zeꞌ ricy deet yu.
Zeꞌ benu tub mbecy nu rza nu raso̱o̱ ricy paay,
orzeꞌ ricy yac yu ni losaꞌy.
18 Benu tub mbecy dily loy lo consef nu rbic losaꞌy,
orzeꞌ gyet gyel zi niy,
nunu waca lagy mbecy loy.
Zeꞌ benu zuub gyidag yu ni losaꞌy,
orzeꞌ rca lagy mbecy loy.
19 Yet lagy mbecy ornu zac yu lo coz nu rlagy yu.
Ndeꞌ nu de mbecy ton walagy yu gruu chuy lo coz a̱ꞌ nap.
20 Yu nu gac nu mbecy nu yuꞌ shcab ni,
yu zeꞌ galy shcab niy.
Yu nu gac nu mbecy ton,
zac ziy.
21 Coz deet zaab ñi ich mbecy cyi.
Zeꞌ mbecy nu ricy coz nu seꞌñ,
yu zeꞌ nap na iy gyad.
22 De mbecy nap gad gyel nap niy nu zeeñ yu yaa de yag yu.
Zeꞌ de mbecy cyi rcyaañ dey gyel nap
nu chañ yaa de mbecy nu ricy coz nu seꞌñ.
23 Lo yu ni mbecy zi druu sheñ cosech nu gow yu.
Zeꞌ nu sac gyel fushtiz,
wacabee la ca rash ñi.
24 Mbecy nu wacshuu nu iꞌñ,
yu zeꞌ wacay yu.
Zeꞌ mbecy nu rshuu nu iꞌñ,
yu zeꞌ rcay iꞌñ yu.
25 Mbecy nu ricy coz nu seꞌñ,
yu zeꞌ rad row gyel yu.
Zeꞌ mbecy a̱ꞌ nap gyel ran ziꞌl rded yu.