12
Benu tub mbecy yet lagy yu ornu shuu nu mbecy yu,
orzeꞌ yet lagy yu nu galy shcab niy.
Zeꞌ benu tub mbecy rzi lagy yu ornu shuu nu mbecy yu,
orzeꞌ nac yu mbecy sac shcab ni.
2 Ñgyoozh gyedzuꞌ lagy mi mbecy nap.
Zeꞌ niim nu yuꞌ falt ni mbecy gur feñ.
3 Mbecy a̱ꞌ fert zuy nu nac coz a̱ꞌ nap nu ricy yu.
Zeꞌ de yu nu ricy coz nu seꞌñ,
de yu zeꞌ nay
gal na yag nu gyi pshet lyu.
Ndeꞌ warulyuuñ.
4 Biñ mñaa nu rzu cuidad,
mi zeꞌ nam
gal nu na tub coron nu zub too ñgyeem.
Zeꞌ biñ mñaa a̱ꞌ nap,
mi zeꞌ nam
gal nu na coz nu ricy nu radz nañ rit yu.
5 De mbecy nu ricy coz nu seꞌñ,
rash dey shcab nu nac coz nu seꞌñ zeꞌ.
Zeꞌ de mbecy a̱ꞌ nap rash dey shcab nu nac coz a̱ꞌ nap ziꞌl.
6 De riidz nu rnii mbecy a̱ꞌ nap,
ndeꞌ nañ gal nu na tub caa nu ricy ñi nu gat mbecy.
De riidz nu rnii mbecy nu ricy coz nu seꞌñ,
ndeꞌ gyicy ñi nu gruu mbañ yu.
7 Gyaꞌ lo nez mbecy a̱ꞌ nap.
Zeꞌ nez mbecy nu ricy coz nu seꞌñ wanit loñ.
8 Rlagy ñi nu gyabic na gyel mbecy ni mbecy
dub gal nu na shcab niy.
Zeꞌ mbecy nu ton na,
güii naañ na loy.
9 Nap zir gac naa mbecy nu se la la sac,
zeꞌ ricy na riiñ nu gad nu don,
gazeꞌ nu gac naa mbecy lily,
zeꞌ wad nu don.
10 De mbecy nu ricy coz nu seꞌñ gad lagy yu
lac gyicy nuy de bañcyug niy.
Zeꞌ de mbecy a̱ꞌ nap wagashni lagy yu ma.
11 Yu nu ricy riiñ lo yu,
yu zeꞌ wayicy falt coz nu goy.
Zeꞌ mbecy nu wagash shcab,
yu zeꞌ rnit loy tiem niy lo coz nu wabic iy.
12 Coz nu rlagy mbecy a̱ꞌ nap,
ndeꞌ coz nu ri nañ gyish ni reñaꞌ mbecy a̱ꞌ nap.
Zeꞌ mbecy nu ricy coz nu seꞌñ,
yu zeꞌ rcyiiñ gusht yu.
13 De mbecy a̱ꞌ nap gyet lag yu nañ caa ni de riidz rguu nu rniiy.
Zeꞌ mbecy nu ricy coz nu seꞌñ,
yu zeꞌ glay lo coz deet.
14 Tub mbecy dub gal nu na coz nu rniiy dub ni gyad iy,
nunu gyad iy dub gal nu na coz nu ricy yu.
15 Mbecy ton na,
yu zeꞌ rziiy nu dela coz nu ricy yu nap ricy yu.
Zeꞌ mbecy nu yuꞌ shcab ni,
yu zeꞌ rzuub gyidag yu consef nu rbic losaꞌy.
16 Mbecy ton na rlyuuy gyel rzi lagy niy lo losaꞌy.
Zeꞌ mbecy nu yuꞌ shcab ni,
yu zeꞌ wayicy cuen yu
ornu mbecy shiñ ricy nuy yu.
17 Teshtig nu rnii rishli,
yu zeꞌ gyicy yu gyel fushtiz.
Zeꞌ teshtig nu rguu,
yu zeꞌ rguuy.
18 Yuꞌ riidz nu rnii mbecy nu ricy ñi gal nu ricy mandzicy.
Rcad güiiñ mbecy.
Zeꞌ riidz ni de mbecy nu yuꞌ shcab ni ricy ñi nu gyanap zu lagy mbecy.
19 Yu nu rishli rnii,
yu zeꞌ gyiyeeñ yu tub la.
Zeꞌ yu nu rguu,
sij ziꞌl,
orzeꞌ sacaꞌy.
20 Yuꞌ gyel rguu nañ lardoo de mbecy nu rboo ic coz a̱ꞌ nap.
Zeꞌ chesu cyit lagy de mbecy nu rboo ic coz nap.
21 Yu nu ricy coz seꞌñ wazac yu ni tub la coz deet.
Zeꞌ de mbecy a̱ꞌ nap zac dey de lo la coz a̱ꞌ nap.
22 Ñgyoozh rzi lagy mi lo mbecy rguu.
Zeꞌ yet lagy mi mbecy nu rnii riidz rishli.
23 De mbecy nu yuꞌ shcab ni wacuic yu nu gad lagy losaꞌy dela coz nu rad lagy yu.
Zeꞌ de mbecy ton rniiy dela coz ton nu yuꞌ nañ shcab niy.
24 Yu nu dzi ricy riiñ,
yu zeꞌ gyac yu mbecy nu gyub ic.
Yu zed,
yu zeꞌ gyac yu mbecy nu gyicy coz nu nii losaꞌy.
25 Ornu deet rac nañ lardoo mbecy,
orzeꞌ dzi ricy shniy.
Ornu niin tub riidz nap loy,
orzeꞌ cuic ñi baloor niy.
26 Mbecy nu ricy coz nu seꞌñ,
yu zeꞌ lyuuy nez ni losaꞌy.
Zeꞌ mbecy a̱ꞌ nap yu zeꞌ gudzay nez.
27 Benu mbecy zed chay guuz,
orzeꞌ wagad bañcyug niy.
Zeꞌ mbecy ricy riiñ gad sheñ gyel nap niy.
28 Benu mbecy gyicy yu mod nu seꞌñ,
orzeꞌ ndeꞌ nañ gal na nu zay nez ni gyel mbañ.
Benu mbecy gyicy yu mod a̱ꞌ nap,
ndeꞌ nañ gal na nu zay nez ni gyel gut.