11
Ñgyoozh wagyet lagy mi ornu mbecy rtush pee fals yu,
tees yet lagy mi ornu mbecy tush pee liy.
2 De mbecy leꞌ rlagy ñi nu gruu gyel mbecy niy.
Zeꞌ mbecy nu yuꞌ shcab ni ricy yu gyel gyidz niy.
3 Tub mbecy nap rad lagy yu lac mod gyicy yu nu nac nu nil nap yu.
Zeꞌ mbecy a̱ꞌ nap,
yu zeꞌ nit loy nu nac coz a̱ꞌ nap nu ricy yu.
4 De gyel nap nir,
rila wacyiiñ ñi dzi nu char lo cashtig.
Tees benu mbecy ricy yu mod nu seꞌñ,
orzeꞌ ndeꞌ gyicy ñi nu wat yu.
5 De coz seꞌñ nu ricy mbecy nap ricy ñi nu gad lagy yu lac mod gyicy yu.
Tees de coz nu ricy mbecy a̱ꞌ nap gyicy ñi nu nit loy.
6 De mbecy nap gruu nap yu nu nac nu ricy yu coz nu seꞌñ.
Zeꞌ mbecy nu wayicy paa gyet lag dey nañ caa ni gyel ye rzac niy.
7 Ornu mbecy a̱ꞌ nap gat yu,
orzeꞌ gyaꞌ lo dela gyel rgyish lo niy.
Se la la sac nu briish loy lo de coz ni gyishlombecy ii.
8 Ñgyoozh glaam mbecy nu ricy coz nu seꞌñ lo de coz deet.
Lugaar nu yu zeꞌ zac yu coz deet,
ca mbecy a̱ꞌ nap zac yu coz deet zeꞌ.
9 De mbecy a̱ꞌ nap nit loy losaꞌy nu nac de riidz nu rniiy.
Zeꞌ de mbecy nu ricy coz nu seꞌñ,
yu zeꞌ gruu nap yu nu nac nu yuꞌ shcab niy.
10 Ornu de mbecy nu ricy coz nu seꞌñ gruu nap dey,
orzeꞌ dzi yet lagy dela mbecy gyedz.
Zeꞌ de mbecy a̱ꞌ nap,
ornu gat yu,
par nu tantaꞌ gyet lagy mbecy,
cyich la gyiꞌ dey lo yu.
11 Gyed gyel mbecy ni tub gyedz
nu nac de coz nap nu ricy de mbecy nap nu yuꞌ gyedz zeꞌ.
Zeꞌ de riidz nu rnii mbecy a̱ꞌ nap,
ndeꞌ gyicy ñi nu nit loñ.
12 Mbecy nu sac shcab ni rzat ziy losaꞌy.
Zeꞌ mbecy nu yuꞌ shcab ni,
yu zeꞌ ricy cuidad yu ruꞌy.
13 Mbecy cuen rniiy dela coz nu rad lagy yu.
Zeꞌ mbecy nu ricy paa rsoow ruꞌy.
Wagniiy de riidz ngach nu rnii mbecy.
14 Benu sac yu nu lyuu nez ni de mbecy nu yuꞌ tub gyedz,
orzeꞌ waruu nap ñi.
Benu yuꞌ zañ yu nu rbic consef,
orzeꞌ se la la coz zac gyedz zeꞌ.
15 Benu tub mbecy chay faboor ni losaꞌy,
benu niiy nu gac gyash mbecy coz niy nu nac nu losaꞌy zeꞌ wayish yu diꞌñ yu,
orzeꞌ yu zeꞌ zac ziy.
Yu nu waya faboor ni losaꞌ ornu coy tiñ,
yu zeꞌ nap zu lagy yu.
16 Biñ mñaa gugy,
na ca lagy mbecy lom.
Zeꞌ mbecy wachib lagy,
tiñ ziꞌl rad niy.
17 Mbecy nu nap ricy nu losaꞌ,
orzeꞌ laab ub yu nap ricy nuy.
Orzeꞌ benu mbecy yet lagy yu gyicy yu nu gatow ni losaꞌy,
orzeꞌ niꞌ ziꞌl gyicy yu nu gatow ni ub yu.
18 I mbecy a̱ꞌ nap,
ndeꞌ coz fals.
Zeꞌ yu nu ricy coz nap,
yu zeꞌ gyad zaꞌ la iy.
19 Mbecy nu ricy coz nu seꞌñ,
yu zeꞌ cui mbañ yu.
Zeꞌ mbecy nu zaab ich coz a̱ꞌ nap gat yu.
20 Ñgyoozh rzi lagy mi lo mbecy nu shiñ na shcab ni.
Tees yet lagy mi de yu nu sac falt ni.
21 De mbecy a̱ꞌ nap waded la zac yu lo cashtig.
Zeꞌ de mbecy nu ricy coz nu seꞌñ gla dey lo cashtig.
22 Tub biñ mñaa cyit na,
benu sac shcab nim,
nam gal nu na tub cuch nu zub biꞌ or gyidiꞌñ.
23 Coz nu rlagy mbecy nu ricy coz nu seꞌñ,
ndeꞌ du ub coz nap ziꞌl.
Zeꞌ coz nu ric la añ ni mbecy a̱ꞌ nap lo,
tub zi la ndeꞌ gyicy ñi nu gazi lagy mbecy.
24 Mbecy nu rbic coz ni losaꞌ,
orzeꞌ sheñ zir gad niy.
Zeꞌ mbecy nu rzi cuic coz ni,
yu zeꞌ gyagyel zi zuy.
25 Yu nu wacsi cuic coz ni losaꞌ,
yu zeꞌ gruu nap yu.
Yu nu rbic coz ni losaꞌ,
yu zeꞌ niꞌ ziꞌl gad ñi niy.
26 Mbecy nu ricy cup sheñ uub,
zeꞌ wacut yuñ,
yu zeꞌ nii zi losaꞌy niy.
Zeꞌ yu nu rut uub,
yu zeꞌ nap nii losaꞌy niy.
27 Yu nu ryub coz nap,
coz nap rzac yu.
Yu nu ryub coz a̱ꞌ nap,
yu zeꞌ laabaꞌ coz a̱ꞌ nap gad niy.
28 Yu nu rgyish lo lo gyel nap ni,
yu zeꞌ nit loy
gal nu rzac tub lyag wach ornu rlag ñi.
Tees mbecy nu ricy coz nu seꞌñ,
yu zeꞌ nap zac yu
gal nu rzac yag nu grib iꞌñ.
29 Yu nu gyicy nu cyid coz deet lat famil ni,
orzeꞌ bi ziꞌl ca lo cuen nu dugyiy.
Wac gyeeñ ñi yaay.
Mbecy ton dub laa tiem gac yu moz ni mbecy nu yuꞌ shcab ni.
30 Benu tub mbecy gyicy yu mod nu seꞌñ,
orzeꞌ ricy yu nu cui mbañ yu.
Benu tub mbecy shet ziy losaꞌy,
orzeꞌ gyicy yu nu gat yu.
31 Benu mbecy nu ricy coz nu seꞌñ gyad iy gyishlombecy ii,
orzeꞌ niꞌ ziꞌl de mbecy a̱ꞌ nap nu de mbecy cyi gyadaꞌ i dey.