De rishcyit nu bzeeñ rey Salomoong
10
De nu nii de rishcyit nu bzeeñ Salomoong.
De yu feñ nu yuꞌ shcab ni ricy yu nu dzi yet lagy de mbel niy.
Zeꞌ de yu feñ nu ton na,
yu zeꞌ ricy yu nu gzac zi de mbel niy.
2 Benu tub mbecy rad gyel nap niy,
benu walab mod nap guud ñi,
orzeꞌ se la la sac ñi.
Zeꞌ benu mbecy ricy yu mod nu seꞌñ,
ndeꞌ gyicy ñi nu wat yu.
3 Ñgyoozh wazaan mi nu gyan de mbecy nu ricy coz nu seꞌñ.
Zeꞌ de mbecy a̱ꞌ nap washet ic mi nu gad de coz nu rlagy yu.
4 Benu razeed mbecy,
orzeꞌ gyel zi zuy.
Zeꞌ benu fert ricy yu riiñ,
orzeꞌ gyaguaniꞌñ yu.
5 Yu nu teꞌ cosech tiem niñ,
yu zeꞌ yuꞌ shcab niy.
Tees yu nu raas tiem nu dudeꞌ cosech,
yu zeꞌ toꞌ lo gruuy.
6 Ñgyoozh zañ coz nap gyicy num mbecy nu ricy coz nu seꞌñ.
Zeꞌ de riidz nu driib ruꞌ mbecy a̱ꞌ nap rsoow ñi lo de coz a̱ꞌ nap nu ricy yu.
7 Ornu gat tub mbecy nu ricy coz nu seꞌñ,
orzeꞌ nap rzat losaꞌy yu.
Zeꞌ ornu gat mbecy a̱ꞌ nap,
dzach nit lagy dey yu.
8 Yu nu yuꞌ shcab ni,
yu zeꞌ “O”,
niiy nu gyicy mbecy mandaar yu.
Zeꞌ yu nu rnii riidz ton,
yu zeꞌ nit loy.
9 Yu nu ricy dub gal mod nu rlagy ñi wadzib lay chesay.
Zeꞌ yu nu yub mod a̱ꞌ nap,
yu zeꞌ gyuꞌ bee mod nu ricy yu.
10 Yu nu rgüii ted lo losaꞌ,
yu zeꞌ gyicy yu nu gac deet.
Nunu yu nu rnii ton,
yu zeꞌ nit loy.
11 Riidz nu driib ruꞌ yu nu ricy coz nu seꞌñ,
ndeꞌ nañ gal nu na nis nu rbic gyel mbañ.
Zeꞌ de riidz nu driib ruꞌ mbecy a̱ꞌ nap
rsoow ñi lo de coz a̱ꞌ nap nu ricy yu.
12 Benu mbecy rzi lagy yu lo losaꞌy,
ndeꞌ gyicy ñi nu chucoo dey.
Zeꞌ benu mbecy rcay losaꞌy,
orzeꞌ ricy sulagy yu dela falt ni losaꞌy.
13 De mbecy nu yuꞌ shcab ni rnii dey riidz nu cyiiñ.
Zeꞌ de mbecy nu wagash shcab rlagy ñi tub garot ya ich yu.
14 De mbecy nu yuꞌ shcab ni wayicy leꞌy nu nac coz nu rad lagy yu.
Zeꞌ ornu rnii mbecy riidz ton,
orzeꞌ rishdzidz nu cyid gyel zi.
15 Se la la zac mbecy guaniꞌñ nu nac nu yuꞌ tiñ niy.
Zeꞌ mbecy zi nit loy nu nac nu sac tiñ niy.
16 Lo riiñ ni mbecy nap gruu nu cui mbañ yu.
Zeꞌ lo riiñ ni mbecy a̱ꞌ nap gruu cyi.
17 Yu nu “O”,
rnii ornu shuu nu mbecy yu,
yu zeꞌ cui mbañ yu.
Zeꞌ yu nu zuub yaa de raso̱o̱ nu rnii mbecy loy ornu shuu nuy yu,
orzeꞌ yu zeꞌ ricy yu nu nit lo ub yu.
18 Yu nu ricy nu wagad lagy mbecy nu rzi lagy yu,
yu zeꞌ nac yu mbecy rguu.
Zeꞌ yu nu rnii rishcuen,
yu zeꞌ nac yu mbecy ton.
19 Yu nu dzi rnii,
yu zeꞌ dzi radzay.
Zeꞌ yu nu wagnii,
yu zeꞌ yuꞌ shcab niy.
20 Riidz nu driib ruꞌ mbecy nu ricy coz seꞌñ,
ndeꞌ nañ gal nu na plat ga ub.
Zeꞌ par shcab ni mbecy a̱ꞌ nap,
se la la sac ndeꞌ.
21 Riidz nu driib ruꞌ mbecy nu ricy coz seꞌñ,
ndeꞌ lyuuñ ni zigy mbecy.
Zeꞌ mbecy ton gat yu nu nac nu sac shcab niy.
22 Ornu Ñgyoozh nap gyicy num mbecy,
ndeꞌ tub gyel nap,
nunu mbecy zeꞌ wazac deet yu nu nac ñii.
23 Mbecy ton gusht niy nu gyicy yu coz a̱ꞌ nap.
Zeꞌ mbecy nu yuꞌ shcab ni ricy yu gusht niy nu shcab nu ricy cup yu.
24 La ziꞌl coz nu rdzib mbecy a̱ꞌ nap lo,
ndeꞌ coz nu gzac yu.
Zeꞌ mbecy nu ricy coz nu seꞌñ,
yu zeꞌ rad la coz nu ric la añ niy lo.
25 Ornu ded tub gyel zi gal nu na tub gyey bi ily,
orzeꞌ mbecy a̱ꞌ nap nit yu.
Zeꞌ mbecy nu ricy coz nu seꞌñ,
yu zeꞌ zuy tub la.
26 Gal nu rac lo lay mbecy nu row yu coz zii,
gal nu rac urlo mbecy ornu rzuꞌ dzeeñ,
ni rac nañ lardoo tub patro̱o̱
ornu ricy yu mandaar lo tub mbecy zed
nu cha nuy tub raso̱o̱.
27 Ornu tub mbecy rdzib lagy yu lo Ñgyoozh,
orzeꞌ rtuuñ yu lo yuy.
Zeꞌ de mbecy a̱ꞌ nap ricy shub yu lo yuy.
28 Yu nu ricy coz seꞌñ,
yu zeꞌ yet lagy yu nu nac coz nu rgyish loy lo.
Zeꞌ mbecy a̱ꞌ nap,
sac la coz nu cyish loy lo.
29 Ñgyoozh wazaan mi nu shiñ zac mbecy nu nap ricy,
tees nit lom de mbecy nu shiñ ricy.
30 De yu nu ricy coz nu seꞌñ,
de yu zeꞌ dub laa tiem ricy dey gan.
Zeꞌ de mbecy a̱ꞌ nap wazu tuñ dey gyishlombecy.
31 Riidz ni mbecy nu ricy coz nu seꞌñ,
ndeꞌ riidz nu druu lo shcab lily.
Zeꞌ Ñgyoozh soow mi ruꞌ de mbecy nu rnii riidz nu rza contr nim.
32 Yu nu ricy coz nu seꞌñ,
rniiy riidz nu gyedzuꞌ lagy mbecy.
Zeꞌ mbecy a̱ꞌ nap rniiy tub lo ziꞌl coz a̱ꞌ nap.