Shcab lily nu shcab ton
9
Shcab lily,
ndeꞌ nañ gal nu na tub mbecy nu bzaa tub yuꞌ.
Orzeꞌ bzuy gagy yabi niñ.
2 Orzeꞌ biit yu bañcyug nu gyicy yu saꞌ.
Orzeꞌ bzu yey tub ñup ni urbyay.
Orzeꞌ pcuaay gyaꞌñ lo mez.
3 Orzeꞌ bzuu nez yu de moz niy
nu chay zeꞌ nu gya zir ni gyedz nu cuedz yu mbecy.
4 Orzeꞌ na dey:
“De ru,
yu feñ nu wagad lagy,
¡da der par ii!”,
nay.
Orzeꞌ mnii dey lo de yu nu ton ricy,
orzeꞌ nay:
5 “Da der gor gyishtily,
nunu goꞌr ñup nu bzu lilya̱.
6 Orzeꞌ checar nu ton ricy ru.
Orzeꞌ cui mbañ ru.
Gyicy ru dub gal nu ricy mbecy nu yuꞌ shcab ni”,
na dey.
7 Mbecy nu rgubdzaa losaꞌ,
yu zeꞌ zat naañ yu yu nu shuu nuy.
Orzeꞌ ndeꞌ ziꞌl i yu nu shuu zeꞌ.
Mbecy a̱ꞌ nap,
yu zeꞌ shiñ gyicy nuy mbecy nu shuu nuy.
Orzeꞌ ndeꞌ ziꞌl i yu nu shuu zeꞌ.
8 Benu pshuu nur mbecy rgubdzaa,
orzeꞌ gazi lagy yu lor.
Zeꞌ benu shuu nur mbecy nu yuꞌ shcab ni,
orzeꞌ yu zeꞌ ca lagy yu lor.
9 Mnii lo mbecy nu yuꞌ shcab ni.
Orzeꞌ gyac zir yu mbecy nu yuꞌ shcab ni.
Blyuu ni mbecy nap.
Orzeꞌ dzi zir gad lagy yu.
10 Coz loga la nu gyicy mbecy par nu gac yu mbecy rad lagy,
ndeꞌ nu dzib lagy yu lo Ñgyoozh,
Shuaan na.
Benu cuꞌ lor Ñgyoozh,
biñ nu dzi zir yon,
orzeꞌ gyicy cup ru shcab.
11 Shcab lily,
ndeꞌ gyicy ñi nu tuñ tiem cyiiñ ru,
nunu cyaañ ñi ñaꞌn nu zur gyishlombecy.
12 Benu yuꞌ shcab nir,
orzeꞌ gyicy ru gan ir.
Zeꞌ benu nac ru mbecy rgubdzaa,
orzeꞌ ub lar cuen nir nu cyish ru coz nu ricy ru.
13 Gyel ton,
ndeꞌ nañ gal nu na biñ mñaa nu ton rnii.
Ton nam nunu sac shcab nim.
14 Rzub mi gyeroꞌ nim.
Zub mi lugaar nu gya zir ni gyedz.
15 Orzeꞌ rbish ti num de mbecy nu za nez nap.
16 Orzeꞌ nam:
“¡De ru,
yu feñ nu wagad lagy,
da der par ii!”
Zeꞌ lo de mbecy nu ton,
i mod rniim.
Orzeꞌ nam:
17 “Nis nu a̱ꞌ yad ñi nu do̱ꞌ,
ndeꞌ dzi zir ish ñi.
Gyishtily nu don ngach,
ndeꞌ dzi zir nap row”,
nam.
18 Zeꞌ de mbecy nu zu nez zeꞌ,
wagad lagy dey
nu de mbecy nu rdeꞌ lom nac dey mbecy gut.
De mbecy nu rbedz mi,
de yu zeꞌ bi ri dey zeꞌ nu gyi ni gyerbaa.