La na shcab lily
8
Shcab lily ndeꞌ nañ gal nu na tub mbecy nu rbish ti.
Coz nu rad lagy mbecy,
ndeꞌ nañ gal na tub mbecy nu ye rnii.
2 Nañ gal nu na tub mbecy nu zu too bicy.
Zuy zeꞌ nu byacruuz de nez.
3 Nañ gal nu na tub mbecy nu rnii ye roꞌ ni gyedz.
4 Orzeꞌ nay:
“De ru,
mbecy gyishlombecy,
de riidz ne̱,
ndeꞌ coz par de ru,
5 gun orzeꞌ de yu feñ sa raly gyac dey mbecy nu gul shcab ni,
nunu de mbecy ton na gyac yu mbecy nu nap na shcab ni.
6 Bzuub gyidag der,
gun ya̱ ne̱e̱ coz nu ricy ñi presis lor,
nunu ne̱e̱ coz nu seꞌñ.
7 Ya̱ rne̱e̱ nu rishli.
Rzi lagya̱ lo gyel rguu.
8 Dela riidz nu rne̱e̱,
ndeꞌ riidz nap.
Sac riidz fals lat ñi,
nunu wayicy ñi nu gadza mbecy.
9 Par de mbecy nu rad lagy,
de riidz ne̱ sac falt niñ,
nunu par de mbecy nu yuꞌ shcab ni,
naal zañ.
10 Orzeꞌ lugaar nu byub ru plat nu or,
nap zir yub ru de riidz ne̱.
11 Gun dzi zir sac shcab lily gazeꞌ de gyitaꞌ nu dzi ñgyup sac.
¡Wasaap ñi ni tub la coz nu gusht ni mbecy!”
12 Shcab lily,
ndeꞌ gal gaa la nañ nu tub mbecy lily nu nay:
“Ya̱ rcyiiña̱ lo de coz nu rad lagya̱.
Yuꞌ shcab ne̱.
Nunu ya̱ ricy cupa̱ de consef nu nap zir.
13 Benu tub mbecy rdzib lagy yu lo Ñgyoozh,
orzeꞌ tub ziꞌl nañ nu rzi lagy yu lo coz a̱ꞌ nap.
Ya̱ rzi lagya̱ lo gyel leꞌ,
lo gyel ñgya,
lo coz a̱ꞌ nap,
gal nu lo riidz a̱ꞌ nap.
14 Ya̱ gac rica̱ consef,
nunu gac cui̱ ca na nu nap.
Yuꞌ shcab ne̱,
nunu ferta̱.
15 Ya̱ locyuuba̱ de rey nu gyub ic yu,
nunu locyuuba̱ de fushtiz nu zaa dey leey nap.
16 Nu nac ya̱,
orzeꞌ gyub ic de lo la gubier nu yuꞌ gyishlombecy.
17 Ya̱ rca̱ de yu nu rca ya̱,
nunu de yu nu ryub ya̱,
gyada̱ ni dey.
18 Ya̱ drica̱ gyel nap.
Nunu ricya̱ nu ca lagy mbecy lo losaꞌy.
Ricya̱ nu gyalily mbecy.
Nunu ricya̱ nu gyicy mbecy gan.
19 Coz nu rica̱,
ndeꞌ dzi zir coz nap gazeꞌ or ga ub.
Nunu coz nu rica̱,
ndeꞌ nap zir gazeꞌ plat fin.
20 Ya̱ cha̱ nez ni de coz nu seꞌñ.
Rusha̱ nez ni gyel fushtiz.
21 De yu nu rca ya̱,
gyicya̱ nu na dey gal nu na mbecy guaniꞌñ.
Cha̱a̱ nañ yuꞌ ni dey nu gyel nap.
22 “Anzir nu saꞌ lagy Ñgyoozh,
dela coz,
ya̱ nil bi naca̱ mbecy nim.
23 Bzuub mi se̱ꞌ ornu bzub gyiꞌ tiem,
anzir nu saꞌ lagy mi gyishlombecy.
24 Ya̱ gula̱ anzir nu cheti de nisyudoo ily.
Ya̱ gula̱ anzir nu griib nis.
25 Ñgyoozh bicy mi nu gula̱
anzir nu zuub mi de bicy gal nu de logyiꞌ.
26 Tiem zeꞌ nigul saꞌ lagy mi yu,
ni de ngush,
ni de yu gyedz.
27 Ya̱ nil zu̱ ornu psaꞌ lagy mi baa,
nunu ornu pcyiid mi ñii nu gyishlombecy,
28 ornu bdaꞌ za baa,
nunu ornu bicy mi nu briib nisyudoo,
29 ornu bicy mi mandaar lo nisyudoo nu cueꞌ grily ñi lo yu wach,
nu ornu bzuub mi gyiꞌ gyishlombecy.
30 Tiem zeꞌ ya̱ masht ni riiñ zeꞌ nunu zu̱ cuit mi.
Zaab bicy la̱ nu yet lagy mi.
Nunu dub laa tiem bet lagya̱ lat nu zu̱ lom.
31 Bet lagya̱ nu nac gyishlombecy nu psaꞌ lagy mi,
nunu bet lagya̱ nu nac de mbecy nu yuꞌ loñ.
32 “Orzeꞌ de ru,
yu feñ ne̱,
bzuub gyidag der ne̱.
Gyicy ru gal nu rne̱e̱.
Orzeꞌ dzi nir.
33 Bzuub gyidag de coz nu rlyu̱u̱ nir,
nunu cueꞌ ruu chur looñ.
34 Dzi ni mbecy nu zuub gyidag ne̱.
Dzi ni mbecy nu rbez lo̱.
35 Gun cyu ziꞌl mbecy benu gyap yu ya̱,
orzeꞌ cui mbañ yu,
nunu Ñgyoozh gyicy mi faboor num yu.
36 Tees yu nu ruu chu lo̱,
yu zeꞌ rishdzidz niy nu gat yu.
De mbecy nu rzi lagy lo̱,
yu zeꞌ rcay gyel gut.”