Caa ni biñ mñaa nu wagyicy paa nu ñgyee
7
De ru yu feñ,
bzuub gyidag de riidz nu rne̱e̱,
nunu pcaa ic dela consef nu drica̱ nir.
2 Bzuub gyidag de consef ne̱,
gal nu de coz nu rlyu̱u̱ nir.
Bicy nuñ gal nu ricy nur coz nu dzi zir sac nir,
gun orzeꞌ cui mbañ ru.
3 Chesa nur ñii dub laa tiem,
nunu pcaa ic ñi.
4 Gyicy ru shcab lily gal na zan ru.
Gyicy ru ñii par losaꞌr nu rded nur.
5 Ndeꞌ coz nu gyicy ñi nu glar lo biñ mñaa nu wayicy paa nu ñgyee.
Glar lo biñ mñaa nu a̱ꞌ yuꞌ lor nu dzi leꞌ rnii.
6 Tub dzi ya̱ bzu̱ bgüi̱i̱ ruꞌ bentan par ich yuꞌ.
7 Orzeꞌ bzaca̱ la be yu feñ sa raly.
Orzeꞌ bduꞌ cuena̱ tub yu nu sac shcab ni.
8 Orzeꞌ yu zeꞌ bded yu par lat cay gaab ga zeꞌ byacruuz nez,
lugaar nu rcyiiñ biñ mñaa a̱ꞌ nap zeꞌ.
Orzeꞌ yu zeꞌ zay yuꞌm.
9 Or zeꞌ sa la za doo.
Ricy falt se ñumiiñ par nu gyecheñ.
10 Orzeꞌ sij ziꞌl bruum gua cheel miy.
Shab mi nañ gal nu na shab biñ congal.
Guul zum.
11 Mi zeꞌ dzi ye rniim riidz wech,
nunu rnid ruꞌm.
Ni wacuez mi yuꞌm.
12 Yuꞌ tiem rded mi lat cay.
Yuꞌ tiem rded mi lat yagyiꞌ.
Yuꞌ tiem nu rbez mi zeꞌ nu byacruuz de nez,
rbez mi cyu ziꞌl mbecy nu ded loga.
13 Orzeꞌ biñ mñaa zeꞌ bduꞌ yaam yeñ yu feñ zeꞌ.
Orzeꞌ bdom chit loy tub mod nu wagat lo lam.
Orzeꞌ nam rab mi yu:
14 “Ya̱ bi brica̱ gun lo Ñgyoozh.
Bi bicy yaca̱ nu dela coz nu ca lo cuen nu gyicya̱.
Orzeꞌ gad beel don.
15 Ndeꞌ nu bru̱u̱ yap cheela̱ ru.
Ya̱ rlagya̱ zaca̱ ru.
Na bdzeela̱ ru.
16 Ya̱ bi briiba̱ negy cyit na nu bruu Egipto lo nuun ne̱.
17 Nunu bi pco̱o̱ coz zguul lo nuun ne̱.
Pco̱o̱ mirra nu aloe nu canel.
18 Da,
gun gyicy na gusht dub laa rel.
Gyicy na gusht gal zaꞌ yu la.
19 Gun ñgye̱e̱ sac ñi na.
Bruuñ zañ zet.
20 Sheñ tiñ za nuñ.
Orzeꞌ fiñ zeꞌ wariiñ gashtal nañ cyup sman”,
na biñ mñaa zeꞌ rab mi yu feñ zeꞌ.
21 Orzeꞌ nu nac riidz nu dzi leꞌ za bicy mi gan yu feñ zeꞌ.
Pcuugy mi lardooy.
22 Orzeꞌ za nuy mi.
Za num yu gal nu za nu dey tub tor lo yu nu zuub yeñ ma.
Nay gal nu na tub dziñ nu bet lag nañ caa.
23 Orzeꞌ pcoo mbecy ma.
Nay gal nu na tub chigyiñ nu bet lag nañ caa.
Wangad lagy yu ti rishdzidz nu gat yu.
24 De ru,
yu feñ ne̱,
bzuub gyidag ne̱.
Bduꞌ cuen de riidz nu rne̱e̱.
25 Cueꞌ gadzar nu nac nu gaton ru lo biñ mñaa nu ni na.
Cueꞌ duneꞌr nu nac nu checar ich mi.
26 Gun zañ mbecy mnuy nu nac mi.
Nunu bicy mi nu gut zigy tonaꞌ la mbecy.
27 Benu gash ru nez nu ya par yuꞌm,
orzeꞌ bi gush ru nez nu ya lat de mbecy gut.