Consef nu nac diꞌñ
6
De ru,
yu feñ,
benu neꞌ ic ru ni amig nir ornu coy tiñ,
benu niir nu gac gyash dey coz nir benu wayish yu,
2 orzeꞌ ru bet lag ru nañ caa nu bzu laab ub ru.
De riidz nu ru mniir gyicy ñi nu nit lor.
3 De ru,
yu feñ,
benu ni bicy ru,
orzeꞌ bet lag ru yaa losaꞌr.
Orzeꞌ i bicy par nu glar.
Orzeꞌ bicy gyel gyidz nir.
Orzeꞌ gua lo amig nir.
Mnishbaa loy nu gyabic yu tiñ zeꞌ.
4 Ni cueꞌ gas ru gashtal gyicy lar gan.
Ni cueꞌ zu lagy ru.
5 Bicy nu glar loy
gal nu ricy tub dziñ ornu grib dze ma lo mbecy nu rcoo ma.
Bicy gal nu ricy tub chigyiñ ornu grib dze ma lo yu nu coo ma.
Consef par mbecy zed
6 De ru,
mbecy zed,
gua güii lo byub.
Bduꞌ cuen mod nu ricy ma.
Orzeꞌ gac ru mbecy nu yuꞌ shcab ni.
7 Mas sac yu nu ricy mandaar ma,
sac yu nu nii lac mod gyicy ma,
8 tees rguꞌ choow ma coz nu row ma cuarez.
Ricy tublaazh ma cosech ni ma tiem nu gad ñi.
9 De ru,
mbecy zed,
¿la be gaal or gas ru?
¿La or gyeshter?
10 Orzeꞌ niir:
“Dasa̱ tub miiñ.
Cyiꞌñ ya̱a̱ nu zu lagya̱ tub mniiñ”,
niir.
11 Lat zeꞌ gyac ru mbecy zi.
Shet yaañ ru,
gal nu ricy tub mbecy a̱ꞌ nap nu nuu suu dañ.
La na mbecy a̱ꞌ nap
12 De mbecy nu se la la sac,
de mbecy shiñ ricy,
dub laa tiem rded yu rguuy mbecy.
13 Orzeꞌ rbic yu mod lo losaꞌy
gun orzeꞌ cueꞌ nii dey nu rguuy.
Rziñ la loy.
Ricy yaay.
Nunu rcueñ gyiꞌy,
gun orzeꞌ cueꞌ nii mbecy nu rguuy.
14 Tonaꞌ la shiñ na shcab niy.
Dub laa tiem rash yu shcab nu nac coz a̱ꞌ nap nu rlagy yu gyicy yu.
Nunu rded yu rcheel yuuy mbecy.
15 Ndeꞌ nu sij ziꞌl gruꞌña tub gyel zi loy.
Tub nu shet ziꞌl gyid iz na,
orzeꞌ tonaꞌ la coz ily nit lo niy.
Gyac yu gal nu na tub mbecy rat nu wayacaꞌy.
Coz nu rzi lagy Ñgyoozh lo
16 Yuꞌ gagy coz nu riñ lagy Ñgyoozh lo.
17 Riñ lagy mi mbecy leꞌ.
Riñ lagy mi mbecy rguu.
Riñ lagy mi yu nu rut mbecy nu sac falt ni.
18 Riñ lagy mi mbecy nu rboo ic de coz a̱ꞌ nap.
Riñ lagy mi mbecy nu rlal la nu gyicy coz a̱ꞌ nap.
19 Riñ lagy mi mbecy nu rac teshtig fals.
Nunu riñ lagy mi yu nu rcheel yuu losaꞌ.
Cueꞌ gal mbecy mñaa losaꞌy
20 De ru,
yu feñ,
nap pcaa ic de consef nu briic de mbel nir.
Pcaa ic der de coz nu blyuu dey nir.
21 Dub laa tiem pcaa ic consef ni dey,
nunu cueꞌ nit lagy ruñ.
22 Pcaa ic ñi ornu zaab zar nez.
Ñaañ ru lat nu nas ru,
nunu cuic ñi consef nir ornu gyeshter.
23 De consef nu rbic dey,
gal nu de coz nu rlyuu dey nir,
de ndeꞌ nañ gal nu na tub candiil nu rbic yaa.
De coz nu rnii dey nu cueꞌ gyicy ru,
ndeꞌ lyuuñ nir lac mod cyiiñ ru gyishlombecy ii.
24 Wazaan ñi nu shiñ gyicy nu biñ mñaa a̱ꞌ nap ru.
Wazaan ñi nu gyicy riidz leꞌ ni biñ gur ded gan ru.
25 Cueꞌ zaan ru nu gyel cyit na ni biñ mñaa saap ñi lagy ru.
Cueꞌ zaan ru nu gyicy mi gan ru nu nac nu dzi leꞌ rgüiim.
26 Mbecy cuic yu tiñ ni biñ mñaa congal par nu chay lom.
Orzeꞌ se tub ruꞌ ziꞌl gyishtily gyeeñ par ub yu.
Zeꞌ yu nu rza lo mñaa losaꞌ,
yu zeꞌ mas gat yu.
27 ¿A gac gyub ruꞌ gyi ruꞌ lyush tub mbecy,
zeꞌ waca gyi shab yu?
Zeꞌ ni na mbecy nu rza lo biñ gur ded.
28 ¿A gac ded mbecy lo boo,
zeꞌ wadzu gyiꞌy?
Zeꞌ ni na mbecy nu rza lo biñ gur ded.
29 Orzeꞌ niꞌ ziꞌl yu nu ral mñaa losaꞌ,
yu zeꞌ walay lo cashtig.
30 Ni tub la mbecy wagüii naañ yu lo gubaan
benu ran yu nunu coz nu ricy gubaan yu,
ndeꞌ coz nu gow yu.
31 Tees benu cub dey yu lat nu ricy yu gubaan,
orzeꞌ rlagy ñi cyish yu gagy tant coz nu bicy gubaan yu
mas nit lo dela coz niy.
32 ¡Dzi ga ton na yu nu ral mñaa losaꞌ!
Yu zeꞌ rnit loy ub yu.
33 Gaaz dey yu,
nunu co dey gyel mbecy niy.
Dub laa tiem rat loy rded yu.
34 Gun mbecy nu ricy saap ich mñaay,
yu zeꞌ nay gal nu na tub gyi.
Yu zeꞌ washni lagy yu mbecy
ornu shuub or nu gyicy yu gal ga.
35 Wayash yu tiñ par nu gyag ic yu.
Mas tonaꞌ la sheñ tiñ,
tees wacyaag ic yu.